[1] Һәгәр qӧрбана йәки дийарийа һәләqәтийе йә у әw дәwара нер бә йан ме бә, әw гәрәке һ'әйwана бе qӧсур Хӧданр'а бьдә.
[2] Бьра әw дәсте хwә дайнә ль сәр сәре qӧрбана хwә у wе ль бәр дәре Коне Щьвине сәржекә, кӧр'ед Һаруннә к'аһин хуне бьр'әшиньнә ль сәр һәр алийед горигәһе.
[3] У жь дийарийа һәләqәтийе, чаwа дийарийа шәwате Хӧданр'а ван тьшта бьдә: Бәзе сәрзьк, һ'әму бәзе навдьл,
[4] һәр дӧ гӧр'ч'ька бәзе сәр у к'еләкава, бәтане щәгәре гӧр'ч'ькава т'әвайи дәрхә.
[5] Кӧр'ед Һарун вана ль сәр горигәһе т'әви дийарийа т'әвайишәwатейә ль сәр qьршед ль сәр егьр бьшәwьтиньн. Әва дийарийа шәwатейә бинхwәш ә бона Хӧдан.
[6] Ле һәгәр әw жь кәре пез qӧрбана дийарийа һәләqәтийе Хӧданр'а бьдә, әw нер йан ме бә, гәрәке беqӧсур бә.
[7] Һәгәр әw бәрхәке хwәр'а бькә qӧрбан, бьра әw ль бәр Хӧдан бьдә.
[8] Бьра әw дәсте хwә дайнә ль сәр сәре qӧрбана хwә у wе ль бәр Коне Щьвине сәржекә у кӧр'ед Һарун хуне ль сәр һәр алийед горигәһе бьр'әшиньн.
[9] У жь дийарийа һәләqәтийе чаwа дийарийа шәwате Хӧданр'а ван тьшта бьдә: Бәзе wе, даwа wе пева qарч'ькеда бьр'и, бәзе сәрзьк у һ'әму бәзе навдьл,
[10] һәр дӧ гӧр'ч'ька бәзе сәр у к'еләкава, бәтане щәгәре гӧр'ч'ькава т'әвайи дәрхә.
[11] У к'аһин вана ль сәр горигәһе бьшәwьтинә, чаwа дийарийа хӧре шәwатейә бона Хӧдан.
[12] Ле һәгәр qӧрбана wи бьзьн ә, бьра бинә ль бәр Хӧдан,
[13] дәсте хwә дайнә ль сәр сәре wе у ль бәр Коне Щьвине wе сәржекә. Кӧр'ед Һарун хуне ль сәр һәр алийед горигәһе бьр'әшиньн.
[14] У әw жь wе qӧрбана хwәйә дийарийа шәwате Хӧданр'а ван тьшта бьдә: Бәзе сәрзьк, һ'әму бәзе навдьл,
[15] һәр дӧ гӧр'ч'ька бәзе сәр у к'еләкава, бәтане щәгәре гӧр'ч'ькава т'әвайи дәрхә.
[16] К'аһин вана ль сәр горигәһе бьшәwьтинә, әва бьбә дийарийа хӧре шәwатейә бинхwәш. Һ'әму бәз п'ара Хӧдан ә.
[17] Әва нава ньсьлед wәда, щи-wаред wәда бьбә qәйдә-qануна һ'әта-һ'әтайе, кӧ т'ӧ щар нә бәз бьхwьн, нә жи хуне›».