[1] Әв ә qануна дийарийа бәрвадайинейә һәрә пироз.
[2] К'и дәре кӧ дийарийа т'әвайишәwате те сәржекьрьне, гәрәке дийарийа бәрвадайине жи wе дәре бе сәржекьрьне у хуна wе ль сәр һәр алийе горигәһе бе р'әшандьне.
[3] У к'аһин һ'әму бәзе wе, аwа готи даwе, бәзе навдьл дийари кә,
[4] һәр дӧ гӧр'ч'ька бәзе сәр у к'еләкава, бәтане щәгәре гӧр'ч'ькава т'әвайи дәрхә.
[5] К'аһин вана ль сәр горигәһе бьшәwьтинә, чаwа дийарийа шәwатейә Хӧданр'а. Әва дийарийа жь бәрвадайине йә.
[6] Һәр зар'әкә к'аһинайи кӧр'ин дькарә жь ве бьхwә. Гәрәке щийе пирозда бьхwә, әва йа һәрә пироз ә.
[7] Qануна дийарийа паqьжбуне у йа дийарийа бәрвадайине йәк ә, к'аһине кӧ к'әwандьне дькә бьра wир'а бьминә.
[8] Ӧса жи к'аһинәк кӧ дийарийа йәкийә т'әвайишәwате бьдә, ч'әрме wе дийарийа т'әвайишәwатейә кӧ да, бьра wир'а бьминә.
[9] Һәр дийарийа нанийә кӧ тәндуреда пә'ти, йан т'аwеда йан ль сәр селе пьжанди кӧ бе дайине, әw к'аһине дайир'а бьминә.
[10] Ле һәр дийарийа нанийә р'унда стьрайи йан бе р'ун, һ'әму кӧр'ед Һарунр'а wәкә һәв бе п'арәвәкьрьне.
[11] Әв ә qануна дийарийа һәләqәтийе, кӧ йәк Хӧданр'а бьдә:
[12] Һәгәр бона р'азидарийе wе бьдә, һьнге бьра т'әви дийарийа р'азидарийе к'атед р'унда стьрайи бе һәвиртьр'шк у лошед бе һәвиртьр'шкә р'ункьри, к'атед жь аре хаси р'унда стьрайи бьдә.
[13] Пештьри к'ата, бьра әw нане хwәйи һьлати жи дийари бинә, т'әви wе дийарийа хwәйә һәләqәтийе кӧ бона р'азидарийе дьдә.
[14] Жь wан һ'әму дийарийа, йәке гәрәке чаwа дийарийа бәрбьр'икьрьне бьдә Хӧдан. Әва п'ара wи к'аһини йә, йе кӧ хуна дийарийа һәләqәтийе дьр'әшинә.
[15] У гоште дийарийа һәләqәтийа р'азидарийе, һәма wе р'ожа дайида бе хwарьне, жь wе гәрәке һ'әта сьбәһе нәминә.
[16] Ле һәгәр дийарийа wи бона соз ә, йан дийарийа р'әзәдьлийе йә, һьнге qӧрбан wе р'ожа дайида бе хwарьне, чь ма жи р'ожа дьн бе хwарьне.
[17] Ле әw гоште qӧрбанейи кӧ ма р'ожа сьсийа, сәр агьр бе шәwьтандьне.
[18] Һәгәр йәк гоште дийарийа һәләqәтийе р'ожа сьсийа бьхwә, әw найе qәбулкьрьне. Әw ль бәр щәфе дайи нак'әвә, wе бьбә һ'әрами, йе же бьхwә әw гӧнә дькә стуйе хwә.
[19] Әw гоште кӧ тьштәки нәпаqьж к'әвә, гәрәке нәйе хwарьне, әw ль сәр агьр гәрәки бе шәwьтандьне. Һәр кәсе паqьж дькарә гоште дийарийе бьхwә,
[20] ле әw кәсе чахе нә паqьж ә, жь гоште дийарийа һәләqәтийа Хӧдан бьхwә, әw кәса гәрәке жь нава щьмә'та хwә бе ӧндакьрьне.
[21] У әw мәрьве кӧ тьштәки нәпаqьж к'әвә, аwа готи нәпаqьжийа мерьв, йан һ'әйwане нәпаqьж йан һәр тьште һ'әрам к'әвә у жь гоште дийарийа һәләqәтийа Хӧдан бьхwә, әw мәрьва гәрәке жь нава щьмә'та хwә бе ӧндакьрьне›».
[22] Хӧдан Мусар'а хәбәрда у гот:
[23] «Т'әви зар'ед Исраел хәбәр дә у бежә: ‹Т'ӧ щар бәзе га йан пез йан бьзьна нәхwьн.
[24] Бәзе һ'әйwане һ'ьшкбуйи у бәзе дә'вәхwари, һәр тьштед дьнда дькари бьди хәбате, ле т'ӧ щар же нәхwьн.
[25] Һәр кәсе кӧ бәзе дийарийа шәwате Хӧданр'а дайи бьхwә, әw мәрьва гәрәке жь нава щьмә'та хwә бе ӧндакьрьне.
[26] У т'ӧ хуне һәр щи-wаред хwәда нәхwьн, нә хуна тәйрәда нә жи һ'әйwана.
[27] Ле к'е чь хуне бьхwә, әw гәрәке жь нава щьмә'та хwә бе ӧндакьрьне›».
[28] Хӧдан Мусар'а хәбәрда у гот:
[29] «Т'әви зар'ед Исраел хәбәр дә у бежә: ‹Әwе кӧ дийарийа хwәйә һәләqәтийе дьдә Хӧдан, гәрәке жь wе дийарийа һәләqәтийе п'ара Хӧдан дәрхә.
[30] Гәрәке әw пе дәсте хwә дийарийед Хӧданә шәwате бинә, бәз сәрсингва бинә, кӧ сәрсинг ль бәр Хӧдан бе һ'әжандьне чаwа дийарийа һ'әжандьне.
[31] К'аһин бәз ль сәр горигәһе бьшәwьтинә, ле сәрсинг Һарун у кӧр'ед wир'а бьминә.
[32] Жь дийарийед хwәйә һәләqәтийе, гәрәке пиле р'асте бьдьнә к'аһин, бона дийарийа бәрбьр'икьрьне.
[33] Жь кӧр'ед Һарун к'ижан кӧ хуна дийарийа һәләqәтийе у бәзе wе бьдә, пиле р'асте п'ара wи бә.
[34] Чьмки мьн жь дийарийед һәләqәтийа зар'ед Исраел сәрсинге дийарийа һ'әжандьне у пиле дийарийа бәрбьр'икьрьне һьлдан у данә Һаруне к'аһин у кӧр'ед wи, чаwа qәйдә-qануна һ'әта-һ'әтайе жь зар'ед Исраел›».
[35] Әва п'ара Һарун у кӧр'ед wи йә, жь дийарийед Хӧданә шәwате, wе р'ожа к'ьфшбуна wанә к'аһинтийеда бона Хӧдан.
[36] Әв п'ара кӧ р'ожа к'ьфшбуна wанда Хӧдан ә'мьр ль зар'ед Исраел кьр бьдьнә wан, әва бона ньсьлед wан qәйдә-qануна һ'әта-һ'әтайе йә.
[37] Әв ә qануна дийарийа т'әвайишәwате, дийарийа нани, дийарийа паqьжбуне, дийарийа жь бәрвадайине, дийарийа qәwин-qәдимийе у дийарийа һәләqәтийе,
[38] йа кӧ Хӧдан ль сәре ч'ийайе Синайе ә'мьр ль Муса кьр, wе р'оже гава бәр'ийа Синайеда т'әми ль зар'ед Исраел кьр, кӧ дийарийед хwә бьдьнә Хӧдан.