[1] Хӧдан готә Муса: «Т'әви к'аһинед, кӧр'ед Һарун хәбәр дә у бежә wан: ‹Бьра жь wан т'ӧ кәс мьрийе мьләте хwә нәк'әвә у хwә нәһ'әр'ьминә,
[2] пештьри нәфәре мала хwә, аwа готи де у баве хwә, кӧр' у qизед хwә у бьре хwә,
[3] ӧса жи хушка хwәйә нәмеркьрийә щәм хwә, әw дькарә бона wан ван к'әвә у хwә нә паqьж кә.
[4] Әw гәрә хwә нәһ'әр'ьминә, аwа готи дәсте хwә нәдә щьнйазе пьсмамтийа хwәйә алийе һ'ал-зәwащеда кӧ нәпаqьж дәре.
[5] К'аһин бьра п'ор'е сәре хwә бәләк-бәләки кӧр' нәкьн, сәре р'удана хwә нәбьр'ьн у ль сәр хwә дәхма че нәкьн.
[6] Гәрәке бона Хwәдейе хwә пироз бьн у наве Хwәдейе хwә беһӧрмәт нәкьн, чьмки к'аһин дийарийед Хӧданә шәwате, нане Хwәдейе хwә дьдьн, ләма жи әwана гәрәке пироз бьн.
[7] Әw гәрәке к'ӧлфәта qав йан бе намус нәстиньн, йан жи йа мербәр'дайи, чьмки әwана пирозе Хwәдейе хwә нә.
[8] Щьмә'т к'аһина пироз һ'әсаб кә, чьмки әw нане Хwәдейе wә дьдә, әw бона wә бьра пироз бә, чьмки әз пироз ьм, Хӧдане кӧ wә пироз дькә.
[9] Һәгәр qизәкә к'аһинәки qавийе бькә бьһ'әр'ьмә, әw баве хwә дьһ'әр'ьминә, гәрәке агьр бәрдьнә wе бьшәwьтиньн.
[10] Ле сәрәкк'аһине нава бьрайед хwәда, ль сәр сәре к'ижанида р'уне р'ункьрьне һатийә р'етьне у qәwин-qәдимкьрьне кӧ к'ьнщед пироз ль хwә кә, әw гәрәке п'ор'е хwә сәр хwәда нәйнә у к'ьнщед хwә нәqәлешә.
[11] Әw гәрәке незики т'ӧ мьрийи нәбә, һ'әта незики щьнйазе де у баве хwә жи нәбә, кӧ хwә нәһ'әр'ьминә.
[12] Әw гәрәке жь Пирозгәһе нәqәтә у Пирозгәһа Хwәдейе хwә нәһ'әр'ьминә, чьмки р'уне Хwәдейи бона бьжартьне ль сәр wи йә. Әз Хӧдан ьм.
[13] Әw гәрәке qизәкә бьк'ьр бьстинә.
[14] Жьнәбийе, мербәр'дайе йан йа бенамус йан qав нәстинә. Ле жь qәбила хwә qизәкә бьк'ьр бьстинә.
[15] Изьна wи т'ӧнә кӧ әw р'ьк'ьнйата хwә нава щьмә'та хwәда бьһ'әр'ьминә, чьмки әз Хӧдан ьм, йе кӧ wи пироз дькьм›».
[16] Хӧдан Мусар'а хәбәрда у гот:
[17] «Т'әви Һарун хәбәр дә у беже: ‹Жь р'ьк'ьнйата тә һәгәр кәсәк нава ньсьлед хwәда qӧсурәкә wи һәбә, бьра незик нәбә кӧ нане Хӧдане хwә бьдә.
[18] Әw кәсе кӧ qӧсура wи һәбә, һәгәр кор бә, йан бькӧлә, йан ә'блу, йан бещур'ә
[19] йан йе ньгшкәсти, йан дәстшкәсти,
[20] йан кузьк, йан бощи, йан ч'ә'вшелу, йан гӧр'и, йан р'иши, йан т'аqӧр'и бә.
[21] Жь р'ьк'ьнйата Һаруне к'аһин, qӧсура к'ижани кӧ һәбә, т'ӧ кәс незик нәбә кӧ дийарийед Хӧданә шәwате бьдә. Qӧсура wи кӧ һәйә бьра әw незик нәбә кӧ нане Хӧдане хwә бьдә.
[22] Нане Хwәдейе хwә әw дькарә жь тьште һәрә пироз у жь тьште пироз бьхwә.
[23] Ле т'әне незики п'әр'де нәбә у горигәһе нәк'әвә, qӧсура wи кӧ һәйә, әw гәрәке тьштед мьнә пироз нәһ'әр'ьминьн, чьмки әз Хӧдан ьм, йе кӧ wан пироз дькьм›».
[24] Муса аһа готә Һарун, кӧр'ед wи у һ'әму зар'ед Исраел.