[1] Хӧдан Муса у Һарунр'а хәбәрда у гот:
[2] «Һәгәр ч'әрме бәдәна мәрьвәки бьдә ль бәр гьлейа, йан гьр'а, йан р'ишийа у ль ч'әрме бәдәне бьбә мина п'ьзька к'оти , һьнге гәрәке wи бьбьнә щәм Һаруне к'аһин йан к'аһинәки жь кӧр'ед wи.
[3] К'аһин бьра дина хwә бьдә п'ьзька ч'әрме бәдәна wи, һәгәр р'әнге пьр'ч'а ль сәр п'ьзьке сьпи дькә у п'ьзька ч'әрме бәдәне к'ур хӧйа дькә, әва п'ьзька к'оти йә, к'аһин ве йәке бьбинә у wи мәрьви нәпаqьж ә'лам кә.
[4] Ле һәгәр р'ишийе ч'әрме бәдәна wи сьпи йә, ле ч'әрмда к'ур нәчуйә у пьр'ч' жи сьпи нәбуйә, һьнге бьра к'аһин һ'әфт р'ожа йе хwәйип'ьзьк башqә кә.
[5] У р'ожа һ'әфта к'аһин бьра дина хwә бьдә wи, һәгәр п'ьзьк мина хwә майә у ль сәр ч'әрм бәла нәбуйә, һьнге к'аһин бьра щара дӧда жи wи башqә кә.
[6] У р'ожа һ'әфта к'аһин бьра диса ле бьньһер'ә, һәгәр п'ьзьк к'әwйа йә у ль ч'әрм бәла нәбуйә, бьра к'аһин wи паqьж ә'лам кә, әва гьр' ә. Бьра әw мәрьв к'ьнще хwә бьшо у wе паqьж бә.
[7] Ле һәгәр бона паqьжбуне хwә нишани к'аһин кә у паше гьр' ль ч'әрм бәла бә, гәрәке әw диса хwә нишани к'аһин кә.
[8] К'аһин дина хwә бьде wәки гьр' ль ч'әрм бәла буйә, һьнге к'аһин диса wи нәпаqьж ә'лам кә, әw п'ьзька к'оти йә.
[9] Һәгәр ль сәр йәки п'ьзька к'оти һәбә, гәрәке wи бьбьнә щәм к'аһин.
[10] Бьра к'аһин дина хwә бьде, һәгәр гьлейа сәр ч'әрм сьпи йә у пьр'ч'а сәр жи сьпи буйә, гьледа жи гоште сахләм һәйә,
[11] әва к'отибуна кәвьн ә ль сәр ч'әрме бәдана wи майә, бьра к'аһин wи нәпаqьж ә'лам кә у wи башqә кә, чьмки әw нәпаqьж ә.
[12] У һәгәр к'отибун ль ч'әрм бәла буйә у т'әмамийа ч'әрме нәхwәш жь сери һ'әта ньга, аwа готи ль wан щийед кӧ ч'ә'ве к'аһин дьбинә к'отибуне һьлда йә,
[13] к'аһин гава бьбинә wәки к'отибуне тәмамийа бәдәна wи гьртийә, һьнге әw йе нәхwәш паqьж ә'лам кә, чьмки т'әмамийа хwәва сьпи буйә, әw паqьж ә.
[14] Ле гава сәр бәдәна wи гоште сахләм к'ьфш бә, әw нәпаqьж бә.
[15] К'аһин гоште сахләм кӧ бьбинә wи мәрьви нәпаqьж ә'лам кә. Гоште сахләм нәпаqьж ә, әw к'отибун ә.
[16] Ле һәгәр гоште сахләм диса бе гӧһар'тьне сьпи бә, һьнге әw мәрьв гәрәке бе щәм к'аһин.
[17] У к'аһин бьра дина хwә бьдә wи, һәгәр п'ьзька wи сьпи буйә, һьнге к'аһин бьра әwи хwәйип'ьзьк паqьж ә'лам кә, әw паqьж ә.
[18] Һәгәр сәр ч'әрме йәки бьдә дәр у п'ак бә,
[19] пәйр'а дәwса дәрбуне гьлейа сьпи, йан р'ишийа сорә-сьпи бьминә, гәрәке әw хwә нишани к'аһин кә.
[20] К'аһин кӧ дина хwә бьде, wәки р'иши ч'әрмда к'ур чуйә у пьр'ч'а сәр жи сьпи буйә, к'аһин wи нәпаqьж ә'лам кә. Әва п'ьзька к'оти йә жь дәрбуне бәла буйә.
[21] Ле һәгәр к'аһин дина хwә бьде wәки пьр'ч'а сәр нә сьпи йә у ч'әрмда жи к'ур нәчуйә ле qарийа йә, һьнге к'аһин бьра wи һ'әфт р'ожа башqә кә.
[22] У һәгәр әw р'иши ль ч'әрм бәла бә, һьнге бьра к'аһин нәпаqьжийа wи ә'лам кә, әва п'ьзька к'оти йә.
[23] Ле һәгәр р'иши щийе хwәда бьминә у бәла нәбә, әва дәхмә йә дайә дәр, к'аһин бьра wи паqьж ә'лам кә.
[24] Йан һәгәр ч'әрме бәдәна йәки бьшәwьтә у дәwса дәхма шәwате р'ишийа сорә-сьпи йан хӧр'у сьпи ле бьдә дәр,
[25] к'аһин бьра дина хwә бьде, һәгәр пьр'ч'а ль сәр р'ишийе р'әнге хwә гӧһастийә сьпи буйә у ч'әрмда жи к'ур чуйә, әва иди к'отибун ә жь шәwате пешда һатьйә. Бьра к'аһин wи нәпаqьж ә'лам кә, әва п'ьзька к'оти йә.
[26] Ле һәгәр к'аһин дина хwә бьде, wәки пьр'ч'а ль сәр р'ишийе сьпи нәбуйә у ч'әрмда к'ур нәчуйә, ле һьнәки qарийа йә, һьнге к'аһин wи һ'әфт р'ожа башqә кә.
[27] Р'ожа һ'әфта к'аһин дина хwә бьде, һәгәр әwа ль ч'әрм бәла буйә, һьнге к'аһин wи нәпаqьж ә'лам кә, әва п'ьзька к'оти йә.
[28] Ле һәгәр р'иши дь щийе хwәда майә у ль ч'әрм бәла нәбуйә, һьнәки qарийа йә, әва гьлейа шәwате йә. К'аһин бьра wи паqьж ә'лам кә, чьмки әва һәwа шәwате йә.
[29] Һәгәр п'ьзьк ль сәри йан чәна мерәки йан жьнәкеда дәре,
[30] бьра к'аһин дина хwә бьдә wе п'ьзьке, һәгәр әwа ч'әрмда к'ур к'ьфш дьбә у пьр'ч'а сәр жи зьрав у зәр ә, һьнге бьра к'аһин wан нәпаqьж ә'лам кә. Әва гәwрька к'отийе йә ль сери йан чәне дайә дәр.
[31] Ле һәгәр к'аһин дина хwә бьдә п'ьзька гәwрьке wәки әw ч'әрмда к'ур нәчуйә, ле пьр'ч'а р'әш жи ль сәр т'ӧнә, һьнге к'аһин бьра әwи кӧ п'ьзька гәwрьке ле дәрк'әтийә һ'әфт р'ожа башqә кә.
[32] Р'ожа һ'әфта бьра к'аһин дина хwә бьдә гәwрьке, һәгәр гәwрьк бәла нәбуйә у пьр'ч'а зәр сәр т'ӧнә, гәwрьк жи ч'әрмда к'ур нәчуйә,
[33] һьнге бьра әw мәрьва пьр'ч'а дора гәwрьке кӧр' кә, ле йа ль сәр гәwрьке кӧр' нәкә у к'аһин щара дӧда әви мәрьви һ'әфт р'ожа башqә кә.
[34] Р'ожа һ'әфта к'аһин дина хwә бьдә гәwрьке, һәгәр гәwрьк ль ч'әрм бәла нәбуйә у ч'әрмда жи к'ур нәчуйә, һьнге к'аһин бьра паqьжийа wи ә'лам кә, әw жи к'ьнщед хwә бьшо у паqьж бә.
[35] Ле һәгәр пәй паqьжбунер'а гәwрьк ль ч'әрме wи бәла бә,
[36] бьра к'аһин дина хwә бьде, һәгәр гәwрьк ль ч'әрм бәла буйә, һьнге к'аһин бьра иди пьр'ч'а зәр нәгәр'ә, әw нә паqьж ә.
[37] Ле бәле һәгәр гәwрьк мина хwә майә у пьр'ч'а р'әш ле дәрк'әтийә, кӧ ӧса йә гәwрьк qәнщ буйә, әw паqьж ә, к'аһин wи паqьж ә'лам кә.
[38] Ле һәгәр ль сәр ч'әрме мерәки йан жьнәке р'иши, аwа готи р'ишийед сьпи ле п'әйдә бьн,
[39] һьнге к'аһин бьра ле бьньһер'ә, һәгәр р'ишийед ль сәр ч'әрме бәдәна wан сьпич'олки нә, әw гьр' ә ль ч'әрм бәла буйә, әw паqьж ә.
[40] Һәгәр п'ор'е сәре йәки бьwарә, әва wарандьн ә, әw паqьж ә.
[41] Ле һәгәр п'ор'е сәре wи нә'тькеда бьwарә әва к'әчәлбун ә, әw паqьж ә.
[42] Ле һәгәр щийе wарйайи йан к'әчәл п'ьзькәкә п'исә сорә-сьпи һәбә, әва п'ьзька к'оти йә, щийе wарийайи йан к'әчәлда дайә дәр.
[43] Һьнге к'аһин бьра дина хwә бьде һәгәр п'ьзька щийе wарийайи у к'әчәлда һьнәки сор-сьпи йә у мина wе п'ьзька к'оти йә ль сәр ч'әрме бәдәне хӧйа дькә,
[44] әва мәрьва п'ьзька к'оти йә, нәпаqьж ә, к'аһин ә'сә нәпаqьжийа wи ә'лам кә, п'ьзька п'ис ль сәре wи дәрк'әтийә.
[45] Әwи хwәйип'ьзька к'оти гәрәке к'ьнщед wи п'ьзьни бьн, п'ор'е сери сәрда һати у дәве wи ньхамти бә: ‹Нә паqьж ьм! Нә паqьж ьм!› бькә гази.
[46] Һ'әта кӧ п'ьзьк сәр wи һәбә әw нәпаqьж бе һ'әсабе. Әw нә паqьж ә, әw т'әне гәрәке бьминә у щийе майина wи жь зоме дәр бә.
[47] Һәгәр к'әфьк ль сәр к'ьнщәке к'ьфш бә, ль сәр к'ьнща һьри йан к'ьнща к'ьтан,
[48] п'арч'ә йан тьштәки һунанди жь һьрийе йан к'ьтан чекьри, йан ль сәр ч'әрм, йан жи ль сәр тьштәки пе ч'әрм чекьри бә,
[49] йан һәгәр ләк'ә ль сәр к'ьнщ йан ч'әрм, йан ль сәр п'арч'ә йан ль сәр тьштәки һунанди, йан жи ль сәр тьштәки жь ч'әрм к'әск йан сор лехә, әва к'әфькибун ә, гәрәке нишани к'аһин кьн.
[50] К'аһин бьра дина хwә бьдә ләк'е у wи тьшти к'ижан кӧ жь к'әфькийе ләwьт'ийә һ'әфт р'ожа башqә кә.
[51] У р'ожа һ'әфта к'аһин бьра дина хwә бьдә wи тьште ләwьт'и, һәгәр ләк'ә ль wи к'ьнщи бәла буйә, һәгәр п'арч'ә бә, йан тьштәки һунанди, йан ч'әрм, йан жи тьштәки кӧ бь ч'әрм чекьри бә, кӧ ӧса йә әва к'әфькибуна жь һәвһьлдане йә, әв нәпаqьж ьн.
[52] Әw гәрәке wи к'ьнщи, йан п'арч'ә, йан тьштәки һунанди жь һьрийе йан к'ьтан чекьри, йан тьштәки кӧ жь ч'әрм чекьри бә, ль сәр к'ижани әва ләк'а һәбә бьшәwьтинә, чьмки әва к'әфькайа жь һәвһьлдане йә, гәрәке әw сәр агьр бе шәwьтандьне.
[53] Ле һәгәр к'аһин дина хwә бьде wәки к'әфьк ль wи к'ьнщи, йан п'арч'ә йан тьштәки һунанди, йан ль тьштәки бь ч'әрм чекьри бәла нәбуйә,
[54] һьнге к'аһин бьра ә'мьр кә, кӧ wи тьште ләwьт'и бьшон у һ'әфт р'ожа диса wи башqә хwәй кә.
[55] Гава к'аһин пәй шуштьна wи тьштир'а дина хwә бьде, һәгәр к'әфьке р'әнге хwә нәгӧһастийә у әw к'әфьк бәла жи нәбуйә, әw диса нәпаqьж ә, wи тьшти сәр егьр бьшәwьтини, әва к'әфькибун ә хwә авитийә р'у йан жи р'уйе важи.
[56] У һәгәр к'аһин дина хwә бьде, wәки пәй шуштьнер'а ләк'ә qарийа йә, һьнге к'аһин бьра wи щийи жь wи к'ьнщи, йан жь wи ч'әрми, йан жь wи п'арч'әйи, йан жь wи тьште һунанди бьqәлешә.
[57] Ле wәки әw диса ль сәр wи к'ьнщи, йан п'арч'әйи, йан тьштәки һунанди, йан тьштәки жь ч'әрм чекьри к'ьфш бә, әва к'әфька жь һәвһьлдане йә, wи тьште ләк'ә сәр бьшәwьтинә.
[58] Ле һәгәр әw к'ьнщ, йан п'арч'ә, йан тьштәки һунанди, йан тьштәки жь ч'әрм чекьри пәй шуштьнер'а ләк'ә же һәр'ә, бьра әw диса бе шуштьне у wе паqьж бә».
[59] Әв ә qануна бона к'әфькибуне, йа кӧ ль сәр к'ьнща һьри йан к'ьтани, йан п'арч'ә, йан тьштәки һунанди, йан ль сәр һәр тьште жь ч'әрм чекьри дәрте, кӧ әw паqьж йан нәпаqьж бенә ә'лам кьрьне.