[1] Daꞌa kaꞌam padeheng maglasa-ilasa peggeꞌ kaꞌam kēmon kuweꞌ magpungtinaꞌi sabab sandel kaꞌam pu Almasi.
[2] Essebun bi, bang niyaꞌ piyu si lumaꞌbi meꞌ aꞌa gaꞌi takilalebi, subey siye pagaddatanbi. Peggeꞌ niyaꞌ meꞌ aꞌa masaley, sakaliꞌ inaddatan weꞌ de meꞌ aꞌa matekka si lumaꞌden, gaꞌ kataꞌuhande weꞌ meꞌ malaꞌikat hatiꞌ siye miyaꞌan.
[3] Daꞌa kayipatanun bi meꞌ pagkasibi tindeg si Isa malaꞌi dem kalabusuhin. Tabanganun bi siye kuweꞌ laꞌi du kaꞌam isab dem kalabusu magtuhut duk siye. Essebun bi isab meꞌ bininasahin. Tabanganun bi siye kuweꞌ laꞌi du isab kaꞌam tumuhut si siye bininasa.
[4] Subey pahadjebi addat magkawinin, duk maglewlekebinihin subey teꞌed gaꞌi magjina duk dende seddili atawa lella seddili, saguwaꞌ subey siye tattap para si dangan. Asal legga Tuhanin meꞌ aꞌa magjinahin.
[5] Subey kaꞌam gaꞌi napsuhan si pilak saguwaꞌ ine-ine niyaꞌ si kaꞌam subey kaꞌam magsukul. Paꞌin Tuhanin hep, “Gaꞌi kaꞌam ambananku, gaꞌi kaꞌam pasagadanku.”
[6] Hangkan subey kite bi makatawakkal magpaꞌin, “Tuhanin manabangan akuhin. Gaꞌi ku tinalew ine-ine tahinang aꞌahin si aku.”
[7] Essebun bi isab meꞌ nakuraꞌ bakas mangusihatan kaꞌam lapal Tuhanin. Essebun bi meꞌ boꞌohande mahāpin tiggelande maꞌellumin sampay matey siye, duk lekkatun bi sandelde pu si Isa Almasihin.
[8] Isa Almasi gaꞌi teꞌed pinda. Amban tagnaꞌ sampay kuweꞌitu duk sampay salama-lama gaꞌi iye pinda.
[9] Daꞌa kaꞌam ngatu nuhut meꞌ bayuꞌ-bayuꞌan toloꞌ seddili amban toloꞌ Almasihin, supaya kaꞌam gaꞌi sumapeꞌ amban lān mabennalin. Iye asal makapabasag sandelbi si Tuhanin, gaꞌ niyaꞌ seddili amban lasa duk aseꞌ Tuhan si kaꞌamin, dumaꞌin weꞌ panuhutbi meꞌ saraꞌ pasal kapamanganin. Peggeꞌ meꞌ manuhut saraꞌ inin, gaꞌ du tatabang weꞌ saraꞌin.
[10] Kite bi meꞌ masandel pu Almasihin, niyaꞌ kulubante bi saguwaꞌ meꞌ imam Yahudi si langgalin gaꞌ niyaꞌ kapatutde manganne.
[11] Bang meꞌ Yahudihin magkuluban pamuwas duseden, boꞌo imam nakuraꞌin lahaꞌ hayep pagkulubanin pī diyalem Bilik Tamanan Masutsihin. Saguwaꞌ baran hayepin binoꞌo pī ineggas si luwasan kampu palaꞌihanden.
[12] Kuweꞌ miyaꞌan du isab maꞌumantag pu Almasihin. Matey isab iye si luwasan puweblohin supaya tasutsine duk lahaꞌne meꞌ aꞌahin amban duseden.
[13] Hangkan subey kite bi pī nuhut iye si luwasan kampu meꞌ Yahudihin, duk subey kite bi matuk si kaꞌiyaꞌannen.
[14] Peggeꞌ gaꞌ niyaꞌ puweblo patetegante bi tuꞌu si dunya inin. Saguwaꞌ iye inase-aseten bi puweblo laꞌi si surgaꞌ.
[15] Hangkan hep subey Tuhanin luwal pudjite bi pinalabey amban Almasi, duk subey lapalante bi pagsukulte bi si iyehin, duk bennalante weꞌ iye Panuhutanten bi. Iyan dalil kulubante si iye.
[16] Daꞌa teꞌed kayipatanun bi maghinang hāp si saweꞌbi duk magtabang-tinabang peggeꞌ inin dalil meꞌ kuluban makasulut Tuhanin.
[17] Tuhutun bi teꞌed meꞌ panoloꞌ meꞌ nakuraꞌbi masandel pu Almasihin duk hinangun bi meꞌ pangandaꞌakanden. Siye iyan meꞌ mamanteyan kaꞌamin supaya kaꞌam gaꞌi sumapeꞌ amban lān tudju Tuhanin. Hangkan inin hinangde peggeꞌ niyaꞌ waktu paharap du siye si Tuhan magaka bang saꞌingge pangahatulde kaꞌamin. Bang tuhutbi pangandaꞌakanden, sinna siye noloꞌan kaꞌam. Saguwaꞌ bang gaꞌi siye tuhutbi, suse siye duk gaꞌ niyaꞌ kaꞌujudan panabangde kaꞌamin.
[18] Daꞌa kaꞌam pahali māku-māku si Tuhan para si kami. Kataꞌuhan kami weꞌ gaꞌ niyaꞌ kahanggawan dem pikilan kamihin peggeꞌ iye hadja luwal kinabayaꞌan kami hininangin meꞌ mahāp duk mabentelin.
[19] Duk ngajunjung ku teꞌed si kaꞌam, māku-māku teꞌed kaꞌam si Tuhan karayaw tabalik du ku si kaꞌam mura.
[20] Tuhanin pinakellum weꞌ ne si Isa, Panuhutanten bi, amban kamateynen. Kuweꞌ iye dalil pastul mabalakatanin duk kite bi dalil meꞌ bili-bili inipatnen. Sabab lahaꞌne mabuꞌus kamateynen, bugtuꞌ weꞌ gaꞌi teꞌed pinda janjiꞌ Tuhanin sampay salama-lama.
[21] Tuhanin, iye mangurungan kite bi kasanyanganin, karayaw urunganne kaꞌam kēmon bayuꞌ-bayuꞌan mahāpin; inin makatabangan kaꞌamin supaya tatuhutbi kinabayaꞌan Tuhanin. Duk karayaw isab pinalabey amban Isa Almasi tabanganne kite bi ngahinang meꞌ hinangan makasulut iyehin. Karayaw Almasi tapudji salama-lama. Amin.
[22] Junjungte kaꞌam, meꞌ kapungtinaꞌihanku, pakalehun bi teꞌed usihatku dem sulat inin peggeꞌ gaꞌi du isab tahaꞌ teꞌed sulatku inin.
[23] Batang isab kaꞌam akahanku weꞌ pungtinaꞌiten bi si Timoteo lumuwas ne amban kalabusu. Bang du iye mura tapitu, boꞌoku saꞌ iye bang ku piyu nindew kaꞌam.
[24] Akahanun bi aku kēmon meꞌ nakuraꞌbi dem langgalin duk kēmon isab meꞌ aꞌa manuhut Tuhan maluꞌulu, weꞌ taꞌesseb siye weꞌ ku. Meꞌ pungtinaꞌite bi amban lahat Italiyahin maboꞌo bissā piyu si kaꞌam weꞌ taꞌessebde kaꞌam.
[25] Karayaw kaꞌam kēmon ipat Tuhanin. Wassalam