[1] Sulat inin amban si Yakub, dambuwaꞌ daraꞌakan Tuhanin duk daraꞌakan Isa Almasi, Panuhutanten bi. Essebte kaꞌam kēmon meꞌ pagkasiku Yahudi masandel pu si Isa Almasi makanat-kanat si tibuꞌukan dunyahin.
[2] Meꞌ kapungtinaꞌihanku, bang kaꞌam katekkanhan bayuꞌ-bayuꞌan kasusehan subey kaꞌam kēgan.
[3] Peggeꞌ kataꞌuhanbi bang sinuleyan sandelbin bu tasandalbi meꞌ kasusehanin pasōng pe kaꞌam taꞌu magsandal.
[4] Subey teꞌed kaꞌam taꞌu magsandal kasusehan supaya ngabasag sandelbi si Tuhanin duk addatbin asal hāp ne hadja, gaꞌ ne niyaꞌ salaꞌbi.
[5] Saguwaꞌ bang niyaꞌ kaꞌam kulang kataꞌunen, subey iye māku-māku si Tuhan duk urungan Tuhanin du iye kataꞌu. Peggeꞌ Tuhanin sayuꞌ duk gaꞌi iye ngamā bang kite māku. Urunganne sasuku mamāku si iyehin.
[6] Saguwaꞌ bang māku-māku kaꞌam si iye subey kaꞌam sandel si iye. Daꞌa kaꞌam duwe-duwehan. Peggeꞌ aꞌa mamāku maduwe-duwehanin kuweꞌ goyak magpī-pitu bang tihup baliyu.
[7] Daꞌa teꞌed aꞌa miyaꞌan magpikil weꞌ makasangka iye ine-ine amban Tuhanin.
[8] Peggeꞌ bang duwe-duwe pikilannen, ine-ine hinangne gaꞌi hantap pamikilnen.
[9] Bang saꞌupama niyaꞌ pagkasite bi sandel pu si Isa Almasi bu miskin iye, subey iye kēgan peggeꞌ pinahadje du iye weꞌ Tuhanin.
[10] Bang niyaꞌ isab pagkasite bi sandel pu si Isa Almasi bu dayahan iye, subey isab iye kēgan bang padiyawaꞌ Tuhanin iye. Peggeꞌ aꞌa madayahanin palabey du hadja amban dunya inin kuweꞌ dalil sumping sabet.
[11] Bang pasilak ellewin bu panas teꞌed, magtawus lanes sabetin duk pagpag sumpingnen duk gaꞌ ne niyaꞌ mannisne. Kuweꞌ miyaꞌan du isab aꞌa dayahanin. Sābune magusahahin matey du iye duk gaꞌi taboꞌone dayanen.
[12] Kēgan aꞌahin bang pateteg iye si Tuhan bisan iye magsandal kasusehan. Peggeꞌ bang gaꞌi usaꞌ sandelnen bisan dem kasusehan, inurungan du iye umul salama-lama si surgaꞌ. Iye inin tumbas pananggup Tuhanin si meꞌ malasa si iyehin.
[13] Bang kaꞌam sinassat maghinang laꞌat, daꞌa paꞌinun bi weꞌ Tuhanin manassat kaꞌamin. Peggeꞌ Tuhanin gaꞌi teꞌed tasassat duk gaꞌi teꞌed iye nassat.
[14] Saguwaꞌ iye mamoꞌo aꞌahin maghinang malaꞌatin napsunen du. Napsunen kuweꞌ mangati-ngati iyehin duk ujud tahinangne.
[15] Napsunen ngurung pikilan si iye maghinang laꞌat. Sangat-sangat pikilne ujud laꞌusanne ne duk tahinangne ne malaꞌat miyaꞌan. Manjari bang aꞌahin tagam ne maghinang laꞌat kaꞌujudannen pinadem narkaꞌ iye.
[16] Hangkan meꞌ kapungtinaꞌihanku kinalasahankun, salaꞌ teꞌed kaꞌam bang paꞌinbi weꞌ Tuhanin manassat kaꞌamin.
[17] Saguwaꞌ kēmon bayuꞌ-bayuꞌan mahāpin duk manggaꞌ niyaꞌ sallaꞌ-sallaꞌnen pangurung si kite amban surgaꞌ, amban Tuhanin. Tuhanin bakas magpapanjari kēmon madantaꞌ diyataꞌ langitin. Kēmon madantaꞌ diyataꞌ langitin pinda du sahayanen saguwaꞌ Tuhanin gaꞌi teꞌed pinda.
[18] Amban bayaꞌne hinangne kite bi meꞌ anakne peggeꞌ kahagadte bi lapalne mabennalin. Duk hangkan hinangne kite bi meꞌ anakne supaya kite bi pinahadje amban kēmon bakas pinapanjarinen.
[19] Meꞌ kapungtinaꞌihanku kinalasahankun, essebun bi inin, subey kite bi kēmon pakale pahāp-hāp duk gaꞌi magdayiꞌ-dayiꞌ missā. Subey kite bi gaꞌi mura-mura astel.
[20] Peggeꞌ bang astel aꞌahin gaꞌi tahinangne meꞌ hinangan mabentel kinabayaꞌan Tuhanin.
[21] Hangkan hep ānanun bi kēmon makalemmiꞌ ateybin duk lebbahanun bi kēmon meꞌ hinanganbi malaꞌatin. Padiyawaꞌun bi ateybin si Tuhan duk tayimaꞌun bi lapalne pinapiyune dem ateybin. Peggeꞌ lapal Tuhanin hep makatimbul kaꞌamin.
[22] Daꞌa hadja pakalehun bi lapal Tuhanin saguwaꞌ hinangun bi pangandaꞌakannen. Peggeꞌ bang pakalebi hadja bu gaꞌi hinangbi, akkalanbi hadja dibin.
[23] Peggeꞌ bang aꞌahin pakalene hadja lapal Tuhanin bu gaꞌi tuhutne pinaꞌin lapalin, kuweꞌ iye aꞌa mayaman luwene si sāmin.
[24] Pagubus payamanne luwenen tahalaꞌ ne iye duk magtawus takayipatne bang saꞌingge bantuknen.
[25] Saguwaꞌ bang aꞌahin pakalene teꞌed pahantap saraꞌ Tuhan manggaꞌ niyaꞌ sallaꞌ-sallaꞌnen duk makaluhaya aꞌahin, duk bang gaꞌi iye jumuꞌ pakale, duk bang asal gaꞌi takayipatne bakas takalenen saguwaꞌ hinangne du pinaꞌin saraꞌ miyaꞌan, inurungan du iye kahāpan weꞌ Tuhanin bisan ine-ine hinangne.
[26] Bang niyaꞌ aꞌa paꞌinne weꞌ be-āgama iye saguwaꞌ gaꞌi tapagesne dellaꞌnen missā laꞌatan, aꞌa miyaꞌan akkalanne hadja dinen. Gaꞌ niyaꞌ kagunahan pagāgamanen.
[27] Bang si Samate bi Tuhanin, pagāgama mabennalin duk pagāgama manggaꞌ niyaꞌ sallaꞌnen sa inin: subey tabangte meꞌ iluꞌ-iluꞌin duk meꞌ dende baluhin bang siye dem kasigpitan. Duk subey isab kite gaꞌi katimboꞌohan weꞌ meꞌ addat malaꞌat matuꞌu si dunya inin.