[1] Na, kuweꞌitu, kaꞌam meꞌ madayahanin, pakale kaꞌam si aku. Subey kaꞌam magtangis duk magmatey peggeꞌ sōng kaꞌam katekkahan kasusehan.
[2] Magkaꞌat ne meꞌ alataꞌbin. Meꞌ semmekbi mahāpin ubus ne kakan ibas-ibas.
[3] Meꞌ bulawanbin duk pilakbin nawasaꞌ ne si pangennaꞌan. Duk meꞌ alataꞌbi nawasaꞌ iyan tandaꞌ weꞌ ennaꞌbi hadja iyan para si dibi, duk iyan ujud mamangan isibin kuweꞌ ebbut. Ekka ne alataꞌ tatipunbi si meꞌ ellew kuweꞌitu inin bu sōng kiyamat ne.
[4] Kaꞌam, meꞌ aꞌa madayahanin, gaꞌ bayedanbi tangdan meꞌ aꞌa maghinang si tanaꞌbin. Pakalehun bi pamuhunden. Meꞌ aꞌa dinaꞌakbi magani meꞌ tanaꞌbin muhun teꞌed duk takale siye weꞌ Tuhan Mabalakatanin.
[5] Kaꞌam meꞌ madayahanin, iye hadja tapikilbin maghāp parasahan duk magadjak. Kuweꞌ kaꞌam sapiꞌ magpalemmek bu gaꞌ kataꞌuhanne weꞌ sōng sinumbaliꞌ.
[6] Hininangan weꞌ bi duse aꞌa manggaꞌ niyaꞌ dusenen duk sampay pinapatey weꞌ bi. Gaꞌ siye bisan naggaꞌ kaꞌam.
[7] Manjari, meꞌ kapungtinaꞌihanku, tatasanun bi ine-ine tekka si kaꞌam samantaꞌan gaꞌ pe pitu balik Panuhutanten bi Isa Almasi. Payamanun bi aꞌa magtanaꞌin. Tatas iye ngagadan jari tanaꞌnen peggeꞌ asal mahalgaꞌ inin si iye. Gaꞌi iye jumuꞌ saguwaꞌ tatas iye ngagadan katekka ulanin, ulan puwas mageddekin duk ulan magpatahak paleyin.
[8] Damikkiyan kaꞌam isab, subey kaꞌam gaꞌi jumuꞌ ngagad. Patetegun bi ateybin peggeꞌ tapit ne waktu papitu Panuhutanten bi Isa Almasi.
[9] Meꞌ kapungtinaꞌihanku, daꞌa kaꞌam magpuggut-pinuggut duk kaꞌam gaꞌi laboꞌan Tuhanin hukuman. Sōng tekka ne mangahukumin, kuweꞌ luꞌu ne iye si behe gawang.
[10] Meꞌ kapungtinaꞌihanku, pikilun bi meꞌ nabi awwalley. Siye dinaꞌak Tuhan magpalataꞌ bissānen. Mintang kaꞌam si siye. Bisan siye dem kabinasahan matuyuꞌ siye magsandal.
[11] Esseb-essebun bi inin, kimmatante bi kēgan meꞌ aꞌa makatatas magsandalin. Bakas takalebi sabab si Ayyub. Tatas teꞌed iye dem kasusehan. Kataꞌuhanbi du weꞌ ujudnen asal hāp panumbas Tuhan iyehin. Peggeꞌ Tuhanin asal maꞌaseꞌ manamal duk malasa teꞌed iye.
[12] Meꞌ kapungtinaꞌihanku, daꞌakanku inin langkew amban kēmon: daꞌa teꞌed kaꞌam napa. Daꞌa kaꞌam napa nabbut surgaꞌ atawa dunya atawa ine-ine. Magaweꞌ kaꞌam bang asal aweꞌ, duk maggaꞌi kaꞌam bang asal gaꞌi supaya kaꞌam gaꞌi ilaboꞌan hukuman weꞌ Tuhanin.
[13] Bang niyaꞌ aꞌa luꞌu si kaꞌam katekkahan kasusehan, subey iye māku tabang si Tuhan. Bang niyaꞌ kēgan subey iye ngalang meꞌ kalangan mudji Tuhanin.
[14] Bang niyaꞌ luꞌu si kaꞌam saki, subey daꞌakne ineddoꞌ meꞌ bahiꞌ magnakuraꞌ si meꞌ masandel pu si Isa Almasihin. Duk meꞌ bahiꞌ miyaꞌan subey māku-māku si Tuhan laꞌi si bihing aꞌa masakihin. Duk subey iye susutande kuweꞌahat isellan sābude māku-māku duk nabbut ēn Panuhutanten bi.
[15] Manjari, bang ne siye māku si Tuhan bu ne siye sandel weꞌ pakawuliꞌne du masakihin, asal kawuliꞌan aꞌa masakihin. Pakoleꞌ Panuhutanin du iye. Duk bang niyaꞌ dusene, inampun du iye.
[16] Manjari, magbennal kaꞌam meꞌ dusebin si meꞌ pagkasibi masandel pu si Isa Almasihin, duk māku-māku kaꞌam si Tuhan dangan para si dangan, supaya kaꞌam kawuliꞌan. Aꞌa mabentelin, bang māku-māku si Tuhan ateynen dambūs-būs teꞌed, taga balakat pamākunen.
[17] Si Nabi Eliyas manusiyaꞌ du hadja kuweꞌ kitehin bi. Awwalley māku-māku iye si Tuhan dambūs-būs teꞌed ateynen weꞌ subey gaꞌi ulan duk asal gaꞌ teꞌed ulan-ulan dem tellun tahun duk tengaꞌ.
[18] Pagubus miyaꞌan māku-māku isab iye weꞌ subey ulan ne. Manjari magtawus ulan landes manamal, duk tomoꞌ ne balik meꞌ jambanganin.
[19] Manjari, meꞌ kapungtinaꞌihanku, esseb-essebun bi inin: bang niyaꞌ luꞌu si kaꞌam gaꞌi ne nuhut toloꞌ mabennalin bu dambuwaꞌ kaꞌam makaboꞌo iye balik nuhut toloꞌ mabennalin, hāp.
[20] Subey teꞌed kataꞌuhanbi weꞌ sasuku ngahumatan aꞌa dusehanin supaya lebbahanne hinanganne masalaꞌin, asal timbul weꞌ ne niyawa aꞌa dusehan miyaꞌan duk gaꞌi tapī si narkaꞌ, duk dusene maꞌekkahin taꞌampun ne. Wassalam