[1] Ine jān pagsaggaꞌanbi duk pagsasaꞌanbi diyalemanbi lu? Jānnen meꞌ napsubin magatuhan dem ateybi.
[2] Niyaꞌ kabayaꞌanbi saguwaꞌ gaꞌi taꞌeddoꞌbi hangkan mapatey kaꞌam. Niyaꞌ pagnapsuhanbi saguwaꞌ gaꞌi tepe si kaꞌam, hangkan magsasaꞌ kaꞌam duk magbonoꞌ. Saguwaꞌ hangkan gaꞌ si kaꞌam, peggeꞌ gaꞌi kaꞌam māku si Tuhan.
[3] Duk bisan kaꞌam māku, gaꞌi kaꞌam inurungan peggeꞌ gaꞌi tewwaꞌ jānnen hangkan kaꞌam māku-māku. Māku kaꞌam supaya hadja kaduhulanbi napsubin.
[4] Gaꞌi kaꞌam kapangandelan! Gaꞌi ke kataꞌuhanbi weꞌ bang kaꞌam sinna si meꞌ bayuꞌ-bayuꞌan malaꞌat dem dunya inin, bantahanbi ne Tuhanin? Peggeꞌ sasuku sinna si meꞌ hinangan malaꞌat dem dunya inin, bantahanne ne Tuhanin.
[5] Kannalbi hatu weꞌ gaꞌi bennal bissā Tuhan tasulat dem kitabin. Paꞌin kitabin weꞌ pikilan pinatennaꞌ weꞌ Tuhanin dem baranten bi basag magnapsu.
[6] Saguwaꞌ tabang Tuhan si kitehin bi basag pe amban napsu mamoꞌo kitehin bi. Paꞌin kitabin hep, “Tuhanin, kuntarahanne meꞌ malangkew ateynen saguwaꞌ kaꞌaseꞌanne meꞌ madiyawaꞌ ateynen.”
[7] Hangkan paglillaꞌun bi dibin si Tuhan duk magpadiyawaꞌ kaꞌam si iye. Tuwasanun bi nakuraꞌ seyitanin. Bang iye tuwasanbi, lahi du iye amban kaꞌam.
[8] Patapit kaꞌam si Tuhan duk Tuhanin patapit du isab si kaꞌam. Kaꞌam meꞌ madusehanin, lebbahanun bi meꞌ hinanganbi magdusehin. Kaꞌam isab meꞌ maduwe-duwehan pikilannen, padambūs-būsun bi ne ateybin si Tuhan.
[9] Pabuꞌusun bi boheꞌ matabin sabab hinanganbi malaꞌatin. Magdukka kaꞌam duk magtangis kaꞌam sabab dusebin. Subey pagadjak-adjakbin gantiꞌanbi duk kasusehan.
[10] Padiyawaꞌun bi ateybin si Tuhan duk palangkewne du kaꞌam.
[11] Meꞌ kapungtinaꞌihanku, daꞌa kaꞌam missā-missāhan saweꞌbi. Peggeꞌ sasuku missā-missāhan saweꞌnen duk paꞌinne weꞌ salaꞌ saweꞌnen, kuweꞌ du iye missā-missāhan saraꞌ Tuhanin duk paꞌinne weꞌ salaꞌ. Bang paꞌinbi weꞌ salaꞌ saraꞌ Tuhanin, hātinen dumaꞌin ne kaꞌam manuhut saraꞌin, saguwaꞌ kaꞌam ne subey tinuhutin peggeꞌ kaꞌam ne hukumin.
[12] Tuhanin du mangurung saraꞌin, gaꞌ niyaꞌ seddili, duk iye mangahukumin. Iye hadja dendangan makatimbulin duk makapagkaꞌatin. Hangkan gaꞌ niyaꞌ kapatutte magpaꞌin weꞌ salaꞌ saweꞌten.
[13] Pakale kaꞌam si aku, kaꞌam meꞌ magpaꞌinin weꞌ sumu atawa sumudde hap pī kaꞌam si lahat seddili duk patennaꞌ kaꞌam laꞌi dan tahun maglitu supaya kaꞌam nguntung pilak ekka.
[14] Bu gaꞌi kataꞌuhanbi bang ine maꞌumantag si kaꞌam sumuhin. Umulbi si dunya inin dalil gabun du hadja. Takite daddaliꞌ ubus bu lanyap ne.
[15] Hangkan bissābin subey kuweꞌ inin, “Bang amban bayaꞌ Tuhan du, ellum pe kite duk hinangte bi inin atawa miyaꞌan.”
[16] Saguwaꞌ kaꞌam, abbuhan kaꞌam duk magbantu kaꞌam. Laꞌat du kēmon magabbu kuweꞌ iyanin.
[17] Manjari, sasuku mangataꞌuhan mahāpin bu gaꞌi hinangne, magduse ne iye.