[1] Meꞌ kapungtinaꞌihanku, subey kulang hadja kaꞌam mangapas magguruhin. Peggeꞌ kataꞌuhanbi weꞌ kite bi meꞌ guruhin, bang sumalaꞌ kite, hadje hukuman si kitehin bi amban meꞌ dumaꞌin guruhin.
[2] Kēmon kite bi manusiyaꞌin daran salaꞌ. Bang niyaꞌ aꞌa gaꞌ bakas salaꞌ si bissāne, aꞌa miyaꞌan gaꞌ niyaꞌ sallaꞌ-sallaꞌ addatnen duk taꞌu iye gaꞌi ngūtan kinabayaꞌan barannen.
[3] Dalilnen kakkang kuraꞌin. Papīte kakkangin dem behe kuraꞌin supaya iye nuhut kinabayaꞌanten duk taboꞌote iye tungan-tungan kabayaꞌante.
[4] Dalilnen isab bansān kappalin. Bisan hadje baran kappalin duk bisan basag baliyu manihup iyehin, bansān dikiꞌ du hadja mamatudju kappalin tungan-tungan kabayaꞌan aꞌa mangantanan manabelahin.
[5] Kuweꞌ miyaꞌan isab dellaꞌ aꞌahin. Bisan dikiꞌ dellaꞌin makapagbantu iye weꞌ ekka manamal tahinangne. Dellaꞌin dalil ebbut. Pikilun bi. Bisan dikiꞌ kayat ebbutin, makaꞌeggas gulangan luha.
[6] Dellaꞌ aꞌahin kuweꞌ ebbut hep makapagkaꞌat. Dellaꞌte inin poꞌon kēmon bayuꞌ-bayuꞌan laꞌat. Da bayuꞌ inin tuꞌu si barante, bang missā laꞌat ne makapagkaꞌat pikilan aꞌahin. Kemuwe dikiꞌ kite sampay ellew kamateyten masi dellaꞌten mamoꞌo laꞌat si kitehin. Kuweꞌ ebbut inin amban dem narkaꞌ.
[7] Kēmon bayuꞌ-bayuꞌan hayep duk manuk-manuk duk kenna duk sawe tapagbayaꞌan duk pagbayaꞌan ne weꞌ manusiyaꞌ.
[8] Saguwaꞌ bang dellaꞌin, gaꞌ niyaꞌ makapagbayaꞌan iye. Dellaꞌin laꞌatan duk gaꞌi tumennaꞌ, kuweꞌ pennoꞌ weꞌ laksun makamatey.
[9] Dellaꞌten pamudjite Samate bi Tuhanin, iye Panuhutanten bi. Duk dellaꞌten panuknaꞌte isab pagkasite manusiyaꞌ pinapanjari weꞌ Tuhanin kuweꞌ bantuknen.
[10] Hātinen, amban dambuwaꞌ behe du hadja paguwaꞌan meꞌ bissā pamudji duk panuknaꞌten. Meꞌ kapungtinaꞌihanku, daꞌa kite sa īꞌ.
[11] Nubud ke boheꞌ matebbelin duk boheꞌ mahāpin magsumbayaꞌ amban dambuwaꞌ tuburan? Asal gaꞌi.
[12] Meꞌ kapungtinaꞌihanku, poꞌon mampallamin buwaꞌ ke biyabas? Duk bāhanin, buwaꞌ ke mampallam? Gaꞌi. Damikkiyan gaꞌi kew makaꞌinduk boheꞌ hāp amban dem kupung pennoꞌ weꞌ boheꞌ tebbel. Damikkiyan kite bi isab subey bissāten bi hāp hadja, gaꞌi ilamudan bissā laꞌat.
[13] Bang niyaꞌ luꞌu si kaꞌam aꞌa lalem pikilannen duk makahāti teꞌed, subey pakitehanne kataꞌunen si meꞌ hinangan hāp. Duk subey diyawaꞌ ateynen peggeꞌ kuweꞌ iyan aꞌa mabennal malalem pikilannen.
[14] Saguwaꞌ bang kaꞌam ngandiyawaꞌan saweꞌbi, supaya tapalangkewbi dibin duk bang iye hadja tapikilbin dibin bu gaꞌi tapikilbi saweꞌbin, na, daꞌa teꞌed kaꞌam magabbu weꞌ lalem pikilanbin. Magdustaꞌ hadja kaꞌam duk gaꞌi tuhutbi toloꞌ mabennalin.
[15] Dumaꞌin sa īꞌ kataꞌu amban Tuhanin. Miyaꞌan kataꞌu amban dunya hadja, amban pikilan manusiyaꞌ duk amban seyitan.
[16] Peggeꞌ antag-antag kaniyaꞌan meꞌ aꞌa ngandiyawaꞌan saweꞌne supaya tapahadjene dinen, duk dinen hadja tapikilnen, na, luꞌu kitebi isab meꞌ magsasaꞌin duk kēmon bayuꞌ-bayuꞌan malaꞌatin.
[17] Saguwaꞌ aꞌa taga kataꞌu amban Tuhanin, kaꞌissaꞌ, gaꞌ niyaꞌ laꞌat-laꞌatne. Kaduwe, gaꞌi iye pananasaꞌ duk mura iye binoꞌo magsulut. Gaꞌi tuwas kōknen. Maꞌaseꞌ iye duk maghinangan hāp iye si pagkasinen. Gaꞌi pagbiddaꞌne meꞌ aꞌahin duk dumaꞌin duwe dellaꞌnen.
[18] Sasuku aꞌa magpahāp si saweꞌnen, dalilnen kuweꞌ aꞌa magtanem. Iye dalil tinanemnen meꞌ hinangan makasulut pagkasinen. Gaꞌi iye nasaꞌ duk hāp pagboꞌone si saweꞌnen. Jari tinanemne miyaꞌan hinangan bentel.