[1] Meꞌ kapungtinaꞌihanku, bang asal sandel kaꞌam pu Isa Almasi, Panuhutante bi pinudjihin, subey gaꞌi pagbiddaꞌbi aꞌahin.
[2] Bang upama, niyaꞌ duwangan aꞌa paꞌasek piyu dem pagtipunanbi, dambuwaꞌin dayahan, magsinsim bulawan duk magsemmek hāp, bu dambuwaꞌin miskin duk andang semmeknen.
[3] Bang pasōng pagaddatanbi aꞌa mahāp semmeknen amban manggaꞌi mahāp semmeknen duk paꞌinbi si iye, “Tuwan, ningkoloꞌ kew si paningkoloꞌan mahāp inin,” saguwaꞌ si aꞌa mamiskinin paꞌinbi, “Luꞌu kew hadja nengge si antag iyan,” atawa, “Ningkoloꞌ kew tuꞌu si kāpan si bihing bettisku,”
[4] na bang kuweꞌ miyaꞌan hinanganbin, dumaꞌin ke tapikilbin weꞌ langkew dambuwaꞌin duk diyawaꞌ dambuwaꞌin? Laꞌat dem pikilanbin hangkan siye pinagbiddaꞌ weꞌ bi.
[5] Pakale kaꞌam meꞌ kapungtinaꞌihanku kinalasahankun. Meꞌ mamiskin si dunya inin bisan gaꞌ niyaꞌ alataꞌde, asal pineneꞌ siye weꞌ Tuhanin supaya basag sandelde si iyehin duk supaya sumakup siye dem pagbayaꞌanne, sa pananggupne si meꞌ mamalasa si iyehin.
[6] Saguwaꞌ diniyawaꞌan weꞌ bi aꞌa mamiskinin. Sine teꞌ manigpitan kaꞌamin duk mangalalas kaꞌam pī si paghukumanin? Dumaꞌin ke meꞌ madayahanin?
[7] Meꞌ madayahanin du hep isab mamissā-missāhan Almasihin bu sukuꞌ si iye hep kaꞌam.
[8] Hāp hinanganbin bang sabennal tuhutbi saraꞌ Tuhan malangkewin. Tasulat hep saraꞌ inin dem kitab, pinaꞌin, “Subey kalasahannu pagkasinun kuweꞌ pangalasanu dinun.”
[9] Saguwaꞌ bang pagbiddaꞌbi aꞌahin sabab bantuknen, kapagduse ne kaꞌam duk tewwaꞌ hukuman kaꞌam peggeꞌ langgalanbi saraꞌin.
[10] Sasuku mangalanggalan dambuwaꞌ hadja pangandaꞌakan saraꞌin bisan ne tuhutne sinduwehin, talanggalanne ne kēmon saraꞌin.
[11] Peggeꞌ paꞌin Tuhanin dem saraꞌnen, “Daꞌa kew magjina,” duk paꞌinne du isab, “Daꞌa kew mapatey.” Bisan kaꞌam gaꞌi magjina saguwaꞌ bang mapatey kaꞌam, masi du talanggalanbi saraꞌ Tuhanin.
[12] Hukum Tuhanin kite bi si pasōngan bang tinuhut du ke weꞌ te bi saraꞌne makaluhaya kitehin bi. Hangkan pahatul-hatul kaꞌam ine-ine bissābi atawa hinangbi.
[13] Peggeꞌ si paghukum inin, aꞌa manggaꞌi mamaꞌaseꞌ si pagkasine manusiyaꞌin, gaꞌi isab iye kaꞌaseꞌan weꞌ Tuhanin. Saguwaꞌ mamaꞌaseꞌ si pagkasinen, gaꞌi subey tinalew hinukum.
[14] Meꞌ kapungtinaꞌihanku, bang niyaꞌ aꞌa magpaꞌin weꞌ sandel iye pu Isa Almasi bu gaꞌi tewwaꞌ hinangannen, gaꞌ niyaꞌ guna sandelne miyaꞌan. Gaꞌi du makaboꞌo iye si surgaꞌ sandelne miyaꞌan.
[15] Bang upama, niyaꞌ meꞌ pagkasite bi masandel pu si Isa Almasihin miskin gaꞌ niyaꞌ semmekde duk gaꞌ niyaꞌ kakande.
[16] Ine kahāpannen bang paꞌinbi si siye, “Karayaw hāp hadja kaꞌam. Magsemmek kaꞌam subuk duk kaꞌam gaꞌi haggutan. Mangan kaꞌam pahāp-hāp.” Na, bang missā hadja kaꞌam sa miyaꞌan saguwaꞌ gaꞌi du siye urunganbi meꞌ sukal si baranden, gaꞌ niyaꞌ gunane.
[17] Damikkiyan, aꞌa masandel pu si Isa Almasihin bang gaꞌ niyaꞌ hinangne hāp pamakitene sandelnen, gaꞌi bennal sandelne si Tuhanin.
[18] Saguwaꞌ kaw niyaꞌ batang nganjawab. Kaw paꞌinne, “Ambat ne, peggeꞌ gaꞌi saliꞌ panuhut aꞌa Tuhanin. Niyaꞌ sandel si Tuhan. Niyaꞌ maghinang hāp.” Manjari, inin isab sambungku si iyehin, “Pabugtuꞌun si aku weꞌ bennal kew sandel si Tuhan bisan gaꞌi patuhutannu hinangan hāp. Duk aku isab pabugtuꞌku si kaꞌu weꞌ bennal ku sandel sabab meꞌ hinanganku mahāpin.”
[19] Kahagad ke kew weꞌ dambuwaꞌ-buwaꞌ du Tuhanin? Hāp weꞌ kahagad kew. Saguwaꞌ gaꞌi pe iyan sarang, peggeꞌ bisan meꞌ seyitanin kahagad du isab weꞌ dambuwaꞌ-buwaꞌ Tuhanin. Saguwaꞌ migpid siye hawal talewde si iyehin.
[20] Babbal kew pahāp iyan. Gaꞌi ke tahātinu weꞌ gaꞌ niyaꞌ kagunahan sandel aꞌahin bang kahagad hadja iye saguwaꞌ gaꞌ du niyaꞌ hinanganne hāp?
[21] Bisan du Ibrahim kapapuꞌanten bi, kinimmatan iye bentel weꞌ Tuhanin peggeꞌ hininang weꞌ ne pangandaꞌakan Tuhan iyehin. Sinōngan hep weꞌ ne si Tuhan anaknen Isahak, laꞌi diyataꞌ batu pagkulubananin.
[22] Sandel Ibrahim si Tuhanin magtuhut duk pangahinangne pangandaꞌakan Tuhan si iyehin. Tibūs sandelnen sabab hinangnen.
[23] Iye iyan hāti tasulat dem kitabin sabab Ibrahim. Tasulat hep laꞌi, pinaꞌin, “Kahagad Ibrahim si Tuhan duk sabab pakahagadne miyaꞌan kinimmatan iye bentel weꞌ Tuhanin.” Duk inēnan iye weꞌ Tuhanin bagayne.
[24] Manjari, takitete tuꞌu si inin weꞌ kimmatan Tuhanin kite bentel sabab tahinangten. Gaꞌi sarang bang paꞌinte hadja weꞌ sandel kite si Tuhan saguwaꞌ subey sandelten magtuhut duk hinangten.
[25] Damikkiyan isab si Rahab awwalley. Tagnaꞌ dende dupang iye. Saguwaꞌ kinimmatan iye bentel weꞌ Tuhanin sabab hininangne mahāpin. Tinapukan weꞌ ne dem lumaꞌne meꞌ aꞌa bangsa Israꞌil magispayin. Ubus bu pinapoleꞌ siye weꞌ ne nuhut lān seddili supaya siye gaꞌi kasuwaꞌ meꞌ bantaden.
[26] Manjari, sandelte si Tuhanin dalil barante inin. Bang gaꞌ niyaꞌ napaste, gaꞌ ne niyaꞌ guna baranten peggeꞌ matey ne. Damikkiyan isab sandelte si Tuhanin. Bang sandelten gaꞌi patuhutan meꞌ hinangan hāp gaꞌ niyaꞌ gunane.