[1] Sulat inin amban aku, si Petros. Bakas kawakilan ku weꞌ Isa Almasi dinaꞌak magmahalayak lapalnen. Pasampayku sulat inin piyu si kaꞌam meꞌ aꞌa tapeneꞌ Tuhanin, meꞌ aꞌa liyu-liyu makanat-kanat si meꞌ kalahat-lahatan seddilihin. Pasampayku inin si kaꞌam maluꞌu si lahat Pontusin, lahat Galatiyahin, lahat Kappadokehin, lahat Asiyahin duk si lahat Bitiniyahin.
[2] Kaꞌam iyan andang ne kataꞌuhan Samate bi Tuhanin duk tapeneꞌ kaꞌam weꞌ ne hinangne meꞌ aꞌane duk sinutsi weꞌ Niyawa Tuhanin ateybin. Tapeneꞌ kaꞌam supaya tuhutbi Isa Almasi duk supaya taꞌampun meꞌ dusebin sabab lahaꞌ Isa Almasi mabuꞌus kamateynen. Karayaw magkasōng tabang Tuhan si kaꞌamin duk pasōng ngasanyang dem ateybin.
[3] Subey teꞌed pudjite bi Tuhanin, iye Sama Panuhutanten bi Isa Almasi. Hawal aseꞌne si kitehin bi inurungan kite bi weꞌ ne umul baꞌahu sabab pinakellum weꞌ ne Isa Almasi amban kamateynen. Hangkan bugtuꞌ inase-aseten bi weꞌ pakellumne isab kite bi bang kite bi matey.
[4] Duk ngase-ngase kite bi weꞌ tepe si kite bi du kēmon kahāpan inennaꞌ Tuhan si surgaꞌ para si meꞌ aꞌanen. Meꞌ kahāpan inin gaꞌi magkaꞌat atawa ngaꞌandang atawa pinda.
[5] Kēmon meꞌ kahāpan inin para si kaꞌam du. Duk binanteyan kaꞌam weꞌ balakat Tuhanin peggeꞌ sandel kaꞌam si Tuhan. Binanteyan kaꞌam samantaꞌan gaꞌ pe pinakitehan panimbul Tuhan kaꞌamin si ellew dambuli.
[6] Hangkan hep subey kaꞌam kēgan bisan ne kaꞌam magsandal daddaliꞌ sabab meꞌ bayuꞌ-bayuꞌan kasusehan matekka si kaꞌamin.
[7] Meꞌ kasusehan matekka si kaꞌam iyan panuleyan sandelbi si Tuhanin bang toꞌo ke atawa gaꞌi. Dalilnen bulawanin. Bulawanin magkaꞌat du kuweꞌ bayuꞌ-bayuꞌan matuꞌu si dunyahin. Tinunag bulawanin dem ebbut panuleyan bang purul ke atawa gaꞌi. Sandelbi si Tuhanin pasōng pe mahalgaꞌ amban bulawan. Hangkan subey sinuleyan sandelbin supaya kataꞌuhan bang asal bennal. Bang asal bennal kaꞌam sandel si iye pinudji du kaꞌam duk pinahadje bang tekka ne ellew papitu Isa Almasi balikin.
[8] Kalasahanbi Isa Almasi bisan du iye gaꞌ bakas takitebi. Sandel kaꞌam si iye bisan du iye gaꞌi takitebi kuweꞌitu. Duk kēgbin gaꞌi takila-kila
[9] peggeꞌ niyaꞌ du umulbi si surgaꞌ salama-lama sabab sandelbi si iyehin.
[10] Meꞌ kanabihan awwalley magpikil duk maghapal teꞌed bang saꞌingge pamaluwas Tuhan manusiyaꞌin amban duseden duk siye taga umul salama-lama. Pinaꞌal weꞌ de sabab lasa-lasahan pinasukuꞌ Tuhan si kaꞌam inin.
[11] Pinakitaꞌu si siye weꞌ Niyawa Tuhan malaꞌi si siyehin sabab pagsandal Almasi kabinasahanin duk sabab pamahadje iyehin puwas meꞌ kabinasahan miyaꞌan. Mabayaꞌ teꞌed kataꞌuhande bang sumiyan inin umantag duk bang saꞌingge kaꞌumantagne inin, hangkan hinapal weꞌ de.
[12] Saguwaꞌ pinakitaꞌu weꞌ Tuhanin si siye weꞌ pinaꞌalde miyaꞌan dumaꞌin si kahāpande saguwaꞌ si kahāpan meꞌ aꞌa si pasōnganin, hātinen si kaꞌam ne. Duk kuweꞌitu tuman ne inin sabab takalebi ne meꞌ aꞌa magmahalayak si kaꞌam aka-aka mahāpin peggeꞌ kaꞌurungan siye balakat weꞌ Niyawa Sutsi pinapitu amban surgaꞌin. Bisan meꞌ malaꞌikatin mabayaꞌ isab ngataꞌu sabab inin.
[13] Hangkan hep subey pahāpbi pamikilbin supaya kaꞌam memes maghinang kinabayaꞌan Tuhanin. Papateng kaꞌam duk ase-asehun bi teꞌed weꞌ tasangkabi du kahāpan pangurung Tuhanin bang balik ne pitu Isa Almasi.
[14] Tuhutun bi meꞌ pangandaꞌakan Tuhanin. Daꞌa tuhutun bi kinabayaꞌan napsubin kuweꞌ hinanganbin masa gaꞌ pe kataꞌuhanbi toloꞌ mabennal amban Tuhanin.
[15] Saguwaꞌ subey kaꞌam neppu Tuhanin peggeꞌ tapeneꞌ kaꞌam weꞌ ne hinangne meꞌ anakne. Si kēmon hinanganbin daꞌa ne kaꞌam magduse peggeꞌ Tuhanin gaꞌ niyaꞌ duse-dusene.
[16] Peggeꞌ tasulat hep dem kitab, pinaꞌin, “Daꞌa kaꞌam magduse,” paꞌin Tuhanin, “peggeꞌ aku gaꞌ niyaꞌ duse-duseku.”
[17] Bang hukum Tuhanin meꞌ manusiyaꞌin, hukumne siye dangan-dangan duk gaꞌi siye pagbiddaꞌne. Hukumne meꞌ hinanganden hāp-laꞌat. Hangkan hep peggeꞌ pangēnbi Tuhanin “Ammaꞌ” bang kaꞌam ngampun, subey teꞌed kaꞌam magmātabat si iye tiggelanbi ellum tuꞌu si dunya.
[18] Kataꞌuhanbi du bang ine pangalekkat Tuhan kaꞌamin amban meꞌ addatbi gaꞌ niyaꞌ kagunahannen, meꞌ addat taꞌayabi amban meꞌ kamatettoꞌahanbin. Dumaꞌin pangalekkatnen meꞌ alataꞌ magkaꞌat kuweꞌ pilak atawa bulawan.
[19] Saguwaꞌ iye pangalekkatnen lahaꞌ si Isa Almasi mamahalgaꞌin mabuꞌus kamateynen. Si Almasi kuweꞌ anak bili-bili gaꞌ niyaꞌ sallaꞌ-sallaꞌne atawa lege-legene hinang kuluban pamuwas duseten bi.
[20] Gaꞌ pe pinapanjari dunya inin, andang ne Almasi tapeneꞌ weꞌ Tuhanin pinapatey pamuwas duseten bi saguwaꞌ kuweꞌitu hadja si meꞌ ellew dambuli inin pinakitehan iye supaya kite tatabangne.
[21] Sabab tahinang Isa Almasi si kitehin bi sandel ne kaꞌam si Tuhan. Iye hep mamakellum Isa Almasi amban kamateynen duk pinahadje iye weꞌ ne. Hangkan hep sandelbin duk pangase-ngasebin teteg ne si Tuhan.
[22] Peggeꞌ tinuhut weꞌ bi toloꞌ mabennal sabab Isa Almasihin, ilebbahan ne weꞌ bi meꞌ hinanganbi malaꞌatin duk bennal ne kaꞌam malasa si meꞌ pagkasibi masandel pu si Isahin. Maglasa-ilasa teꞌed kaꞌam dambūs-būs ateybin.
[23] Subey inin hinangbi peggeꞌ kuweꞌ kaꞌam inanakan balik, dumaꞌin amban matettoꞌa sukuꞌnen matey saguwaꞌ amban Tuhan manggaꞌi mamatey-mateyin. Ginuna weꞌ ne lapalnen duk kaꞌam kaꞌurungan umul baꞌahu. Lapalnen gaꞌi teꞌed pinda duk layun salama-lama.
[24] Paꞌin kitabin hep, “Kēmon manusiyaꞌin kuweꞌ balili duk kēmon kabantuhanden kuweꞌ sumping sabet. Lanes du balilihin duk pagpag du sumpingin. Damikkiyan manusiyaꞌin matey du duk gaꞌi layun.
[25] Saguwaꞌ lapal Tuhanin teteg salama-lama.” Lapal inin ne iye aka-aka mahāp minahalayak si kaꞌamin.