[1] Hangkan hep lebbahanun bi ne kēmon hinangan laꞌat. Daꞌa ne kaꞌam magdustaꞌ. Daꞌa kaꞌam hāp hadja si luwasan bu laꞌat dem ateybin saguwaꞌ subey hāp addatbin asal amban dem atey. Daꞌa kaꞌam ngajidjil saweꞌbi duk daꞌa kaꞌam ngalimutan saweꞌbi.
[2] Pasaliꞌte kaꞌam si meꞌ mākanak baꞌahu inanakan. Nakanak baꞌahu inanakanin luwal mabayaꞌ nusu si saꞌinen manjari nulig iye. Subey isab kuweꞌ miyaꞌan bayaꞌbi mapakale si lapal Tuhanin supaya ngabasag sandelbi si Tuhanin, duk timbul du kaꞌam.
[3] Peggeꞌ kataꞌuhanbi ne du bang saꞌingge kahāp Panuhutanin si kaꞌam.
[4] Patapit kaꞌam pu si Isa Almasi Panuhutanin. Iye mangurung umul manggaꞌ niyaꞌ tamanannen. Iye dalil batu panenggehan lumaꞌin. Tinayikutan iye weꞌ meꞌ aꞌahin peggeꞌ bahasa gaꞌi koꞌ taguna, saguwaꞌ pineneꞌ iye weꞌ Tuhanin peggeꞌ iye tamanan mahāpin.
[5] Kuweꞌitu taga umul baꞌahu ne kaꞌam amban Tuhanin. Ambat kaꞌam guna Tuhanin kuweꞌ dalil batu pangahinangne lumaꞌnen. Hāti lumaꞌ Tuhanin, kēmon meꞌ aꞌa manuhut iyehin duk pinagbayaꞌan weꞌ Niyawanen. Duk maghinang isab kaꞌam si Tuhan kuweꞌ dalil meꞌ imam pineneꞌ weꞌ ne. Hinangbi si iyehin magsukul duk mudji Tuhanin. Duk pagsukulbin duk pamudjibin tayimaꞌ Tuhanin du sabab Isa Almasi.
[6] Peggeꞌ paꞌin kitabin hep, “Niyaꞌ tapeneꞌku batu mahalgaꞌ manamal ginuna pamahaget lumaꞌ si puweblo Siyonin. Sasuku ngandel si iyehin gaꞌi teꞌed kaꞌiyaꞌ-iyaꞌan.” Batu inin dalilan. Hātinen Isa Almasi.
[7] Batu inin asal langkew teꞌed halgaꞌnen si kaꞌam meꞌ makahagad si iyehin. Saguwaꞌ meꞌ manggaꞌi makahagad si iyehin ujudnen kataꞌuhande weꞌ toꞌo du hatiꞌ bakas tasulat dem kitabin, pinaꞌin, “Batu tinayikutan weꞌ meꞌ aꞌa maghinang lumaꞌin peggeꞌ paꞌinde gaꞌi taguna, iye miyaꞌan batu tamanan maniyaꞌ kagunahannen.”
[8] Duk niyaꞌ isab ayat seddili dem kitab magpaꞌin, “Iye miyaꞌan batu kasumampukan meꞌ aꞌahin hangkan siye hebbaꞌ.” Peggeꞌ gaꞌ siye kahagad si lapal Tuhanin kuweꞌ dalil sumampuk siye. Iye miyaꞌan kabayaꞌan Tuhan si siyehin.
[9] Saguwaꞌ kaꞌam meꞌ makahagad si iyehin, kaꞌam hep meꞌ tapeneꞌ Tuhan hininangne meꞌ aꞌanen. Kuweꞌ isab kaꞌam meꞌ imam maghinang si sultanbin Tuhanin. Kaꞌam meꞌ aꞌa pinaꞌil weꞌ Tuhanin supaya tuhutbi iye dambūs-būs. Kaꞌam meꞌ aꞌa sukuꞌ si Tuhanin. Tapeneꞌ kaꞌam weꞌ ne supaya tapalataꞌbi sabab meꞌ hinanganne mahāpin. Ineddoꞌ kaꞌam weꞌ ne amban dem lindem duk binoꞌo kaꞌam weꞌ ne pī dem dantaꞌ.
[10] Matuꞌuhin dumaꞌin kaꞌam meꞌ aꞌa Tuhanin saguwaꞌ kuweꞌitu meꞌ aꞌa Tuhanin ne kaꞌam. Matuꞌuhin gaꞌ kataꞌuhanbi aseꞌ Tuhanin saguwaꞌ kuweꞌitu kataꞌuhanbi ne peggeꞌ bakas pakitehanne ne aseꞌnen si kaꞌam.
[11] Meꞌ bagayku, aꞌa liyu-liyu hadja kite bi tuꞌu si dunya, dumaꞌin inin lahatte bi teꞌedin. Hangkan junjungku si kaꞌam, daꞌa teꞌed ūtanun bi napsu baranbin. Peggeꞌ napsubin hep managgaꞌ kaꞌamin duk gaꞌi tatuhutbi kinabayaꞌan Tuhanin.
[12] Pahāpun bi boꞌohanbin diyaleman meꞌ manggaꞌi masandel pu si Isa Almasihin supaya bang kaꞌam tuksaꞌde maghinangan laꞌat, takitede du meꞌ hinanganbi mahāpin duk bang balik ne Isa Almasi pudjide du Tuhanin sababbi.
[13] Supaya pinahadje Panuhutanten bi Isa Almasi, subey tuhutbi saraꞌ meꞌ taga kapatut si paglahatbin. Tuhutun bi sultan nakuraꞌin peggeꞌ iye tamanan malangkewin tuꞌu si paglahatten bi.
[14] Damikkiyan tuhutun bi isab meꞌ gubnulin peggeꞌ kaꞌurungan siye kapatut weꞌ ne ngalegga meꞌ maghinangan malaꞌatin duk nanglitan meꞌ maghinangan mahāpin.
[15] Peggeꞌ iye kabayaꞌan Tuhanin, maghinangan hāp kaꞌam supaya lettep meꞌ aꞌa manggaꞌi makasabut mamissā-missāhan kaꞌamin.
[16] Kaꞌam iyan, gaꞌ niyaꞌ makapages kaꞌam ine-ine batang hinangbi peggeꞌ pinaluhaya ne kaꞌam weꞌ Isa Almasi Panuhutanbin. Saguwaꞌ daꞌa inin hinangun bi daꞌawa bang kaꞌam maghinangan laꞌat. Saguwaꞌ subey pakitehanbi si meꞌ hinanganbin weꞌ kaꞌam asal meꞌ daraꞌakan Tuhanin.
[17] Pagaddatanun bi kēmon aꞌahin. Kalasahanun bi pagkasibi masandel pu si Isa Almasihin. Subey kaꞌam talew si Tuhan duk subey pagaddatanbi sultan nakuraꞌin.
[18] Kaꞌam isab meꞌ daraꞌakanin, pagaddatanun bi teꞌed amubin duk tuhutun bi meꞌ pangandaꞌakanden. Dumaꞌin hadja iye inaddatanbin amu mahāp addatnen saguwaꞌ addatanun bi bisan manggaꞌi hāp addatnen duk mamura mangamāhin.
[19] Bang kite nandalan peddiꞌ bisan du gaꞌ niyaꞌ salaꞌte saguwaꞌ sandalante hadja peggeꞌ luwal tapikilte Tuhanin, kasulutan Tuhanin si kite.
[20] Gaꞌi kasulutan Tuhanin si kaꞌam bisan saꞌingge pagsandalbin bang pinapeddiꞌan kaꞌam sabab hinanganbi malaꞌatin. Saguwaꞌ bang nandalan kaꞌam peddiꞌ bisan tewwaꞌ hinanganbin, kasulutan Tuhanin si kaꞌam.
[21] Peggeꞌ kabayaꞌan Tuhanin hep weꞌ magsandal kaꞌam peddiꞌ bisan gaꞌ niyaꞌ salaꞌbi. Peggeꞌ bisan Almasi nandalan kabinasahan du sababbi, duk hinanganne kaꞌam pangalekkatan supaya batukanbi hininangnen.
[22] Gaꞌ iye bakas magduse. Gaꞌ iye bakas magdustaꞌ, bisan mintedde.
[23] Bisan iye binissā-bissāhan gaꞌ iye nambung laꞌat. Bisan iye bininasa gaꞌ tunggaꞌanne meꞌ maminasa iyehin. Saguwaꞌ pinangandel weꞌ ne dinen si Tuhan peggeꞌ bentel hukumannen.
[24] Almasi ileggahin sabab meꞌ duseten bi pangalansang iye diyataꞌ olomin supaya kite bi gaꞌi ne magduse saguwaꞌ maghinangan hāp hadja kite bi tiggelante bi maꞌellumin. Duk sabab meꞌ bakatne sinandalannen kawuliꞌan kite bi.
[25] Matuꞌuhin kuweꞌ kaꞌam meꞌ bili-bili sumapeꞌ amban mangipat kaꞌamin. Saguwaꞌ kuweꞌitu tabalik ne kaꞌam si mangipat duk mamanteyan kaꞌamin.