[1] Peggeꞌ Isa Almasi bininasa duk kapeddiꞌan hangkan hep subey kaꞌam ngatu magsandal peddiꞌ kuweꞌ Isa Almasihin. Peggeꞌ sasuku nandalan peddiꞌ gaꞌi ne iye mabayaꞌ magduse.
[2] Hangkan tinagnaꞌan kuweꞌitu subey ne gaꞌi ūtanbi napsubin saguwaꞌ iye subey tinuhutbin kinabayaꞌan Tuhanin tiggelanbi maꞌellumin.
[3] Sarang ne paghinangbi meꞌ hinangan kasinnahan meꞌ aꞌa manggaꞌi manuhut Tuhanin. Matuꞌuhin magjina kaꞌam duk magkahinangan lella duk dende, maglangohan kaꞌam duk bang magtipun kaꞌam maglami-lami, luwal kaꞌam maginuman. Duk nambahayang kaꞌam si meꞌ tuhan-tuhan bu asal kabunsihan Tuhanin inin.
[4] Duk kuweꞌitu ulaliꞌ meꞌ aꞌa manggaꞌi manuhut Tuhanin bang weꞌey ne kaꞌam gaꞌi nuhut siye maghinangan meꞌ malaꞌat miyaꞌan hangkan bissā-bissāhande kaꞌam.
[5] Saguwaꞌ dambuwaꞌ ellew nengge du siye iyan si harapan Tuhanin hinukum, duk tilew Tuhanin du siye dangan-dangan sabab meꞌ hinangande matuꞌu si dunyahin. Hukum Tuhanin du meꞌ aꞌa maꞌellumin duk meꞌ mamateyin.
[6] Hangkan hep minahalayak aka-aka mahāpin bisan si meꞌ pateyin, supaya ellum du niyawaden kuweꞌ Tuhanin ellum, bisan ne siye tahukum weꞌ Tuhanin kaꞌellumden weꞌ subey siye matey peggeꞌ iye inin pangaral Tuhan kēmon manusiyaꞌin.
[7] Sōng taꞌabut ne gantaꞌan dunya inin hangkan papateng-pateng kaꞌam duk pahāpun bi pamikilbin duk kaꞌam kapangampun si Tuhan.
[8] Duk pasōng pe amban kēmon, subey kaꞌam maglasa-ilasa teꞌed peggeꞌ bang asal maglasa-ilasa kaꞌam, bisan ekka dusebi si saweꞌbi, magampun-inampun du kaꞌam.
[9] Bang niyaꞌ meꞌ pagkasibi masandel pu si Isa Almasihin piyu si lumaꞌbi, addatanun bi siye duk daꞌa siye puggutanun bi.
[10] Dangan-dangan kaꞌam kaꞌurungan kapandeyan weꞌ Tuhanin. Subey gunabi kapandeyan iyan panabangbi saweꞌbi. Subey kaꞌam taꞌu ngangguna bayuꞌ-bayuꞌan kapandeyan pinangandel Tuhan si kaꞌamin.
[11] Upama bang niyaꞌ kaꞌurungan kapandeyan magusihat, subey usihatne lapal Tuhanin. Bang niyaꞌ isab kaꞌurungan kapandeyan nabangan saweꞌne, subey teꞌed gunane kapandeyannen panabangne siye duk subey kataꞌuhanne weꞌ urungan Tuhanin du iye basag duk tatabangne saweꞌnen. Bisan ine-ine hinangbi, hinangun bi pahāp-hāp supaya kataꞌuhan meꞌ aꞌahin weꞌ sabab Isa Almasi hangkan tahinangbi iyan duk pudjide du Tuhanin. Pataꞌ teꞌed iye pinahadje peggeꞌ balakatnen gaꞌ niyaꞌ tamananne. Amin.
[12] Meꞌ bagayku kinalasahankun, daꞌa kaꞌam ulaliꞌ bang tekka si kaꞌam kasusehan mahadjehin panuleyan sandelbin. Asal kēmon du masandel pu Isa Almasihin subey makalabey kasusehan.
[13] Saguwaꞌ subey kaꞌam kēgan peggeꞌ sabab kasusehanbi iyan sumakup ne kaꞌam si meꞌ kabinasahan talabey si Isa Almasihin, supaya du isab kaꞌam kēgan manamal bang pahadje Tuhanin ne Isa Almasi si pagmatahan meꞌ manusiyaꞌin kēmon.
[14] Bang kaꞌam binissā-bissāhan peggeꞌ patuhut kaꞌam pu si Isa Almasi, subey kaꞌam kēgan peggeꞌ hātinen luꞌu si kaꞌam Niyawa mabalakatanin, iye Niyawa Tuhanin.
[15] Bang kaꞌam magsandal kasusehan, ambat ne basta dumaꞌin hadja pagjānannen meꞌ hinangan laꞌat kuweꞌ monoꞌ aꞌa atawa nangkew atawa maghinangan laꞌat seddili atawa ngulebeꞌan hinang saweꞌbi.
[16] Saguwaꞌ bang kaꞌam magsandal kasusehan peggeꞌ patuhut kaꞌam pu si Isa Almasi, na, daꞌa kaꞌam iyaꞌ saguwaꞌ magsukul teꞌed kaꞌam si Tuhan peggeꞌ kaꞌam sukuꞌ pu Isa Almasi.
[17] Taꞌabut ne waktuhin tagnaꞌan Tuhanin ne hinukum meꞌ aꞌa si dunyahin duk iye hinukumne dehelluhin meꞌ aꞌanen. Bang meꞌ kasusehan matekka si kite bi kuweꞌitu inin, iye hukumanne si kitehin bi meꞌ aꞌanen, pasōng pe teꞌed laꞌat matekka si meꞌ manggaꞌi makahagad si aka-aka mahāp amban Tuhanin.
[18] Paꞌin kitabin hep, “Meꞌ aꞌa manuhut Tuhanin agen gaꞌi timbul. Na, saꞌingge ne katimbul meꞌ aꞌa manggaꞌi manuhut Tuhanin duk meꞌ aꞌa dusehanin?”
[19] Hangkan hep bang kaꞌam magsandal kasusehan bu amban bayaꞌ Tuhan du, pasōngun bi paghinangbi mahāpin duk pangandelun bi dibin dambūs-būs si Tuhan peggeꞌ iye mamapanjari kaꞌamin duk tumananne du sanggupnen weꞌ gaꞌi kaꞌam ambananne.