[1] Na, kaꞌam isab meꞌ dendehin subey tuhutbi kinabayaꞌan ellabin supaya bang niyaꞌ siye gaꞌi pe kahagad si lapal Tuhanin ujud kahagad du siye bang kitede addatbi mahāpin. Bisan kaꞌam gaꞌi missā ngahumatan siye, ujud kahagad du siye iyan pu si Isa,
[2] bang kitede weꞌ asal magmātabat kaꞌam si Tuhan duk asal hāp kawul-piꞌilbin.
[3] Daꞌa pikilun bi weꞌ iye makamannis kaꞌamin pagpahāpbi bantukbin, kuweꞌ panugleybi kōkbin duk paggunabi meꞌ pamulawanin duk pagsemmekbi mahāpin. Dumaꞌin inin makamannis dendehin.
[4] Saguwaꞌ mannisbin subey amban dem ateybi, hātinen hāp addatbin duk diyawaꞌ ateybin. Mannis inin gaꞌi teꞌed usaꞌ duk mahalgaꞌ teꞌed si pagmatahan Tuhanin.
[5] Kuweꞌ inin mannis meꞌ dende sukuꞌ si Tuhan awwalley. Ngandel teꞌed siye si Tuhan duk tinuhut weꞌ de kinabayaꞌan elladen. Addatde mahāpin iye makamannis siyehin.
[6] Si Sara kuweꞌ miyaꞌan; luwal tinuhut weꞌ ne kinabayaꞌan ellanen Ibrahim duk pangimmatne ellanen amune. Na, kaꞌam meꞌ dende kuweꞌituhin, bang hāp hinanganbin duk gaꞌi kaꞌam mura-mura tinalew, kuweꞌ tubuꞌ si Sara kaꞌam.
[7] Na, kite bi isab meꞌ taga andahin, subey kite bi magsulut duk andaten bi. Subey essebte bi weꞌ lamma siye amban kite bi hangkan subey siye pagaddatante bi. Duk saliꞌ-saliꞌ du kite bi inurungan weꞌ Tuhanin umul gaꞌ tamananne si surgaꞌ hawal lasane duk aseꞌne si kitehin bi. Hinangun bi inin supaya pakale Tuhanin pangampunbi si iyehin.
[8] Na, si katambusannen, iye inin paꞌinku si kaꞌam: subey kaꞌam kēmon magdambuwaꞌ pikilan duk magesseb-inesseb. Subey kaꞌam kuweꞌ magpungtinaꞌi maglasa-ilasa, subey kaꞌam maꞌaseꞌ si pagkasibi duk magdiyawaꞌ atey isab kaꞌam.
[9] Bang niyaꞌ maghinang laꞌat si kaꞌam, daꞌa tumbasanun bi laꞌat. Bang niyaꞌ missā-missāhan kaꞌam, daꞌa siye bissā-bissāhanun bi isab. Saguwaꞌ iye panumbasun bi siye pāku-pākuhanun bi siye kahāpan amban Tuhan. Iye sababnen hangkan siye subey pākuhanbi kahāpan peggeꞌ kaꞌam iyan tapeneꞌ weꞌ Tuhanin supaya kaꞌam makasangka kahāpan amban Tuhan.
[10] Peggeꞌ paꞌin kitabin hep, “Sasuku mabayaꞌ weꞌ sinna iye tiggelanne ellum tuꞌu si dunya duk hāp meꞌ talabeynen, subey iye gaꞌi magbissā laꞌatan duk gaꞌi magdustaꞌ.
[11] Subey lebbahanne meꞌ hinanganne malaꞌatin duk maghinangan iye hāp. Subey paggeꞌesanne teꞌed magsulut duk meꞌ saweꞌnen.
[12] Peggeꞌ Tuhanin luwal banteyanne meꞌ aꞌa mabentelin duk luwal pakalene meꞌ pangampunde si iyehin. Saguwaꞌ kuntarahanne meꞌ maghinangan malaꞌatanin.”
[13] Gaꞌ niyaꞌ ngahinang laꞌat si kaꞌam bang iye hadja kabayaꞌanbi hininangin mahāpin.
[14] Saguwaꞌ bisan bang kaꞌam magsandal sabab hinanganbi mahāpin, subey kaꞌam kēgan. Daꞌa kaꞌam tinalew si aꞌa duk daꞌa kaꞌam magsuse.
[15] Subey kaꞌam magmātabat pu Isa Almasi dem ateybi duk subey iye pahadjebi peggeꞌ iye Panuhutanbin. Pikilun bi andang bang ine panambungbin bang niyaꞌ nilew kaꞌam bang weꞌey kaꞌam sandel pu Isa Almasi.
[16] Saguwaꞌ subey hāp pamissābin bang kaꞌam nambung duk pagaddatanun bi manilew kaꞌamin. Daꞌa kaꞌam maghinangan laꞌat duk gaꞌi sasew dem pikilanbin supaya bang niyaꞌ missā-missāhan kaꞌam sabab kawul-piꞌilbi mahāpin, peggeꞌ sandel kaꞌam pu si Isa Almasi, ujud iyaꞌ du siye sabab bakas binissāden.
[17] Peggeꞌ gam pe kite nandal sabab hinangante mahāpin, bang kabayaꞌan Tuhanin du, amban bang nandal kite sabab hinangante malaꞌatin.
[18] Essebun bi weꞌ Almasi magsandal du isab bu gaꞌ niyaꞌ duse-dusene. Saguwaꞌ matey iye sabab duseten bi supaya kite bi meꞌ madusehanin tapaghāpne duk Tuhanin. Matey Isa Almasi sabab duseten bi, duk asal gaꞌi ne iye matey balik. Pinapatey weꞌ de barannen saguwaꞌ ellum du niyawanen.
[19] Ubus hap pī niyawanen magmahalayak aka-aka mahāpin si meꞌ niyawa kinalabusu Tuhan si ahilatin.
[20] Siye miyaꞌan meꞌ niyawa meꞌ aꞌa manggaꞌ manuhut pangandaꞌakan Tuhanin masa si Nu ley. Inagad-agad weꞌ Tuhanin kaw du siye nuhut iye sābu hininang pe weꞌ si Nu kappal mahadjehin. Saguwaꞌ pagtekka laseyin luwal du hadja waluꞌ aꞌa mapasakey dem kappalin duk timbul siye amban dem boheꞌin.
[21] Katimbulde masaley dalil katimbulte bi kuweꞌitu inin bang kite bi pinandi dem boheꞌ. Hāti pinandi inin dumaꞌin weꞌ tahalaꞌ ne luꞌud baranten bi, saguwaꞌ tandaꞌ inin weꞌ māku ampun ne kite bi si Tuhan supaya gaꞌi ne sasew dem pikilanten. Makajari ne kite bi inampun peggeꞌ Isa Almasi ellum balik amban kamateynen,
[22] duk hap pī iye si surgaꞌ. Laꞌi iye kuweꞌitu si kanawanan Tuhanin, lugal tamanan mabangsahanin duk magbayaꞌ iye si kēmon malaꞌikatin duk kēmon taga balakat duk taga kapatut diyataꞌ langitin.