[1] Niyaꞌ isab batang paꞌinku si kaꞌam meꞌ bahiꞌ maluꞌuhin peggeꞌ aku inin bahiꞌ du isab kuweꞌ kaꞌamin. Takiteku duk duwe mataku inin kabinasahan talabey Isa Almasihin. Duk sumakup du ku isab iyan bang pinahadje ne iye si pagmatahan meꞌ manusiyaꞌin kēmon.
[2] Iye inin batang pinaꞌinku si kaꞌamin: ipatun bi pahāp-hāp meꞌ masandel pu si Isa Almasi pinangandel Tuhan si kaꞌamin. Siye iyan dalil meꞌ bili-bili duk kaꞌam dalil meꞌ aꞌa mangipat bili-bilihin. Hangkan subey kaꞌam sinna ngipat siye peggeꞌ inin kinabayaꞌan Tuhanin duk daꞌa kaꞌam subey ginagahan. Ipatun bi siye dumaꞌin peggeꞌ suweldobin inapasbin saguwaꞌ peggeꞌ asal mabayaꞌ kaꞌam maghinang para si siye.
[3] Daꞌa kaꞌam magmanda si meꞌ pinangandel si kaꞌamin saguwaꞌ subey kaꞌam pangalekkatande maghinangan mahāpin.
[4] Manjari bang balik ne pitu Isa Almasi, iye dalil nakuraꞌ meꞌ aꞌa mangipat bili-bilihin, niyaꞌ iyan panumbasne kaꞌam hāp manamal duk asal gaꞌi teꞌed pinda, hātinen, sumakup kaꞌam si sahayanen salama-lama.
[5] Na, kaꞌam isab meꞌ lella mabataꞌin pe, tuhutun bi meꞌ toloꞌ meꞌ bahiꞌin. Duk subey kaꞌam kēmon magtabang-tinabang diyawaꞌ pagateybin. Peggeꞌ paꞌin kitabin hep, “Kuntarahan Tuhanin meꞌ malangkew ateynen saguwaꞌ kaꞌaseꞌanne meꞌ madiyawaꞌ ateynen.”
[6] Hangkan magpadiyawaꞌ kaꞌam si Tuhan Mabalakatanin supaya kaꞌam palangkewne bang taꞌabut ne waktu pangeddewnen.
[7] Pangandelun bi si iye kēmon kasusehanbin peggeꞌ iye ngipat kaꞌamin.
[8] Pahāpun bi pamikilbin duk papateng-pateng kaꞌam. Bantabin nakuraꞌ seyitanin batang ngusaꞌ kaꞌam duk ne kaꞌam gaꞌi nuhut Tuhanin. Kuweꞌ iye limaꞌung ngigel maglunsul ne paꞌin miha bang sine takakannen.
[9] Patetegun bi sandelbi si Tuhanin duk tuwasanun bi nakuraꞌ seyitanin, peggeꞌ kataꞌuhanbi du weꞌ dumaꞌin hadja kaꞌam, saguwaꞌ bisan meꞌ pagkasibi masandel pu si Isa si meꞌ kalahat-lahatan si dunyahin, magsandal du isab kuweꞌ kaꞌamin.
[10] Saguwaꞌ ubus kaꞌam magsandal daddaliꞌ, pahāp Tuhanin du kaꞌam duk ne gaꞌ niyaꞌ salaꞌ-salaꞌbi duk pabasagne ateybin duk patetegne teꞌed sandelbi si iyehin. Tuhanin malasa duk maꞌaseꞌ manamal. Tapeneꞌ kaꞌam weꞌ ne hinangne meꞌ aꞌane supaya kaꞌam pinahadje si surgaꞌ peggeꞌ magdambuwaꞌ kaꞌam duk Isa Almasi.
[11] Pataꞌ iye pinahadje peggeꞌ balakatnen gaꞌ niyaꞌ tamananne. Amin.
[12] Si Silas manabangan akuhin nulat sulat mapandak inin. Dambuwaꞌ iye pungtinaꞌite bi sandel pu si Isa Almasi asal pangandelanku teꞌed. Sulatante kaꞌam peggeꞌ batang paꞌasigku ateybin duk supaya kaꞌam ngataꞌu sabab lasa duk aseꞌ Tuhan si kaꞌamin. Daꞌa teꞌed tayikutanun bi lasane si kaꞌamin.
[13] Meꞌ masandel pu si Isa Almasi si lahat Babilonin, tapeneꞌ du isab siye weꞌ Tuhanin, maboꞌo bissā piyu si kaꞌam weꞌ essebde kaꞌam. Maboꞌo bissā isab si Markus ituꞌ weꞌ essebne kaꞌam. Si Markus inin pangimmatku iyehin kuweꞌ anakku ne.
[14] Magsalam-sinalam kaꞌam pamakitebi lasabin. Karayaw pasanyang Tuhanin ateybin, kēmon kaꞌam sukuꞌ pu si Isa Almasihin. Wassalam