[1] Sulat inin amban aku, si Simon Petros, dambuwaꞌ daraꞌakan Isa Almasi, duk kawakilan ku weꞌ ne dinaꞌak magmahalayak lapalnen. Pasampayku sulat inin piyu si kaꞌam kēmon meꞌ masandel pu si Isa Almasihin. Iye Tuhanten bi duk iye manimbul kitehin bi. Peggeꞌ bentel iye, gaꞌ kite bi pinagbiddaꞌ weꞌ ne saguwaꞌ sandel pinapīne dem ateybin duk sandel pinapitune dem atey kamihin saliꞌ-saliꞌ du mahalgaꞌ.
[2] Karayaw magkasōng tabangne si kaꞌamin duk pasōng du ngasanyang dem ateybin sakaliꞌ pasōng isab pangataꞌubi Tuhanin duk Isa Almasi, Panuhutanten bi.
[3] Sabab balakat Tuhanin tinabangan kite bi weꞌ ne duk tatuhutte bi kēmon pangandaꞌakannen duk tahinangte bi sasuku mahāpin. Hangkan kite bi tabanganne peggeꞌ kataꞌuhante bi ne Isa Almasi duk pineneꞌ hep kite bi weꞌ Isa Almasi supaya talekkatte bi addatne mahāpin duk tumuhut kite bi si iye pinahadje.
[4] Sabab balakat Tuhanin pinangurung weꞌ ne si kite bi meꞌ bakas pananggupne si kitehin bi, meꞌ pananggupnen hāp manamal duk mahalgaꞌ. Sabab meꞌ pananggupne inin, gaꞌi ne subey ūtante bi meꞌ napsu si dunya makapagkaꞌat kitehin bi, duk addatten bi makajari ne neppu addat Tuhanin.
[5] Bang kabayaꞌanbin weꞌ addatbin kuweꞌ addat Tuhanin subey teꞌed geꞌesanbi pinahāp kawul-piꞌilbin peggeꞌ sandelbin subey patuhutan kawul-piꞌil hāp. Duk maggeꞌes kaꞌam supaya ngalalem kataꞌubin.
[6] Subey isab kaꞌam taꞌu mages dibin. Duk subey kaꞌam taꞌu magsandal bang kaꞌam katekkahan kasusehan. Subey isab tuhutbi Tuhanin dambūs-būs ateybin.
[7] Subey kalasahanbi meꞌ pagkasibi masandel pu si Isa Almasihin duk bisan isab meꞌ aꞌa manggaꞌi masandelin.
[8] Bang kēmon tasulat inin luwal hinangbi duk asal pasōng pe hinangbi, bugtuꞌ niyaꞌ kaꞌujudan kēmon hinanganbin duk niyaꞌ kagunahanne duk pasōng isab kataꞌuhanbi Isa Almasi, Panuhutanten bi.
[9] Saguwaꞌ bisan aꞌahin sandel pu si Isa, bang gaꞌi du hinangne meꞌ pinaꞌinku miyaꞌan, kuweꞌ iye aꞌa pessek atawa aꞌa gaꞌi ngite bang tala peggeꞌ takayipatne ne weꞌ bakas taꞌampun ne weꞌ Tuhanin meꞌ dusene matuꞌuhin.
[10] Hangkan hep meꞌ kapungtinaꞌihanku, paggeꞌesanun bi teꞌed nuhut meꞌ pinaꞌinku miyaꞌan supaya asal tabugtuꞌbi weꞌ tapeneꞌ kaꞌam weꞌ Tuhanin duk tatawag kaꞌam weꞌ ne nuhut iye. Bang inin hinangbi, gaꞌi teꞌed lebbahanbi sandelbi si Tuhanin.
[11] Bang hinangbi du bakas pinaꞌinku miyaꞌan, inurungan du kaꞌam kapatut pī dem pagbayaꞌan Isa Almasi, Panuhutanten bi duk manimbul kitehin bi. Duk magbayaꞌ iye salama-lama.
[12] Iye hep inin sababnen hangkan kaꞌam luwal paꞌessebanku sabab meꞌ inin, bisan ne andang kataꞌuhanbi duk asal teteg ne kaꞌam nuhut toloꞌ mabennal bakas takalebin.
[13] Tapikilku patut kaꞌam paꞌessebanku sabab meꞌ inin pādpād ellum pe ku.
[14] Kataꞌuhanku weꞌ tapit ne kamateykun peggeꞌ bakas pinakitaꞌu si aku weꞌ Panuhutanten bi Isa Almasi.
[15] Hangkan hep geꞌesanku teꞌed maꞌesseban kaꞌam supaya luwal taꞌessebbi meꞌ pinaꞌinku inin bang ne ku matey.
[16] Dumaꞌin kissa hininang-hinang hadja inaka kami si kaꞌamin pangaka kami sabab balakat Isa Almasi, Panuhutanten bi duk sabab pabalikne mapituhin. Saguwaꞌ asal takite kami duk meꞌ mata kamihin sahayanen.
[17] Asal laꞌi teꞌed kami sakaliꞌ iye pinahadje duk pinakitehan sahayanen weꞌ Samane Tuhanin. Niyaꞌ hep suwala amban Tuhan magpaꞌin, “Inin Anakku kalasahanku manamal, kasulutan ku teꞌed si iye.”
[18] Asal takale kami suwala inin missā amban surgaꞌ sābu kami laꞌi nuhutan Isa Almasi diyataꞌ punu pamahadjehan Tuhan Anaknen.
[19] Sabab takite kami duk takale kami diyataꞌ punu miyaꞌan, pasōng kabugtuꞌan kami weꞌ toꞌo meꞌ pinaꞌin kanabi-nabihan awwalley sabab Almasihin. Subey teꞌed asipbi pinaꞌinnen peggeꞌ kuweꞌ iyan payitaꞌan ninag dem kalindeman sampay tekka ellew papitu Isa Almasi mabalikin. Almasi kuweꞌ dalil māga ngadantaꞌan dem ateybin.
[20] Saguwaꞌ essebun bi pinaꞌinku inin peggeꞌ importante manamal, weꞌ gaꞌ niyaꞌ aꞌa bang dihananne hadja taꞌu magpahāti meꞌ pinasulat weꞌ Tuhan dem kitabin.
[21] Peggeꞌ meꞌ bissā Tuhan dem kitabin dumaꞌin amban pikilan manusiyaꞌ. Saguwaꞌ meꞌ aꞌa ginuna Tuhan magpalataꞌ lapalnen, pagbayaꞌan weꞌ Niyawa Tuhanin hangkan tabissāde duk sulatde meꞌ bissā Tuhanin.