[1] Masa awwalley niyaꞌ meꞌ aꞌa magpaꞌin weꞌ siye meꞌ nabi amban Tuhan bu gaꞌi toꞌo. Damikkiyan isab kuweꞌitu niyaꞌ du iyan paguwaꞌ diyalemanbi meꞌ aꞌa magpaꞌin weꞌ siye meꞌ guru saguwaꞌ meꞌ panoloꞌden gaꞌi toꞌo. Magtoloꞌ siye iyan meꞌ toloꞌ makapagkaꞌat sandelbi pu si Isa Almasihin. Bisan si Isa, amuden, matey muwasan duseden saguwaꞌ tayikutande iye. Hangkan bessuwang siye iyan katekkahan mulkaꞌ Tuhanin.
[2] Ekka iyan ngalekkat meꞌ hinangande makaꞌiyaꞌ-iyaꞌin duk sabab hinangande malaꞌat miyaꞌan, binissā-bissāhan iyan toloꞌ mabennal sabab Isa Almasihin.
[3] Meꞌ guru manggaꞌi mabennal inin napsuhan si sīn hangkan paguntungande kaꞌam iyan duk meꞌ kissade manggaꞌi matoꞌohin. Andang ne siye inin kalaboꞌan hukuman. Tuhanin gaꞌi tuli, asal leggane du siye.
[4] Bisan meꞌ malaꞌikat magdusehin gaꞌ du kaꞌaseꞌan weꞌ Tuhanin saguwaꞌ ilakasan siye weꞌ ne dem narkaꞌ. Duk īꞌ siye laꞌi kuweꞌitu kinalabusu dem lindem ngagadan ellew paghukumin.
[5] Meꞌ aꞌa si dunya awwalley isab, gaꞌ siye kaꞌaseꞌan weꞌ Tuhanin saguwaꞌ sabab duseden ilaseyan weꞌ Tuhanin dunya inin. Luwal tinimbulnen si Nu duk saweꞌne pituꞌin. Gaꞌ pe laseyin luwal si Nu miyaꞌan magusihat si meꞌ aꞌahin dinaꞌak pinabentel meꞌ hinanganden.
[6] Ineggas isab weꞌ Tuhanin awwalley puweblo Sodomin duk puweblo Gomorahin pangalegga meꞌ malaꞌihin peggeꞌ dusehan siye manamal, supaya niyaꞌ pamintangan meꞌ aꞌa sinduwe manggaꞌi matalew si Tuhanin.
[7] Sakaliꞌ ineggas lahat miyaꞌan tinimbul si Lot weꞌ Tuhanin. Si Lot inin aꞌa hāp duk sasew dem pikilannen sabab meꞌ aꞌa mabaꞌisan duk mangalanggalan saraꞌ Tuhanin si lahatne miyaꞌan.
[8] Kahabaꞌ ellew dukka dem ateynen sakaliꞌ takalene duk takitene meꞌ hinangande malaꞌatin.
[9] Kēmon inin meꞌ upama weꞌ Tuhanin taꞌu nabangan meꞌ masandel si iyehin duk paluwasne siye amban dem kasusehanden. Tahātite isab weꞌ asal taꞌu du Tuhanin ngalegga meꞌ maghinangan malaꞌatin saguwaꞌ agadne ellew paghukumin.
[10] Lagiꞌ ne meꞌ aꞌa mabaꞌisanin duk meꞌ manggaꞌi mapakale si meꞌ magbayaꞌin asal legga Tuhanin. Meꞌ guru manggaꞌi mabennalin bahani duk abbuhan siye. Gaꞌi siye magaddat si meꞌ malaꞌikatin, bisan miyaꞌan bissā-bissāhande pe.
[11] Bisan du meꞌ malaꞌikatin, basag teꞌed siye duk langkew pe siye amban meꞌ guru mangakkal inin, gaꞌi du siye pī si harapan Tuhanin missā-missāhan atawa nuntutan meꞌ pagkaside malaꞌikatin.
[12] Saguwaꞌ meꞌ guru inin kuweꞌ hayep talun. Meꞌ hayep inin gaꞌi taꞌu mikil duk iye hadja kasuddahanden siniggew duk pinapatey. Meꞌ aꞌa inin, ine-ine paꞌasek dem pikilande iye miyaꞌan hininangden, bu bissā-bissāhande pe manggaꞌi tahātiden. Bugtuꞌ du siye magkaꞌat.
[13] Moleꞌ si siye du meꞌ malaꞌat hininangde si saweꞌden. Sinna siye nganduhulan napsu baranden bisan ellew pe. Moꞌo kaꞌiyaꞌan hadja siye si kaꞌam duk sinna siye ngakkalan kaꞌam peggeꞌ pasawu siye si kaꞌam magkakanan bu laꞌat meꞌ hinanganden.
[14] Sinna siye luwal mayam si meꞌ dende duk pagbaꞌisande. Gaꞌi siye kaduhulan magduse. Boꞌode magduse meꞌ malamma sandelne si Tuhanin. Napsuhan siye duk pandey ne siye ngeddoꞌ ine-ine kabayaꞌande. Pagmulkaꞌan Tuhanin du siye.
[15] Pasapeꞌ siye amban toloꞌ mabentelin. Iye tinuhutden hinangan dambuwaꞌ nabi awwalley inēnan si Balaꞌam anak si Beyor. Si Balaꞌam inin sinna hep si sīn hangkan ngatu iye bisan maghinang laꞌat basta tinangdanan hadja iye.
[16] Saguwaꞌ kaꞌamāhan iye sabab dusene miyaꞌan. Missā kuraꞌnen kuweꞌ aꞌa, mages iye hangkan gaꞌ lumaꞌus pagdupangannen.
[17] Meꞌ guru mangakkalin kuweꞌ kupung teggang. Kuweꞌ isab siye gabun taboꞌo baliyu. Gaꞌ niyaꞌ kagunahan meꞌ panoloꞌden duk gaꞌi ngurung kahāpan si aꞌa. Niyaꞌ ne andang panyap Tuhanin patennaꞌande dem kalindeman manamal.
[18] Pandey siye missā-missā saguwaꞌ gaꞌ niyaꞌ kagunahanne. Kati-katide meꞌ baꞌahu bakas manayikutan meꞌ saweꞌde madusehanin supaya siye magduse balik. Magtoloꞌ siye weꞌ gaꞌi laꞌatan bang luwal ūtante napsu baranten. Kuweꞌ miyaꞌan pangati-ngatiden.
[19] Sanggupande meꞌ aꞌahin weꞌ bang siye tinuhutden makajari siye maghinang ine-ine kabayaꞌande peggeꞌ gaꞌ du niyaꞌ amude. Bu paꞌin iye matoꞌohin, bisan siye kuweꞌ du banyagaꞌ meꞌ addatde malaꞌatin. Peggeꞌ sasuku tinagi maghinangan ine-ine, binanyagaꞌ ne iye weꞌ hinanganne miyaꞌan.
[20] Bang niyaꞌ meꞌ aꞌa ngalebbahan meꞌ hinangan malaꞌat si dunya inin sabab sandel ne siye pu si Isa Almasi, Panuhutanten bi duk manimbul kitehin bi, ubus bu balik du siye maghinangan miyaꞌan duk tinagi ne siye magduse, pasōng laꞌat kaꞌumantaganden amban tagnaꞌin.
[21] Gam pe miyaꞌan siye gaꞌ bakas ngataꞌuhan lān tudju Tuhanin amban bang ubus kataꞌuhande, tinayikutan du weꞌ de pangandaꞌakan Tuhan inaka si siyehin.
[22] Hininangde miyaꞌan kuweꞌ du pinaꞌin eliꞌan inin, “Asuhin kakanne balik bakas inutaꞌannen,” duk “Bawi bakas pinandihin balik du pī ngaluglub dem pisak.”