[1] Meꞌ bagayku kinalasahankun, kaminduwe ne ku inin nulat si kaꞌam. Hangkan kaꞌam sulatanku peggeꞌ batang kaꞌam paꞌessebanku sabab meꞌ kinataꞌuhanbin ne duk teteg pikilanbi mahāpin.
[2] Kabayaꞌankun weꞌ essebbi teꞌed meꞌ pinaꞌal meꞌ kanabihan awwalley duk meꞌ pangandaꞌakan Panuhutanten bi duk manimbul kitehin bi, Isa Almasi. Kēmon pangandaꞌakan si Isa inin inaka si kaꞌam weꞌ meꞌ aꞌa kawakilannen.
[3] Tagnaꞌ subey essebbi weꞌ si meꞌ ellew dambuli niyaꞌ iyan meꞌ aꞌa piyu si kaꞌam, meꞌ aꞌa luwal ngūtan napsuden. Duk hinangde kaꞌam iyan dagey,
[4] paꞌinde, “Dumaꞌin ke Isa Almasi bakas nanggup weꞌ balik du iye pitu? Na, antag ne iye? Ubus ne matey meꞌ kapapuꞌanten bi,” paꞌinde, “saguwaꞌ dunya inin gaꞌ du pinda kemuwe tagnaꞌne pinapanjari.”
[5] Asal pagtuꞌurande gaꞌi inesseb weꞌ awwalley missā hadja Tuhanin bessuwang manjari langit duk bulakin, duk pinaguwaꞌ weꞌ ne bulakin amban dem boheꞌ. Duk kēmon bayuꞌ-bayuꞌan si dunyahin ellum sabab boheꞌ.
[6] Duk boheꞌ du isab makapagkaꞌat dunya tagnaꞌin sakaliꞌ ilatapan weꞌ Tuhanin.
[7] Saguwaꞌ bakas missā isab Tuhanin weꞌ langit duk bulak kuweꞌitu inin ineggas du bang tekka ne ellew pangahukumne meꞌ aꞌa manggaꞌi matalew si Tuhanin duk magmula siye kēmon.
[8] Saguwaꞌ meꞌ bagayku, daꞌa teꞌed kayipatanun bi da bayuꞌ inin weꞌ bang si Tuhan da ellewin kuweꞌ da ngibu tahun duk da ngibu tahunin kuweꞌ da ellew du. Saliꞌ-saliꞌ du si iye da ellewin duk da ngibu tahunin.
[9] Kannal meꞌ aꞌa sinduwehin weꞌ lomboy Tuhanin duk gaꞌi du tumananne sanggupnen. Saguwaꞌ hangkan gaꞌ pe tumananne peggeꞌ asal agad-agadne kaw du pagsusunanbi dusebin. Peggeꞌ gaꞌi iye bayaꞌ weꞌ niyaꞌ bisan dambuwaꞌ ilegga saguwaꞌ kabayaꞌannen weꞌ kēmon pagsusunande duk lebbahande duseden.
[10] Saguwaꞌ asal pitu du balik Isa Almasi, Panuhutanten bi. Keddut iyan papitunen, kuweꞌ katekka aꞌa panangkewin. Ellew iyan makakale meꞌ aꞌahin begeddu pales manamal duk bessuwang tunag weꞌ ebbut kēmon bayuꞌ-bayuꞌan diyataꞌ langitin duk lanyap langitin. Damikkiyan kēmon maniyaꞌ tuꞌu si dunyahin sampay dunyahin eggas du isab duk lanyap.
[11] Na, peggeꞌ kataꞌuhanbi ne weꞌ lanyap du kuweꞌ miyaꞌan dunya inin si pasōngan, subey ne pahāpbi meꞌ hinanganbin duk subey kaꞌam dambūs-būs nuhut Tuhanin
[12] sābubi mangagad-ngagad katekkanen. Paggeꞌesanun bi teꞌed ngahinang kinabayaꞌan Tuhanin duk mura tekka ellew papitunen - ellew kaꞌeggas langitin duk magkaꞌat ne duk meꞌ bayuꞌ-bayuꞌan diyataꞌ langitin tunag weꞌ ebbut.
[13] Saguwaꞌ bakas nanggup isab Tuhanin weꞌ urunganne kite bi langit baꞌahu duk dunya baꞌahu. Duk asal gaꞌ niyaꞌ laꞌat laꞌi, hāp hadja kēmon. Inin inagad-agadten bi.
[14] Hangkan hep meꞌ bagayku, sābubi mangagadan ellew miyaꞌan, geꞌesanun bi teꞌed supaya gaꞌ niyaꞌ laꞌat-laꞌatbi atawa sallaꞌ-sallaꞌbi si matahan Tuhan duk kasulutan Tuhanin si kaꞌam.
[15] Subey kimmatanbi weꞌ hangkan gaꞌi pe pitu Panuhutanten bi supaya makatagad pe meꞌ aꞌahin magsusunan duseden duk siye timbul. Si Paul, pungtinaꞌite bi kinalasahanin, kuweꞌ inin du isab sinulatne si kaꞌamin amban kataꞌu pangurung Tuhan si iyehin.
[16] Kuweꞌ miyaꞌan pinaꞌinne dem meꞌ sulatnen kahabaꞌ iye nulat. Niyaꞌ meꞌ paꞌinne hunit hināti hangkan meꞌ manggaꞌi makahātihin duk meꞌ mamura taboꞌo pasapeꞌin pindahande hātinen. Kuweꞌ miyaꞌan du isab hinangden si meꞌ sinduwe tasulat dem kitabin. Hangkan asal ilegga du siye sabab hinangande inin.
[17] Hangkan meꞌ bagayku, sessaꞌante kaꞌam. Kataꞌuhanbi ne du sabab inin, hangkan papateng-pateng kaꞌam kaw kaꞌam taboꞌo pasapeꞌ weꞌ meꞌ panoloꞌ meꞌ aꞌa malaꞌat inin duk gaꞌi ne kaꞌam pateteg si toloꞌ mabennalin.
[18] Saguwaꞌ subey pasōngbi ne paꞌin pangandelbi si lasa duk aseꞌ Isa Almasihin duk pasōngun bi pangataꞌubi iyehin. Iye Panuhutanten bi duk manimbul kitehin bi. Subey iye pinudji kuweꞌitu sampay salama-lama. Amin. Wassalam