[1] Sulatante kaꞌam sabab Isa Almasi, iye Lapal mangurung umulin. Tagnaꞌ awwalley pe teꞌed andang ne iye. Takale kami iye missā duk takite kami iye duk meꞌ mata kami inin. Aweꞌ, takite kami iye duk taꞌantan kami duk meꞌ tangan kami inin.
[2] Pinakitehan iye si bantuk manusiyaꞌ. Asal takite kami iye hangkan naksiꞌ kami ngakahan kaꞌam sabab mangurung umul manggaꞌ niyaꞌ tamanannen. Tagnaꞌley laꞌi iye si Samane Tuhanin duk pinakitehan iye si kami.
[3] Manjari inaka isab weꞌ kami si kaꞌam bakas takite duk takale kamihin supaya kaꞌam matuk si kami duk kite bi kapagdambuwaꞌ duk Samate bi Tuhanin duk sampay Anaknen, Isa Almasi.
[4] Sulatante kaꞌam inin supaya jukup kēgten bi kēmon.
[5] Inin bakas takale kami amban Isa Almasihin duk aka kami isab si kaꞌam: weꞌ Tuhanin asal dantaꞌ duk gaꞌ niyaꞌ kalindeman si iye. Hātinen asal gaꞌ teꞌed niyaꞌ duse-dusene.
[6] Hangkan bang paꞌinte weꞌ magdambuwaꞌ kite duk Tuhanin bu patennaꞌ pe kite dem lindem, hātinen maghinangan pe kite laꞌat, magdustaꞌ kite. Takite du si meꞌ bissāten duk si meꞌ hinanganten weꞌ magdustaꞌ kite.
[7] Saguwaꞌ bang patennaꞌanten dem dantaꞌ kuweꞌ Tuhanin dem dantaꞌ, manjari magdambuwaꞌ dem atey kite bi kēmon, duk sabab lahaꞌ si Isa, Anak Tuhanin, puwas kēmon duseten duk sutsi ne kite.
[8] Bang paꞌinte weꞌ gaꞌ niyaꞌ duse-dusete, akkalante hadja diten duk gaꞌ niyaꞌ kabennal dem ateyten.
[9] Saguwaꞌ bang bennalante duseten si Tuhan, ampunne duseten duk sutsine ateyten amban kēmon hinangante malaꞌatin. Peggeꞌ iye inin pananggup Tuhanin duk hinangannen bentel.
[10] Bang paꞌinte weꞌ gaꞌ kite bakas magduse, kuweꞌ du paꞌinte weꞌ Tuhanin dustaꞌan duk gaꞌ ennaꞌte meꞌ panoloꞌnen dem ateyte.