[1] Meꞌ anak-ampuku, sulatante kaꞌam inin supaya kaꞌam gaꞌi magduse. Saguwaꞌ bang niyaꞌ kapagduse, niyaꞌ du pasellet maghāp kite duk Samate Tuhanin. Mapasellet inin si Isa Almasi mabentelin.
[2] Duk Isa Almasi tahinang kuluban hep pamuwas duseten bi. Duk dumaꞌin hadja duseten bi saguwaꞌ sampay duse meꞌ manusiyaꞌin kēmon pinuwasan weꞌ Isa Almasi.
[3] Tabugtuꞌte bi weꞌ kataꞌuhante Tuhanin bang tuhutte bi meꞌ pangandaꞌakannen.
[4] Bang niyaꞌ aꞌa magpaꞌin weꞌ kataꞌuhanne Tuhanin, bu gaꞌi du tuhutne meꞌ pangandaꞌakannen, aꞌa miyaꞌan dustaꞌan duk gaꞌ niyaꞌ kabennal dem ateynen.
[5] Saguwaꞌ sasuku manuhut lapal Tuhanin iye mabugtuꞌ mamalasa si Tuhanin. Kuweꞌ inin pakabugtuꞌten weꞌ magdambuwaꞌ kite duk Tuhanin.
[6] Sasuku magpaꞌin weꞌ magdambuwaꞌ iye duk Tuhanin subey kawul-piꞌilnen kuweꞌ kawul-piꞌil si Isa Almasi patuꞌune si dunyahin.
[7] Na, meꞌ bagayku kinalasahankun, pangandaꞌakan sinulatku si kaꞌam inin dumaꞌin ne baꞌahu. Kemuwebi sandel pu si Isa Almasi, asal luꞌu ne si kaꞌam daꞌakan inin. Inin hep usihat bakas takalebin weꞌ subey kaꞌam maglasa-ilasa.
[8] Saguwaꞌ makajari isab kimmatante baꞌahu daꞌakan sinulatku inin. Pangandaꞌakan inin tinuhut weꞌ Almasi duk tinuhut isab weꞌ bi. Nagnaꞌ ne tahalaꞌ kalindemanin duk ninag ne dantaꞌ teꞌedin.
[9] Sasuku magpaꞌin weꞌ dem dantaꞌ ne iye, bu bunsi du iye si pagkasine masandel pu si Isa Almasihin, masi du iye dem kalindeman sampay kuweꞌitu.
[10] Saguwaꞌ mamalasa si pagkasine masandel pu si Isa Almasihin, patennaꞌannen dem dantaꞌ ne duk gaꞌ niyaꞌ makapagduse iye.
[11] Saguwaꞌ mabunsi si pagkasinen, dem lindem pe, hātinen maghinangan laꞌatan du iye. Lumengngan iye bu gaꞌi kataꞌuhanne bang tungan iye peggeꞌ kuweꞌ iye aꞌa pessek peggeꞌ gaꞌi iye makakite dem lindem.
[12] Sulatante kaꞌam meꞌ anak-ampuku, peggeꞌ taꞌampun ne meꞌ dusebin sabab Isa Almasi.
[13] Sulatante kaꞌam meꞌ aꞌa bahiꞌin, peggeꞌ kataꞌuhanbi du Almasihin, tagnaꞌ awwalley andang ne iye. Sulatante kaꞌam meꞌ lella mabataꞌin, peggeꞌ gaꞌi kaꞌam taboꞌo weꞌ meꞌ sassat nakuraꞌ seyitanin.
[14] Sulatante kaꞌam meꞌ anak-ampukun, peggeꞌ kataꞌuhanbi du Samabi Tuhanin. Sulatante kaꞌam meꞌ aꞌa bahiꞌin, peggeꞌ kataꞌuhanbi du Almasihin, andang ne iye tagnaꞌ awwalley. Sulatante kaꞌam meꞌ lella mabataꞌin, peggeꞌ pagen dem ateybin. Teteg lapal Tuhanin dem ateybi duk gaꞌi kaꞌam taboꞌo weꞌ meꞌ sassat nakuraꞌ seyitanin.
[15] Daꞌa kaꞌam kahāpan maghinang sa hinangan meꞌ aꞌa maꞌekka tuꞌu si dunya inin, duk daꞌa kaꞌam kahāpan si meꞌ bayuꞌ-bayuꞌan si dunya inin. Sasuku kahāpan si kēmon inin, gaꞌi malasa si Samane Tuhanin.
[16] Peggeꞌ kēmon sukuꞌ si dunya inin, hātinen meꞌ malaꞌat pagnapsuhan baranten, duk meꞌ takiteten bu pagnapsuhante, duk meꞌ pagabbuhan manusiyaꞌin, kēmon inin amban dunya inin hadja duk dumaꞌin amban Samate Tuhanin.
[17] Palabey du hadja dunya inin duk kēmon pagnapsuhan manusiyaꞌin. Saguwaꞌ kēmon maghinangan kinabayaꞌan Tuhanin, ellum si surgaꞌ salama-lama.
[18] Meꞌ anak-ampuku, sōng taꞌabut ne gantaꞌan dunya inin. Bakas kaꞌakahan ne kaꞌam weꞌ pitu du kuntara Almasihin. Kuweꞌitu ekka ne tuꞌu meꞌ kuntara Almasi hangkan kataꞌuhante weꞌ tapit ne gantaꞌan dunyahin.
[19] Meꞌ kuntara Almasi inin bakas nuhut kite bi du tagnaꞌ. Saguwaꞌ tahalaꞌ siye amban kite bi peggeꞌ gaꞌ du siye bennal magdambuwaꞌ dem atey duk kite bi. Bang asal magdambuwaꞌ dem atey siye duk kite bi, pateteg siꞌ siye miyaꞌan si kite bi. Saguwaꞌ tahalaꞌ siye supaya mattan weꞌ gaꞌ siye magdambuwaꞌ dem atey duk kite bi.
[20] Saguwaꞌ kaꞌam dumaꞌin kuweꞌ siyehin. Bakas ne pinapiyu weꞌ Almasi si kaꞌam Niyawa Sutsihin hangkan kēmon kaꞌam kataꞌuhanbi toloꞌ mabennalin.
[21] Sulatante kaꞌam dumaꞌin peggeꞌ awam kaꞌam si toloꞌ mabennalin, saguwaꞌ peggeꞌ kataꞌuhanbi du toloꞌ mabennalin. Duk kataꞌuhanbi isab weꞌ gaꞌ niyaꞌ dustaꞌ paguwaꞌ amban toloꞌ mabennalin.
[22] Na, sine teꞌ madustaꞌanin? Madustaꞌanin aꞌa magpaꞌinin weꞌ si Isa dumaꞌin Almasihin, iye tapeneꞌ Tuhan magbayaꞌin. Aꞌa magpaꞌin inin Kuntara Almasi. Gaꞌi iye kahagad si Tuhanin duk si Anaknen.
[23] Sasuku magpaꞌin weꞌ gaꞌi iye kahagad weꞌ si Isa Anak Tuhanin, gaꞌi isab iye kahagad si Tuhanin. Sasuku patampak magpaꞌin weꞌ si Isa asal Anak Tuhanin, kahagad du isab iye si Tuhanin.
[24] Hangkan ennaꞌunbi teꞌed dem ateybi usihat sabab si Isa Almasi bakas takalebin tagnaꞌbi sandel si iye. Bang teteg dem ateybi bakas takalebi miyaꞌan, asal magdambuwaꞌ ne kaꞌam duk Anak Tuhanin sampay Samanen.
[25] Bu iye hep inin bakas pananggup Almasihin weꞌ urunganne kite bi umul salama-lama.
[26] Sulatante kaꞌam inin sabab meꞌ aꞌa manuleyan kaꞌam mamadupangin supaya kaꞌam taboꞌode pasapeꞌ amban toloꞌ mabennalin.
[27] Saguwaꞌ bakas ne du pinapiyu weꞌ Almasi Niyawanen luꞌu dem ateybi hangkan gaꞌi ne kaꞌam subey tinoloꞌan weꞌ sine-sine. Toloꞌan Niyawa Tuhanin du kaꞌam sabab kēmon bayuꞌ-bayuꞌanin. Kēmon panoloꞌnen bennal. Gaꞌi iye magdustaꞌ. Hangkan tuhutun bi meꞌ panoloꞌnen supaya kaꞌam magdambuwaꞌ duk Almasi.
[28] Aweꞌ, meꞌ anak-ampuku, subey kaꞌam magdambuwaꞌ duk Almasi supaya si ellew papitune balikin, gaꞌi kite bi tinalew duk gaꞌi kite bi iyaꞌ nengge si harapanne.
[29] Kataꞌuhanbi weꞌ bentel Almasi hangkan kataꞌuhanbi weꞌ sasuku maghinangan mabentelin, anak Tuhanin iye.