[1] Sasuku kahagad weꞌ si Isa, Almasihin ne, iye tapeneꞌ Tuhan magbayaꞌin, anak Tuhanin ne iye. Upama, bang kalasahante aꞌahin, kalasahante du isab meꞌ anaknen.
[2] Hangkan bang malasa kite bi si Tuhan duk tuhutte meꞌ pangandaꞌakannen, malasa du isab kite bi si meꞌ pagkasite bi anak Tuhanin.
[3] Hāti mamalasa si Tuhanin, subey tuhutte meꞌ pangandaꞌakannen. Duk gaꞌi du hunit tinuhut meꞌ pangandaꞌakannen,
[4] peggeꞌ sasuku meꞌ anak Tuhanin, daꞌag weꞌ de bayuꞌ-bayuꞌan sassat dem dunyahin. Iye pangandaꞌagte bi meꞌ sassat dem dunyahin, sandelte bi pu si Isa Almasihin.
[5] Sine makadaꞌag meꞌ sassat dem dunyahin? Sasuku hadja makahagadin weꞌ si Isa Anak Tuhanin.
[6] Si Isa Almasi Anak Tuhanin. Kataꞌuhante iyan peggeꞌ pagtuꞌu iye si dunya, pinandi iye duk boheꞌ duk buꞌus lahaꞌnen pagmatey iye. Kataꞌuhante weꞌ iye Anak Tuhanin sabab boheꞌ pamandinen duk lahaꞌ mabuꞌusin, dumaꞌin hadja sabab boheꞌin. Duk naksiꞌ isab Niyawa Tuhanin weꞌ toꞌo du inin, peggeꞌ kēmon pinaꞌin Niyawa Tuhanin asal bennal.
[7] Manjari, tellu manaksiꞌin:
[8] Niyawa Tuhanin, boheꞌin duk lahaꞌin, tellu inin saliꞌ panaksiꞌden.
[9] Kahagadte bi panaksiꞌ manusiyaꞌin. Pasōng basag panaksiꞌ Tuhanin duk iye inin panaksiꞌ Tuhan sabab Anaknen.
[10] Sasuku sandel si Anak Tuhanin kataꞌuhanne dem ateyne weꞌ si Isa asal Anak Tuhanin. Saguwaꞌ manggaꞌi makahagad si Tuhanin kuweꞌ paꞌinne weꞌ magdustaꞌ Tuhanin peggeꞌ gaꞌi kahagadne panaksiꞌ Tuhan sabab Anaknen.
[11] Iye hep inin panaksiꞌ Tuhanin weꞌ kaꞌurunganne kite bi umul gaꞌ tamanan, duk umul salama-lama inin kaꞌurungan kite sabab Anaknen.
[12] Hangkan sasuku palaꞌihan Anak Tuhanin taga umul inin. Saguwaꞌ sasuku gaꞌi palaꞌihan Anak Tuhanin, gaꞌ niyaꞌ umulne salama-lama.
[13] Sulatante kaꞌam inin supaya kabugtuꞌanbi weꞌ taga umul du kaꞌam salama-lama. Sulat inin para si kaꞌam meꞌ masandel si Anak Tuhanin.
[14] Gaꞌi kite tinalew patapit si Tuhan, peggeꞌ kabugtuꞌante weꞌ ine-ine pākute si iye asal pakalene kite basta pinākuten patuhut du si kinabayaꞌannen.
[15] Duk peggeꞌ kataꞌuhante weꞌ takalene du pamākute si iyehin, kataꞌuhante du isab weꞌ pangurungne ne kite meꞌ pinākute si iyehin.
[16] Bang niyaꞌ aꞌa ngite pagkasine masandel pu si Isahin magduse bu dusenen dumaꞌin du katekkahan mulkaꞌ Tuhanin, subey pāku-pākuhanne ampun pagkasine miyaꞌan si Tuhan. Duk urungan Tuhanin du iye umul basta gaꞌ du iye kapagduse duse katekkahan mulkaꞌ Tuhanin. Niyaꞌ hep duse katekkahan mulkaꞌ Tuhanin duk gaꞌi kaꞌam paꞌinanku weꞌ subey kaꞌam māku-māku si Tuhan para si aꞌa makapagduse inin.
[17] Kēmon hinangan laꞌat duse du, saguwaꞌ niyaꞌ duse katekkahan mulkaꞌ Tuhanin.
[18] Kataꞌuhante bi weꞌ bang aꞌahin anak Tuhanin, gaꞌi ne iye magduse peggeꞌ inipat iye weꞌ Anak Tuhanin duk gaꞌi iye taboꞌo weꞌ nakuraꞌ seyitanin.
[19] Kataꞌuhante bi weꞌ kite bi sukuꞌ si Tuhan, saguwaꞌ kēmon meꞌ sinduwe si dunyahin si antanan nakuraꞌ seyitanin.
[20] Kataꞌuhante bi weꞌ bakas tapitu Anak Tuhanin duk kaꞌurunganne kite bi kataꞌu hangkan kataꞌuhante bi ne Tuhan mabennalin. Duk kite bi asal magdambuwaꞌ ne duk Tuhan mabennalin peggeꞌ magdambuwaꞌ ne kite duk Anaknen, Isa Almasi. Iye ne Tuhan mabennalin duk iye mangurung umul salama-lamahin.
[21] Meꞌ anak-ampuku, daꞌa kaꞌam magtuhan si meꞌ seddili amban Tuhan mabennalin. Wassalam