[1] Pakale kaꞌam. Asal hadje lasa Tuhan si kitehin bi. Hawal hadje lasanen inēnan kite bi weꞌ ne meꞌ anakne. Duk asal meꞌ anak Tuhanin hep kite bi. Peggeꞌ meꞌ aꞌa maꞌekka si dunyahin gaꞌi kataꞌuhande Tuhanin, hangkan gaꞌi kite bi kataꞌuhande.
[2] Meꞌ bagayku kinalasahankun, meꞌ anak Tuhanin ne kite bi; gaꞌ pe kite bi pinakitehan bang manjari ine kite bi. Saguwaꞌ kataꞌuhante bi weꞌ pagbalik Almasi pitu, manjari kuweꞌ iyehin ne kite bi peggeꞌ kitete bi ne teꞌed iyan bantuknen.
[3] Sasuku ngase-ngase weꞌ ujud kuweꞌ Almasihin du iye, subey luwal pasutsine ateynen kuweꞌ Almasihin sutsi.
[4] Sasuku magdusehin, langgalanne saraꞌ Tuhanin peggeꞌ bang magduse kite langgalante ne saraꞌ Tuhanin.
[5] Kataꞌuhanbi weꞌ pitu Almasi si dunya muwasan duse meꞌ manusiyaꞌin kēmon bu iye gaꞌ teꞌed niyaꞌ duse-dusene.
[6] Hangkan sasuku magdambuwaꞌ duk Almasihin, gaꞌi ne iye magduse. Sasuku magduse pe, gaꞌ bakas tasabutne sabab Almasi duk gaꞌ bakas kataꞌuhanne Almasi.
[7] Meꞌ anak-ampuku, pahatul-hatul kaꞌam supaya kaꞌam gaꞌi taboꞌo pasapeꞌ amban toloꞌ mabennalin. Sasuku maghinangan mabentelin, bentel iye kuweꞌ Almasihin.
[8] Sasuku luwal magdusehin, sukuꞌ si nakuraꞌ seyitanin iye. Peggeꞌ kemuwe tagnaꞌ awwalley magduse seyitanin. Duk iye jānnen hangkan Anak Tuhanin pitu si dunya, supaya pakaꞌatanne meꞌ hinangan seyitanin.
[9] Sasuku meꞌ anak Tuhanin, gaꞌi ne magduse peggeꞌ laꞌi ne dem ateyde addat Tuhanin. Duk peggeꞌ Tuhanin ne samaden, gaꞌi ne siye magduse.
[10] Inin pagbiddaꞌan meꞌ anak Tuhanin duk meꞌ anak seyitanin: manggaꞌi maghinangan mabentelin atawa manggaꞌi mamalasa si pagkasinen dumaꞌin iye anak Tuhanin.
[11] Tagnaꞌbi sandel pu si Isa Almasi iye inin usihat takalebin weꞌ subey kite bi maglasa-ilasa.
[12] Daꞌa kite bi kuweꞌ si Kabilin. Si Kabil ley sukuꞌ si seyitanin duk pinapatey weꞌ ne pungtinaꞌinen. Weꞌey teꞌ pinapatey weꞌ ne? Pinapatey weꞌ ne peggeꞌ meꞌ hinangan pungtinaꞌinen hāp bu meꞌ hinangannen laꞌat.
[13] Hangkan meꞌ kapungtinaꞌihanku, daꞌa kaꞌam ulaliꞌ bang kabunsihan kaꞌam weꞌ meꞌ aꞌa manggaꞌi manuhut Tuhanin.
[14] Kataꞌuhante bi weꞌ kuweꞌitu dumaꞌin ne kite bi kuweꞌ dalil bakas matey saguwaꞌ ellum ne teꞌed kite bi. Kataꞌuhante bi inin peggeꞌ kalasahante bi ne meꞌ pagkasiten bi. Manggaꞌi mamalasahin, kuweꞌ dalil matey pe iye.
[15] Sasuku bunsi si pagkasine, kuweꞌ du iye bakas mapatey. Duk kataꞌuhanbi weꞌ aꞌa bakas mamapateyin, gaꞌ niyaꞌ umulne salama-lama.
[16] Kataꞌuhante bi bang saꞌingge lasa mabennalin, peggeꞌ Almasi, sabab lasane si kitehin bi pangalillaꞌne umulnen duk matey iye muwasan meꞌ duseten bi. Hangkan kite bi isab subey pangalillaꞌte bi bisan umulten para si meꞌ pagkasiten bi.
[17] Bang niyaꞌ aꞌa taga kaꞌelluman bu takitene pagkasinen kasukalan bu gaꞌi tabangne sukal pagkasine miyaꞌan, hātinen gaꞌi iye malasa si Tuhan.
[18] Meꞌ anak-ampuku, daꞌa kite bi malasa si bissā hadja. Saguwaꞌ bang paꞌinte malasa kite si pagkasiten, subey patoꞌote bissāten duk patuhutante hinangan hāp si siye.
[19] Bang bennal kite malasa si pagkasiten bi, tandaꞌ inin weꞌ tinuhutten asal toloꞌ mabennalin hangkan sanyang dem ateyten si panaꞌanan Tuhanin.
[20] Bisan paꞌin ateyten weꞌ bakas kite kapagduse, sanyang du ateyten, peggeꞌ kataꞌuhante weꞌ pasōng kinataꞌuhan Tuhanin amban kinataꞌuhan ateyten, peggeꞌ Tuhanin kataꞌuhanne kēmon-kēmonin.
[21] Hangkan meꞌ bagayku kinalasahankun, bang kataꞌuhante dem ateyte weꞌ gaꞌ niyaꞌ dusete, gaꞌi kite talew pī si panaꞌanan Tuhanin.
[22] Ine-ine pākute si Tuhanin tasangkate peggeꞌ tuhutte meꞌ pangandaꞌakannen duk hinangte meꞌ makasulut iyehin.
[23] Inin pangandaꞌakanne si kitehin bi, weꞌ subey kite sandel si Anaknen, si Isa Almasi, duk subey isab kite bi maglasa-ilasa sa pangandaꞌakan Almasi kitehin bi.
[24] Sasuku manuhut meꞌ pangandaꞌakan Tuhanin, magdambuwaꞌ iye duk Tuhanin duk teteg Tuhanin si iye. Kataꞌuhante weꞌ magdambuwaꞌ kite duk Tuhanin sabab Niyawane Masutsi pinatennaꞌne dem ateyten.