[1] Meꞌ bagayku kinalasahankun, daꞌa magtawus kahagadun bi bang niyaꞌ meꞌ aꞌa magpaꞌin weꞌ laꞌi si siye Niyawa Tuhanin. Subey dahuꞌ pandogahanbi meꞌ panoloꞌden supaya kataꞌuhanbi bang bennal laꞌi si siye Niyawa Tuhanin atawa gaꞌ. Peggeꞌ ekka ne meꞌ aꞌa paguwaꞌ si meꞌ kalahat-lahatan tuꞌu si dunya magmā-mā nabi siye.
[2] Kuweꞌ inin pangilalehanbi meꞌ aꞌa palaꞌihan Niyawa Tuhanin: sasuku magpaꞌin weꞌ Isa Almasi bakas pitu si dunya magbaran manusiyaꞌ, aꞌa miyaꞌan palaꞌihan Niyawa Tuhanin.
[3] Saguwaꞌ sasuku magpaꞌin weꞌ gaꞌ Almasihin bakas pitu magbaran manusiyaꞌ, gaꞌ laꞌi si aꞌa miyaꞌan Niyawa Tuhanin. Saguwaꞌ takite si iye weꞌ tuhutne pikilan Kuntara Almasihin. Bakas taꞌaka ne hep si kaꞌam weꞌ pitu du Kuntara Almasi inin duk kuweꞌitu ekka ne meꞌ aꞌa si dunyahin nuhut pikilan Kuntara Almasihin.
[4] Saguwaꞌ, meꞌ anak-ampuku, kaꞌam iyan sukuꞌ si Tuhanin hep. Daꞌag weꞌ bi meꞌ aꞌa magmā-mā nabi siye sabab gaꞌi du kaꞌam taboꞌode nuhut meꞌ toloꞌden. Daꞌag siye weꞌ bi peggeꞌ Niyawa Tuhan dem ateybin balakatan amban niyawa malaꞌi si meꞌ aꞌa manggaꞌi manuhut Tuhanin.
[5] Meꞌ aꞌa magmā-mā nabi inin sukuꞌ si dunya hep hadja hangkan panoloꞌden sabab meꞌ bayuꞌ-bayuꞌan si dunya. Duk pinakale siye weꞌ meꞌ aꞌa sukuꞌ si dunyahin, meꞌ manggaꞌi manuhut Tuhanin.
[6] Saguwaꞌ kite bi inin sukuꞌ si Tuhan. Sasuku mangataꞌuhan Tuhanin pakale si kite bi. Sasuku dumaꞌin sukuꞌ si Tuhanin gaꞌi pakale si kite bi. Kuweꞌ inin pangataꞌuten bang toloꞌin amban Niyawa Tuhanin atawa gaꞌi.
[7] Meꞌ bagayku kinalasahankun, subey kite bi maglasa-ilasa peggeꞌ lasahin amban Tuhan. Sasuku asal mamalasahin, anak Tuhanin iye duk kataꞌuhanne Tuhanin.
[8] Manggaꞌi mamalasahin gaꞌi kataꞌuhanne Tuhanin peggeꞌ Tuhanin malasa hep teꞌed.
[9] Kuweꞌ inin pamakite Tuhan lasane si kitehin: pinapitu weꞌ ne si dunya Anakne dambuwaꞌ-buwaꞌin supaya kite bi taga umul gaꞌ tamanan si surgaꞌ sabab Anaknen.
[10] Lasa mabennalin dumaꞌin lasate si Tuhanin, saguwaꞌ lasa Tuhan si kitehin. Duk hawal lasane si kitehin pinapitu weꞌ ne Anaknen si dunya supaya taꞌampun duseten bi sabab iye.
[11] Meꞌ bagayku kinalasahankun, bang kuweꞌ inin hadje lasa Tuhan si kitehin bi, na, kite bi isab subey maglasa-ilasa.
[12] Gaꞌ niyaꞌ aꞌa bakas ngite Tuhanin. Saguwaꞌ bang kite bi maglasa-ilasa, tuꞌu Tuhanin dem ateyte bi. Magkasōng isab lasate bi si Tuhanin duk ujud jukup bang kite bi tattap maglasa-ilasa.
[13] Kabugtuꞌante bi weꞌ magdambuwaꞌ kite bi duk Tuhanin duk teteg isab Tuhanin si kite bi peggeꞌ pinangurung weꞌ Tuhanin Niyawanen si kite bi.
[14] Duk bakas takite kami duk naksiꞌ isab kami weꞌ bakas pinapitu weꞌ Tuhanin Anaknen si dunya nimbul meꞌ manusiyaꞌin kēmon.
[15] Sasuku magbennal si meꞌ aꞌa weꞌ si Isa Anak Tuhanin, teteg iye si Tuhan duk teteg Tuhanin si iye.
[16] Kataꞌuhante bi ne duk ngandel kite bi weꞌ kalasahan Tuhanin kite bi. Tuhanin malasa teꞌed, duk sasuku matuyuꞌ malasa si Tuhanin duk si pagkasine, teteg iye si Tuhan duk teteg isab Tuhanin si iye.
[17] Pinajukup lasate bi si Tuhanin, supaya kite bi gaꞌi tinalew si ellew pangahukumne meꞌ manusiyaꞌin kēmon, peggeꞌ kataꞌuhante bi weꞌ addatte bi tuꞌu si dunyahin kuweꞌ du addat si Isahin.
[18] Lasa mabennalin gaꞌi sagetan talew peggeꞌ bang asal bennal kite malasa si Tuhan, lanyap talewten. Sasuku tinalew gaꞌi pe jukup lasanen peggeꞌ talew iye kaw iye ilegga weꞌ Tuhanin.
[19] Malasa kite bi peggeꞌ Tuhanin dehellu mamalasa si kitehin bi.
[20] Bang niyaꞌ magpaꞌin weꞌ malasa iye si Tuhan bu kabunsihanne du pagkasinen, magdustaꞌ iye. Peggeꞌ bang gaꞌi iye malasa si pagkasine takitenen, inumey pangalasane Tuhan manggaꞌi takitenen?
[21] Iye inin daꞌakan pinangurung Almasi si kitehin bi weꞌ sasuku mamalasa si Tuhanin, subey isab malasa si pagkasinen.