[1] Peggeꞌ Almasi mabalakatanin hangkan hep subey teꞌed kite pateteg nuhut meꞌ toloꞌ mabennal bakas takaleten supaya kite gaꞌi taboꞌo pasapeꞌ amban Tuhanin.
[2] Saraꞌin, iye lapal pinasampay weꞌ meꞌ malaꞌikatin pī si meꞌ kapapuꞌanten bi awwalley, kataꞌuhan weꞌ asal bennal teꞌed duk sine-sine gaꞌ nuhut atawa gaꞌ kahagad si lapal miyaꞌan ilegga iye matalep si iyehin.
[3] Hangkan hep inumey kalumeppate amban mulkaꞌ Tuhanin bang gaꞌi hinangte ine katimbulan mahadje inin? Panuhutanin si Isa, iye hep dehellu-dehellu magpalataꞌ sabab katimbulan inin, ubus meꞌ bakas makakale iyehin, pinabugtuꞌ weꞌ de si kite bi weꞌ inin bennal.
[4] Duk padūs isab Tuhanin si siye, binennalan weꞌ ne bissāden sakaliꞌ siye inurungan weꞌ ne balakat maghinang kēmon bayuꞌ-bayuꞌan hinangan makaꞌulaliꞌ duk meꞌ hinangan balakatan. Duk amban bayaꞌ Tuhanin inurungan siye weꞌ ne meꞌ bayuꞌ-bayuꞌan kapandeyan amban Niyawa Sutsihin.
[5] Gaꞌ tapeneꞌ weꞌ Tuhanin meꞌ malaꞌikatin dinaꞌak magbayaꞌ si dunya baꞌahu si pasōnganin. Iye inin dunya pagbissāhante bi kuweꞌituhin.
[6] Saguwaꞌ iye tapeneꞌnen manusiyaꞌin. Tasulat hep dem kitab, pinaꞌin, “O Tuhan, weꞌey meꞌ manusiyaꞌin tapikil weꞌ nu? Weꞌey siye hatulnu bu manusiyaꞌ du hadja siye?
[7] Pinadiyawaꞌ dahuꞌ siye daddaliꞌ weꞌ nu amban meꞌ malaꞌikatin, ubus bu sinanglitan siye duk pinahadje siye weꞌ nu,
[8] duk urungannu siye kapatut magbayaꞌ si kēmon-kēmonin.” Pinaꞌin tuꞌu weꞌ manusiyaꞌin inurungan weꞌ Tuhanin kapatut magbayaꞌ si kēmon-kēmonin. Gaꞌ niyaꞌ weꞌ gaꞌi pagbayaꞌanne. Sarun bang kuweꞌitu gaꞌi pe takitete bi manusiyaꞌin magbayaꞌ si kēmon-kēmonin.
[9] Saguwaꞌ kataꞌuhante bi weꞌ si Isa magbayaꞌ ne teꞌed kuweꞌitu. Toꞌo bakas dahuꞌ iye daddaliꞌ pinadiyawaꞌ amban meꞌ malaꞌikatin, sakaliꞌ iye manjari manusiyaꞌ supaya iye matey ngagantiꞌan meꞌ manusiyaꞌin hawal lasa duk aseꞌ Tuhan si kitehin bi. Duk kataꞌuhante bi weꞌ kuweꞌitu pinudji teꞌed iye duk pinahadje teꞌed sabab kamatey talabeynen.
[10] Tuhanin, iye magpapanjari duk mamanteyan kēmon-kēmonin, patut teꞌed hininangnen pamalabeyne si Isahin. Pinalabey weꞌ ne si Isa dem kabinasahan pamakitene weꞌ si Isa asal bennal makajari nimbul manusiyaꞌin. Pinalabey iye dem kabinasahan supaya ekka manusiyaꞌ tahinang meꞌ anak Tuhanin duk tumuhut pu si Isa pinudji. Peggeꞌ si Isa hep manimbul siyehin.
[11] Sinutsi weꞌ si Isa meꞌ manusiyaꞌin amban meꞌ duseden. Iye duk meꞌ aꞌa sinutsinen dambuwaꞌ du hadja Samaden kēmon. Hangkan hep si Isa gaꞌi iyaꞌ ngēnan siye meꞌ pungtinaꞌine.
[12] Paꞌinne si Tuhanin, “Akahanku meꞌ pungtinaꞌikun sabab tahinangnun duk pudjite kew laꞌi si pagtipunande.”
[13] Paꞌinne pe, “Tuhanin pangandelankun.” Duk paꞌinne isab, “Tiyaꞌ ku duk meꞌ kaꞌanakanku pinangandel si aku weꞌ Tuhanin.”
[14] Meꞌ inēnan si Isa meꞌ anakin, meꞌ manusiyaꞌ siye taga isi duk tolang. Hangkan si Isa isab manjari manusiyaꞌ kuweꞌ siyehin supaya iye makalabey kamatey. Duk sabab kamateynen daꞌag weꞌ ne nakuraꞌ seyitan mamoꞌo kamatey si manusiyaꞌin.
[15] Sabab hinanganne inin, tinabangan weꞌ ne meꞌ matalew mamateyin duk pinaluwas siye weꞌ ne amban talewden. Peggeꞌ tiggelande maꞌellumin, talew teꞌed siye matey hangkan kuweꞌ siye ginapus weꞌ talewden.
[16] Pastiꞌ weꞌ dumaꞌin meꞌ malaꞌikatin tinabangannen. Saguwaꞌ kuweꞌ tasulat dem kitabin, “Tinabangannen meꞌ tubuꞌ Ibrahimin.”
[17] Hātine inin subey teꞌed iye manjari manusiyaꞌ kuweꞌ meꞌ pungtinaꞌinen, duk talabeyne kēmon talabeyden supaya iye taꞌu maꞌaseꞌ si siye duk supaya iye manjari imam nakuraꞌ kapangandelan, pasellet si meꞌ aꞌahin duk Tuhanin supaya duse meꞌ manusiyaꞌin taꞌampun.
[18] Duk kuweꞌitu tatabangne ne meꞌ aꞌa tasassatin supaya siye gaꞌi taboꞌo magduse peggeꞌ bakas iye makalabey sinassat duk bininasa.