[1] Na kuweꞌitu, ngajanjiꞌ isab Tuhanin si kite bi weꞌ makajari kite bi umasek dem pahalihan bakas binissāne miyaꞌan. Hangkan subey kite bi pahatul-hatul kaw niyaꞌ kite bi gaꞌi tapī si pahalihan pananggupne miyaꞌan.
[2] Peggeꞌ takalete bi ne aka-aka mahāpin, iye bakas takale meꞌ kapapuꞌanten bi masaley. Takalede lapal miyaꞌan saguwaꞌ gaꞌ du niyaꞌ kahāpan taꞌeddoꞌde peggeꞌ gaꞌ du kahagadde.
[3] Na, kite bi meꞌ makahagadin, kite bi maꞌumasek pī dem pahalihan pananggup Tuhan inin. Saguwaꞌ meꞌ manggaꞌi makahagadin gaꞌi umasek. Bakas paꞌin Tuhanin hep, “Astel ku, hangkan ngajanjiꞌ ku weꞌ asal gaꞌi teꞌed siye umasek dem lahat pamahalihanku siꞌ siyehin.” Dumaꞌin hangkan paꞌin Tuhanin inin peggeꞌ gaꞌ pe memes pahalihanin. Andang ne memes kemuwe ubus ne pinapanjari dunyahin.
[4] Peggeꞌ tasulat hep dem kitab sabab ellew pituꞌin, pinaꞌin, “Tuhanin pahali si ellew pituꞌin sabab ubus ne kēmon pinapanjarinen.”
[5] Bakas tabatsate ne pinaꞌin Tuhan inin, paꞌinne, “Asal gaꞌi teꞌed siye umasek dem lahat pamahalihanku siꞌ siyehin.”
[6] Meꞌ aꞌa dehellu makakale aka-aka hāp sabab pahalihan inin, gaꞌ umasek pī pahali peggeꞌ gaꞌ siye kahagad si Tuhanin. Saguwaꞌ niyaꞌ meꞌ aꞌa seddili paꞌasek Tuhanin du pī.
[7] Kataꞌuhante inin peggeꞌ niyaꞌ pe ellew seddili kineddewan weꞌ Tuhanin paꞌasekan meꞌ aꞌahin pī. Ellew miyaꞌan inēnan “Ellew Inin.” Piyen tahun palabey masa aꞌa dehellu manggaꞌi makahagadin, pinabissā si Daꞌud weꞌ Tuhanin meꞌ bissā miyaꞌan, pinaꞌin, “Bang takalebi suwala Tuhanin ellew inin, daꞌa patuwasun bi ateybin.”
[8] Gaꞌ hep taboꞌo si Yussaꞌ meꞌ aꞌahin pī si pahalihan teꞌed pananggup Tuhanin, peggeꞌ bang siye miyaꞌan taboꞌone, gaꞌ ne siꞌ Tuhanin missā sabab ellew seddili.
[9] Na, peggeꞌ kuweꞌ miyaꞌan ne, hangkan niyaꞌ pe teꞌed pahalihan meꞌ aꞌa Tuhanin supaya siye humali kuweꞌ humali Tuhanin si kapituꞌ ellewnen puwas kēmon pinapanjari weꞌ ne.
[10] Peggeꞌ sasuku umasek dem pahalihan pananggup Tuhanin, humali ne iye amban hinangnen kuweꞌ Tuhanin humali amban kēmon hinangnen.
[11] Hangkan hep subey pagtuyuꞌante bi teꞌed paꞌasek pī dem pahalihan miyaꞌan supaya gaꞌ niyaꞌ kite bi sumaliꞌ si meꞌ aꞌa masaley gaꞌ dumiyalem sabab kulang sandelden si Tuhan.
[12] Lapal Tuhanin balakatan duk makaꞌurung umul salama-lama. Lapal Tuhanin dalil kalis talem, saguwaꞌ pasōng pe talemnen amban kalis peggeꞌ lagbas bisan pī dem ateyte duk niyawate. Duk lapal Tuhanin magintaꞌu bang ine dem pikilan duk dem atey manusiyaꞌin.
[13] Gaꞌ niyaꞌ bisan ine katapukante amban Tuhan peggeꞌ kēmon pinapanjarinen tampal si pagmatahanne. Duk si pasōngan kēmon kite bi subey paharap si iye magbennal sabab kēmon kahinanganten bi.
[14] Niyaꞌ Imam Nakuraꞌte bangsahan manamal, īꞌ ne iye hap pī laꞌi si panaꞌanan Tuhanin. Iye si Isa, Anak Tuhanin. Hangkan hep subey pahagette bi teꞌed sandelte si iyehin.
[15] Duk Imam Nakuraꞌte inin maꞌaseꞌ si kite bi peggeꞌ kataꞌuhanne meꞌ kalammahanten bi, sabab bakas iye manusiyaꞌ kuweꞌ kitehin bi. Talabeyne meꞌ bayuꞌ-bayuꞌan sassat amban nakuraꞌ seyitanin kuweꞌ kitehin bi du isab saguwaꞌ gaꞌ iye taboꞌo magduse.
[16] Peggeꞌ niyaꞌ ne Imam Nakuraꞌte bi hangkan hep subey kite bi gaꞌi talew patapit si Tuhan ngampun-ngampun si iye peggeꞌ malasa duk maꞌaseꞌ iye. Maꞌaseꞌ iye si kite bi duk tabanganne kite bang baytute kasigpitan.