[1] Bang kite bi inin, iliput kite bi weꞌ meꞌ aꞌa mabanes manuhut Tuhan masaley duk naksiꞌ siye weꞌ kapangandelan teꞌed Tuhanin. Panuhutte bi Tuhanin kuweꞌ dalil maglakkesan magubas. Hangkan subey lebbahante ine-ine makasimbel kite bi si pamagubasanten bi duk subey lebbahante duse katagihanten bi. Duk subey kite bi magtuyuꞌ teꞌed dalil magubas sa pangandaꞌakan Tuhan kitehin bi.
[2] Subey patetegte sandelten pu si Isa peggeꞌ iye poꞌon sandelten bi duk katekkahannen. Sinandalan weꞌ ne ilansang diyataꞌ olomin duk gaꞌ iye iyaꞌ matey diyataꞌ olom miyaꞌan, peggeꞌ kataꞌuhanne weꞌ niyaꞌ pagkēg-kēgan panumbas Tuhanin si iye. Na, kuweꞌitu īꞌ ne iye laꞌi ningkoloꞌ si kanawanan Tuhanin.
[3] Pikilun bi teꞌed meꞌ sinandalannen amban meꞌ aꞌa dusehanin hawal bunside si iyehin! Pikilun bi iye supaya gaꞌi ngalamma sandelbin duk supaya kaꞌam gaꞌi jumuꞌ.
[4] Kataꞌuhanbi du weꞌ gaꞌ pe kaꞌam niyaꞌ pinapatey sabab panuwasbi duse manassat kaꞌamin.
[5] Takayipatbi ne ke meꞌ bissā makaꞌasig-asig pinaꞌin Tuhan si kaꞌamin, paginēnan kaꞌam weꞌ ne meꞌ anakne? Tasulat dem kitab, paꞌinne, “Meꞌ anakku, asipun bi bang kaꞌam toloꞌanku. Duk daꞌa kaꞌam jumuꞌ nuhut aku bang kaꞌam leggaku.
[6] Peggeꞌ kēmon kinalasahankun toloꞌanku, duk meꞌ kinimmatanku anakkun leggaku du.”
[7] Hangkan hep bang niyaꞌ katiksaꞌan pinatekka si kaꞌam, sandalanun bi hadja peggeꞌ katiksaꞌan inin panoloꞌ Tuhanin kaꞌam sabab pangimmatne kaꞌamin me anakne. Niyaꞌ ke nakanak gaꞌi legga samanen panoloꞌne iye?
[8] Bang gaꞌi kaꞌam leggane panoloꞌne kaꞌam sa hinanganne si kēmon meꞌ anaknen, na, hātinen dumaꞌin kaꞌam bennal meꞌ anakne.
[9] Bisan meꞌ samate bi tuꞌu si dunyahin, leggade du kite bi duk masi du siye pagaddatante bi. Na, pasōng ne teꞌed kite subey magpadiyawaꞌ si Samate bi si surgaꞌin supaya kite urunganne umul gaꞌ tamananne.
[10] Meꞌ samate bi si dunyahin gaꞌi du tiggel bang kite bi leggade, duk pangaleggaden iye tinuhutden pikilande kahāpanden. Saguwaꞌ Tuhanin bang kite leggane, leggane kite para si kahāpante bi supaya kite bi ngabentel kuweꞌ iyehin.
[11] Bang kite ilegga, gaꞌi kite sinna peggeꞌ kahunitan kite. Saguwaꞌ bang kite legga Tuhanin bu sandalante duk kahagadte, kaꞌujudannen bentel ne meꞌ hinanganten duk sanyang ne dem pikilanten.
[12] Na, hangkan hep paꞌasigun bi ateybin duk pahagetun bi sandelbin.
[13] Daꞌa kaꞌam pasapeꞌ amban lān mabentelin supaya meꞌ saweꞌbi malamma sandelde si Tuhanin gaꞌi namba duwe-duwehan saguwaꞌ supaya ngabasag sandelden.
[14] Halliꞌanun bi teꞌed magsasaꞌ-sasaꞌin duk pagtuyuꞌanun bi teꞌed weꞌ kawul-piꞌilbin sutsi hadja si matahan Tuhan. Peggeꞌ sine-sine gaꞌi sutsi asal gaꞌi kitene Tuhanin.
[15] Pahatul-hatul kaꞌam peggeꞌ malasa duk maꞌaseꞌ Tuhanin bu kaw tatayikutanbi. Aꞌa manayikutan Tuhanin, dalilnen kuweꞌ iye jambangan buwaꞌnen paꞌit duk bisa. Sasewne meꞌ masandel si Tuhanin duk ujudnen katimboꞌohan weꞌ ne meꞌ sinduwehin magduse kuweꞌ iyehin.
[16] Damikkiyan pahatul-hatul kaꞌam supaya gaꞌ niyaꞌ kaꞌam magjina duk supaya gaꞌ niyaꞌ kaꞌam kuweꞌ si Esawin gaꞌi kimmatanne Tuhanin. Si Esaw inin, peggeꞌ iye anak sakahin, sukuꞌ si iye janjiꞌ Tuhanin. Saguwaꞌ pinagsambiꞌ weꞌ ne duk da pinggan kinakan kēmon sukuꞌ si iyehin, sukuꞌ si anak sakahin.
[17] Kataꞌuhanbi du weꞌ pagtiggel-tiggel ne, mabayaꞌ iye weꞌ pākuhan samanen iye ledjikiꞌ si Tuhan saguwaꞌ gaꞌ tatuhut kinabayaꞌannen peggeꞌ gaꞌi ne kapindahanne bakas tahinangnen. Gaꞌi ne tepe si iye balik bakas pinagsambiꞌnen bisan pe saꞌingge pagtangisnen.
[18] Kaꞌam kuweꞌitu bang kaꞌam patapit si Tuhan, dumaꞌin kaꞌam kuweꞌ meꞌ kapapuꞌan bangsa Israꞌil masaley. Peggeꞌ takitede patapitanden. Papīde si higad punu Turusinahin masaley, takitede punuhin kayat weꞌ ebbut bu lindem dem paglahatin duk pales baliyuhin.
[19] Niyaꞌ takalede kuweꞌ hellingan tabuliꞌ duk takalede isab suwala Tuhanin. Pagkale meꞌ aꞌahin suwala miyaꞌan, buyuꞌ-buyuꞌde teꞌed gaꞌi ne dinaꞌak missā balik peggeꞌ tinalew teꞌed siye.
[20] Tinalew teꞌed siye sabab binissānen. Paꞌinne hep, “Daꞌa kaꞌam patapit pitu si punu inin. Bang niyaꞌ patapit pitu, bisan hayep, subey pagtibagan duk batu sampay matey.”
[21] Makatalew-talew teꞌed takiteden duk bisan si Musa nambat, paꞌinne, “Migpid ku hawal talewkun.”
[22] Saguwaꞌ kaꞌam kuweꞌitu, patapit ne kaꞌam si Punu Siyon, duk si puweblo palaꞌihan Tuhan maꞌellumin. Iyan puweblo Awrusalam si surgaꞌin duk ibuhan meꞌ malaꞌikat malaꞌihin.
[23] Laꞌi kaꞌam si pagtipunan meꞌ inēnan anak Tuhan sakahin, meꞌ ēnden tasulat laꞌi si surgaꞌ. Matuk ne kaꞌam si siye kēgan. Laꞌi kaꞌam si panaꞌanan Tuhanin, iye mangahukum kēmon manusiyaꞌin. Duk laꞌi isab kaꞌam si meꞌ niyawa meꞌ aꞌa mabentel bakas mamateyin ne, gaꞌ ne niyaꞌ sallaꞌ-sallaꞌde.
[24] Patapit ne isab kaꞌam pu si Isa, iye mamatengge janjiꞌ baꞌahuhin. Pinatengge janjiꞌ baꞌahuhin sabab kabuꞌus lahaꞌnen supaya kite bi sutsi duk ampun Tuhanin kite bi. Kaꞌujudan lahaꞌ si Isa mabuꞌusin pasōng teꞌed hāp amban kaꞌujudan lahaꞌ si Habil awwalley, peggeꞌ kamatey si Habilin, kaꞌujudannen makalimuwasan iye.
[25] Hangkan pahatul-hatul kaꞌam. Pakalehun bi teꞌed lapal Tuhanin duk daꞌa saggaꞌun bi. Peggeꞌ niyaꞌ meꞌ aꞌa masaley gaꞌi ngatu pakale pu si Musa, mamoꞌo lapal Tuhanin tuꞌu si dunya, asal ilegga siye weꞌ Tuhanin. Na, pasōng ne kite bi asal ilegga bang gaꞌi pakalete bi Tuhan mamissā amban surgaꞌin.
[26] Masaley jedjeg bulakin weꞌ suwala Tuhanin. Saguwaꞌ kuweꞌitu magaka iye, paꞌinne, “Niyaꞌ waktu jedjegku du balik dumaꞌin hadja dunyahin saguwaꞌ sampay diyataꞌ langitin.”
[27] Iye inin hāti bissā miyaꞌan, weꞌ meꞌ bayuꞌ-bayuꞌan bakas pinapanjarihin ujud jinedjeg du duk lanyap, bu meꞌ bayuꞌan manggaꞌi tajedjegin iye miyaꞌan talebbihin.
[28] Hangkan subey kite bi magsukul teꞌed si Tuhan peggeꞌ kite bi meꞌ aꞌane laꞌi si lahat pagbayaꞌannen duk lahatne miyaꞌan gaꞌi teꞌed usaꞌ salama-lama. Subey kite bi ngisbat si iye duk pangisbatten bi subey makasulut iyehin. Subey kite bi magaddat si iye duk subey kite bi talew si iye,
[29] peggeꞌ Tuhanten bi bang ngalegga kuweꞌ ebbut hadje.