[1] Meꞌ kapungtinaꞌihanku masandel pu Almasihin, kaꞌam isab bakas tapeneꞌ weꞌ Tuhanin hinangne meꞌ aꞌane. Pikilun bi pasal si Isa. Pinapitu iye weꞌ Tuhanin si kite bi duk tahinang iye Imam Nakuraꞌ āgamaten bi.
[2] Pineneꞌ iye weꞌ Tuhanin ngahinang inin duk matuyuꞌ teꞌed iye si hinangnen. Kuweꞌ iye si Musahin, peggeꞌ si Musa matuyuꞌ teꞌed isab si hinangne si lumaꞌ Tuhanin, hātinen hinangnen magnakuraꞌ si meꞌ aꞌa Tuhanin.
[3] Saguwaꞌ kuweꞌ aꞌa ngahinang lumaꞌin binantu amban lumaꞌ hininangnen, damikkiyan si Isa pataꞌ pe teꞌed pinahadje amban si Musa.
[4] Toꞌo, kēmon lumaꞌ niyaꞌ aꞌa ngahinangne, saguwaꞌ Tuhanin mangahinang kēmon-kēmonin.
[5] Si Musa daraꞌakan iye, duk matuyuꞌ teꞌed iye maghinang si lumaꞌ Tuhanin, duk pinalataꞌ weꞌ ne sabab meꞌ bissā binissā Tuhan si pasōnganin.
[6] Saguwaꞌ Almasi, Anak Tuhanin iye, duk matuyuꞌ teꞌed iye magbayaꞌ si lumaꞌ Tuhanin. Kite bi hep lumaꞌ Tuhan pagbayaꞌan Almasihin bang patetegte teꞌed sandelten pu Almasi duk bang sinna teꞌed kite ngase-ngase si meꞌ janjiꞌnen.
[7] Hangkan hep subey teꞌed pikilte bi bakas tasulat dem kitab pinaꞌin Niyawa Sutsihin. Paꞌinne, “Bang takalebi suwala Tuhanin missā ellew inin,
[8] daꞌa kaꞌam magtuwas atey kuweꞌ meꞌ kapapuꞌanbi masaley gaꞌi ngatu nuhut Tuhanin. Masa miyaꞌan laꞌi si lahat makagindew-gindew sinuleyan weꞌ de Tuhanin bang niyaꞌ ke tahinangne si siye.
[9] Sinuleyan ku weꞌ de, paꞌin Tuhanin, bang tahaꞌ ke pasensiyakun si siye bu dem ampatpūꞌ tahun takitede meꞌ hinanganku mabalakatanin.
[10] Hangkan hep ku astel si meꞌ aꞌa miyaꞌan duk paꞌinku, ‘Meꞌ aꞌa inin luwal ne hadja paseddili pamikilden duk gaꞌi siye ngatu nuhut meꞌ pangandaꞌakanku siyehin.’
[11] Astel ku si siye hangkan ngajanjiꞌ ku, paꞌinku, ‘Asal gaꞌi teꞌed siye umasek dem lahat sōng pamahalihanku siꞌ siyehin,’ paꞌin Tuhanin.”
[12] Meꞌ pagkasiku masandel pu Almasihin, subey kaꞌam pahatul-hatul teꞌed kaw niyaꞌ kaꞌam luꞌu laꞌatan pagateybin, duk gaꞌi kahagad duk tayikutanbi ne Tuhan maꞌellumin.
[13] Iye subey hinangbi supaya gaꞌ niyaꞌ kaꞌam kaꞌakkalan weꞌ duse duk supaya gaꞌi ujud ngatuwas ateybin, subey kaꞌam magasig-inasig ateybin ellew-ellew, pādpād gaꞌ pe magtamanan ellew inēnan “Ellew Inin.”
[14] Peggeꞌ kite bi kēmon magsaweꞌ duk Almasi bang pahagette teꞌed sandelte si iyehin amban tagnaꞌannen sampay si katapusannen.
[15] Iye inin paꞌin kitabin, “Bang takalebi suwala Tuhanin ellew inin, daꞌa patuwasun bi ateybin kuweꞌ meꞌ kapapuꞌanbin masaley gaꞌi teꞌed ngatu nuhut Tuhanin.”
[16] Sine teꞌ meꞌ aꞌa makakale suwala Tuhanin, saguwaꞌ gaꞌi siye ngatu nuhut Tuhanin, bang dumaꞌin meꞌ aꞌa bakas binoꞌo weꞌ si Musa paluwas amban lahat Misilin.
[17] Sine teꞌ meꞌ aꞌa kaꞌastelan weꞌ Tuhanin dem ampatpūꞌ tahunin, bang dumaꞌin meꞌ aꞌa magduse si iyehin hangkan matey siye laꞌi si lahat makagindew-gindew.
[18] Duk sabab sine teꞌ binissā Tuhanin sakaliꞌ iye ngajanjiꞌ, paꞌinne, “Asal gaꞌi teꞌed siye umasek dem lahat pamahalihanku siꞌ siyehin?” Siye meꞌ aꞌa manggaꞌi mangatu nuhut iyehin.
[19] Tahātite weꞌ hangkan siye gaꞌ umasek dem lahat miyaꞌan, peggeꞌ gaꞌ siye kahagad.