[1] Iye hāti meꞌ pinaꞌinku si kaꞌam miyaꞌan inin weꞌ kuweꞌitu niyaꞌ ne Imam Nakuraꞌte bi tudju Tuhan. Īꞌ iye laꞌi si surgaꞌ ningkoloꞌ si kanawanan Tuhan Mabalakatanin.
[2] Laꞌi iye magimam si Lugal Tamanan Masutsihin, hātinen laꞌi si langgal mabennalin, dumaꞌin manusiyaꞌ mamatengge iyehin saguwaꞌ Tuhanin.
[3] Kēmon imam nakuraꞌin pinasukuꞌan siye hinang magpasampay pī si Tuhan meꞌ pangurung meꞌ aꞌahin duk meꞌ kulubanden. Na, Imam Nakuraꞌten damikkiyan isab subey niyaꞌ pagkulubanne.
[4] Bang tuꞌu pe iye miyaꞌan si dunya, bugtuꞌ gaꞌi iye magimam, peggeꞌ kemuwe matuꞌuhin niyaꞌ ne meꞌ imam duk sa pangandaꞌakan saraꞌ Yahudihin pasampayde meꞌ pangurung meꞌ aꞌahin si Tuhan.
[5] Meꞌ hinang meꞌ imamin dem langgal tuꞌu si dunya kuweꞌ lingew hadja peggeꞌ ilekkat hadja hinang malaꞌi si surgaꞌin. Kataꞌuhante inin peggeꞌ sakaliꞌ si Musa sōng maghinang lumaꞌ duk kuwit hayep, iye langgalde masaley, sinessaꞌan iye weꞌ Tuhanin, paꞌinne, “Amey-amey lekkatun teꞌed bantuk pattaꞌ bakas pinakitehanku si kaꞌu laꞌi diyataꞌ punuhin.”
[6] Saguwaꞌ kuweꞌitu hinang si Isa magimamin pasōng hāp amban hinang meꞌ imam tuꞌu si dunyahin. Damikkiyan isab janjiꞌ baꞌahu pinapitune pamaghāpne manusiyaꞌ duk Tuhanin pasōng hāp amban janjiꞌ dehelluhin peggeꞌ pasōng hāp meꞌ pananggup Tuhanin dem janjiꞌ baꞌahuhin.
[7] Bang gaꞌ siꞌ miyaꞌan niyaꞌ sallaꞌ-sallaꞌ pagjanjiꞌan tagnaꞌin, na, gaꞌ ne siꞌ gantiꞌan Tuhanin pagjanjiꞌan miyaꞌan.
[8] Saguwaꞌ gaꞌ kasulutan Tuhanin si meꞌ hinangan meꞌ aꞌa manuhut janjiꞌ tagnaꞌin. Hangkan paꞌinne, “Niyaꞌ waktu si pasōngan ngahinang du ku pagjanjiꞌan baꞌahu duk kēmon meꞌ bangsa Israꞌilin.
[9] Dumaꞌin inin kuweꞌ pagjanjiꞌanku duk meꞌ kapapuꞌanden masa pamoꞌoku siye paluwas amban lahat Misilin. Gaꞌ du tumanande pagjanjiꞌanku duk siyehin, hangkan gaꞌ ne siye asipku.
[10] Na, iye inin pagjanjiꞌanku duk meꞌ aꞌa Israꞌilin si pasōngan: Papīku meꞌ saraꞌkun dem pikilande. Kuweꞌ dalil sulatku meꞌ saraꞌkun diyalem ateyde. Manjari aku ne Tuhan inisbatden duk siye ne meꞌ aꞌakun.
[11] Duk gaꞌi ne subey usihatande pagkasiden atawa saweꞌden pasal aku, peggeꞌ si meꞌ ellew miyaꞌan kēmon aꞌahin amban madiyawaꞌ pagaꞌanen pī si meꞌ mabangsahanin, kēmon siye ngataꞌuhan aku du.
[12] Ampunku du meꞌ duseden duk gaꞌi ne essebku meꞌ hinangande malaꞌatin,” paꞌin Tuhanin.
[13] Peggeꞌ tabissā Tuhanin pasal pagjanjiꞌan baꞌahuhin, hātinen weꞌ andang ne pagjanjiꞌan tagnaꞌin. Ubus bisan ine-ine, bang andang ne, gaꞌ ne niyaꞌ kasōnganne.