[1] Si Malkisadik inin masaley, sultan iye laꞌi si lahat Salem duk imam isab iye maghinang para si Tuhan Tamanan Malangkewin. Dambuwaꞌ ellew masaley sābu Ibrahim moleꞌ amban pagbonoꞌan pagubus tadaꞌag weꞌ ne ampat sultan kuntaranen, pī Malkisadik nampang iye duk pinākuhan ledjikiꞌ si Ibrahim weꞌ ne si Tuhan.
[2] Inurungan weꞌ Ibrahim si Malkisadik jakat da bahagiꞌ si sampūꞌ bahagiꞌ meꞌ alataꞌ taꞌeddoꞌne si pagbonoꞌanin. Maꞌana ēn Malkisadikin “Sultan Bentel.” Duk peggeꞌ lahat pagsultanannen inēnan Salem bu maꞌananen “sanyang” hangkan inēnan isab iye “Sultan Sanyang.”
[3] Gaꞌ bakas taꞌaka bang sine saꞌi-sama si Malkisadikin atawa bang sine meꞌ kapapuꞌannen. Gaꞌi kataꞌuhan sabab panganak si iyehin atawa sabab kamateynen. Hangkan kuweꞌ Anak Tuhanin iye duk imam iye salama-lama.
[4] Na, kataꞌuhanbi weꞌ si Malkisadik asal aꞌa bangsahan teꞌed. Peggeꞌ bisan si Ibrahim, papuꞌte bi binantuhin, pinangurung du weꞌ ne pu Malkisadik jakat meꞌ alataꞌ taꞌeddoꞌne si pagbonoꞌanin.
[5] Meꞌ imam meꞌ Yahudihin, meꞌ tubuꞌ si Libi siye duk tubuꞌ Ibrahim du isab. Meꞌ imam inin kaꞌurungan kapatut dem saraꞌ nayimaꞌ meꞌ jakat amban meꞌ pagkaside tubuꞌ Ibrahimin.
[6] Si Malkisadik dumaꞌin tubuꞌ si Libi saguwaꞌ pinangurung weꞌ Ibrahim jakatnen si iye. Duk Ibrahim bakas pananggupan Tuhanin, pināku-pākuhan ledjikiꞌ pe iye si Tuhan weꞌ Malkisadik.
[7] Kataꞌuhante weꞌ aꞌa mamāku ledjikiꞌ si Tuhan para si saweꞌnen bangsahan amban aꞌa pinākuhanne ledjikiꞌin.
[8] Bang meꞌ imam bakas tasabbutkun, siye meꞌ pangurungan meꞌ aꞌa jakatden, siye inin ujud matey du. Saguwaꞌ si Malkisadik, iye pangurungan Ibrahim jakatnen, tasulat dem kitab weꞌ ellum iye.
[9] Bang hināti inin, si Libi, iye papuꞌ meꞌ imam manayimaꞌ jakat meꞌ aꞌahin, sakaliꞌ Ibrahim ngurung jakatnen pu Malkisadik, sampay si Libi sakup isab ngurung jakatnen pu Malkisadik.
[10] Toꞌo, gaꞌ pe si Libi inanakan masa pagkasuwaꞌ Ibrahim duk Malkisadikin saguwaꞌ masi ne iye laꞌi dem baran Ibrahim peggeꞌ ujud manjari tubuꞌ Ibrahim iye.
[11] Meꞌ saraꞌ Tuhan pinangurungne si meꞌ bangsa Israꞌil awwalley, pinangurung weꞌ ne masa tubuꞌ si Libi meꞌ magimamin. Saguwaꞌ gaꞌ tibūs hininang meꞌ imam tubuꞌ si Libihin peggeꞌ gaꞌ du taboꞌode meꞌ aꞌahin si Tuhan. Hangkan hep mapitu Tuhanin imam seddili duk seddili pagimamnen amban pagimam si Harunin, tubuꞌ si Libihin. Pagimamnen kuweꞌ si Malkisadikin.
[12] Na, bang ginantiꞌan ne pagimamin, subey ginantiꞌan isab saraꞌin.
[13] Panuhutanten bi si Isa Almasi hep mapagantiꞌ magimamin saguwaꞌ dumaꞌin iye tubuꞌ si Libi. Kataꞌuhan weꞌ amban tubuꞌ si Yuda iye duk gaꞌ niyaꞌ bakas magimam amban tubuꞌ si Yuda. Gaꞌ niyaꞌ bakas tasubahat weꞌ si Musa meꞌ katubuꞌan si Yudahin sakaliꞌ iye missā sabab meꞌ kaꞌimamanin.
[15] Pastiꞌ ne teꞌed weꞌ pinindahan ne saraꞌin sabab niyaꞌ ne imam seddili duk kuweꞌ Malkisadikin iye.
[16] Tahinang iye imam dumaꞌin nuhut addat duk saraꞌ manusiyaꞌ, saguwaꞌ tahinang iye imam peggeꞌ balakatan iye sabab gaꞌi magtamanan umulnen.
[17] Tasulat hep dem kitab, pinaꞌin, “Magimam kew pagantiꞌ pu Malkisadik duk gaꞌ niyaꞌ tamanan pagimamnun.”
[18] Na, hangkan hep saraꞌ tagnaꞌin pinindahan ne peggeꞌ gaꞌ niyaꞌ basagne duk gaꞌ niyaꞌ kagunahanne.
[19] Peggeꞌ bang amban saraꞌ si Musahin, gaꞌi magjatu meꞌ kinabayaꞌan Tuhan si manusiyaꞌin. Saguwaꞌ kuweꞌitu niyaꞌ tahinang Tuhanin mas hāp pe amban saraꞌ si Musahin duk sabab tahinangne miyaꞌan asal tumapit ne kite bi si iye.
[20] Lagiꞌ ne peggeꞌ napa Tuhanin. Gaꞌ iye napa si meꞌ kaꞌimaman sinduwehin sakaliꞌ siye magimam.
[21] Saguwaꞌ si Isa tahinang imam peggeꞌ napa Tuhanin si iye, paꞌinne, “Aku Tuhanin, napa ku weꞌ imam du kew salama-lama, duk gaꞌi teꞌed pinda pikilankun pasal inin.”
[22] Sabab panapa Tuhan inin bugtuꞌ weꞌ mas hāp janjiꞌ Tuhan baꞌahuhin peggeꞌ si Isa mangakuhan pagjanjiꞌan inin.
[23] Niyaꞌ pe pagbiddaꞌan meꞌ imam matuꞌuhin duk si Isa. Meꞌ imam matuꞌuhin ekka, peggeꞌ niyaꞌ pagantiꞌ bang taꞌabut siye matey.
[24] Saguwaꞌ si Isa, gaꞌ niyaꞌ pagantiꞌ si iye magimam peggeꞌ ellum iye salama-lama.
[25] Hangkan hep tatimbul si Isa kēmon meꞌ mamāku ampun si Tuhanin bang ngandel siye si iye. Tatimbul siye dumaꞌin hadja kuweꞌitu saguwaꞌ sampay salama-lama peggeꞌ ellum iye gaꞌ tamananne duk māku-māku si Tuhan para si siye.
[26] Na, si Isa mattan Imam Nakuraꞌte bi si Tuhanin. Matalep iye nabangan kite bi peggeꞌ sutsi iye. Gaꞌ niyaꞌ dusene atawa sallaꞌne. Pinaseddili iye amban meꞌ manusiyaꞌ madusehanin. Duk pinalangkew iye weꞌ Tuhanin laꞌi si surgaꞌ.
[27] Dumaꞌin iye kuweꞌ meꞌ imam nakuraꞌ sinduwehin. Siye subey magkuluban kahabaꞌ ellew si Tuhan pamuwas duseden dahuꞌ ubus bu duse meꞌ aꞌahin. Saguwaꞌ si Isa mintedde du hadja iye magkuluban para pamuwas duse meꞌ manusiyaꞌin kēmon duk iye pagkulubannen dinen.
[28] Saraꞌ Tuhan pangurung pu si Musa awwalley magpaꞌin bang sine makajari magimam nakuraꞌin bu meꞌ kawakilan magimamin manusiyaꞌ du taga sallaꞌ. Saguwaꞌ puwas miyaꞌan, kawakilan weꞌ Tuhanin Anaknen, si Isa, duk sinapahan pe weꞌ ne. Anaknen gaꞌ niyaꞌ sallaꞌ-sallaꞌne duk magimam iye salama-lama.