[1] Saraꞌ pinangurung weꞌ Tuhan si meꞌ Yahudi awwalley, kuweꞌ lingew hadja. Iye asal matoꞌohin meꞌ bayuꞌ-bayuꞌan mahāp binoꞌo weꞌ Almasi papitune si dunyahin. Paꞌin saraꞌin hep weꞌ subey tahun-tahun gaꞌ tamanan pagkuluban si Tuhanin saguwaꞌ meꞌ kuluban inin gaꞌi du makapabentel atey aꞌa magsambahayang si Tuhanin.
[2] Peggeꞌ bang meꞌ aꞌa magsambahayang si Tuhanin sutsi teꞌed amban meꞌ duseden sabab pagkulubanden, gaꞌi ne siꞌ siye luwal magpikil weꞌ niyaꞌ pe dusede, duk gaꞌi ne siꞌ siye subey magkuluban balik.
[3] Saguwaꞌ tahun-tahun masi du siye magkuluban duk inin maꞌesseban siye weꞌ niyaꞌ pe dusede.
[4] Peggeꞌ lahaꞌ meꞌ sapiꞌin duk meꞌ kambingin gaꞌi du hep makaꞌānan duse manusiyaꞌin.
[5] Iye hep inin jānnen hangkan Almasi, sakaliꞌ iye sōng pitu si dunya magpaꞌin si Tuhan, paꞌinne, “Dumaꞌin kinabayaꞌannun meꞌ kuluban duk meꞌ pangurung meꞌ aꞌahin. Saguwaꞌ pinanyapan ku weꞌ nu baran.
[6] Gaꞌi kew kasulutan si kuluban tibuꞌukan hayep ineggas duk kuluban pangānan duse.”
[7] Ubus paꞌin Almasi pe si Tuhanin, “O Tuhan, tiyaꞌ ne ku tuꞌu ngahinang kinabayaꞌannun kuweꞌ tasulat dem kitab sabab akuhin.”
[8] Iye tagnaꞌ pinaꞌinnen, paꞌinne, “Dumaꞌin kinabayaꞌannun duk dumaꞌin makasulut kaꞌuhin meꞌ kuluban duk meꞌ pangurung meꞌ aꞌahin atawa meꞌ tibuꞌukan hayep ineggas duk kuluban pangānan duse.” Paꞌinne inin bisan du meꞌ hinangan miyaꞌan pangandaꞌakan saraꞌin.
[9] Manjari paꞌinne pe, “O Tuhan, tiyaꞌ ne ku tuꞌu ngahinang kinabayaꞌannun.” Hangkan hinangan pagkuluban meꞌ hayepin ginantiꞌan ne, duk Almasi pangagantiꞌ iyehin.
[10] Duk peggeꞌ tahinang ne weꞌ Isa Almasi kinabayaꞌan Tuhan pinahinang si iyehin, hangkan sutsi ne kite bi kēmon amban duseten bi sabab pagkulubanne mintedde hadja di barannen pamuwas duse meꞌ aꞌahin kēmon.
[11] Meꞌ imam Yahudihin kahabaꞌ ellew laꞌi siye si langgal ngahinang pinasukuꞌ si siyehin duk daran binalik-balik pagkulubanden. Saguwaꞌ kulubande inin gaꞌi du makaꞌānan duse.
[12] Saguwaꞌ Almasi mintedde hadja paglillaꞌne barannen hinang kuluban pamuwas duse manusiyaꞌin. Duk hininangne miyaꞌan bali teꞌed salama-lama. Pagubus inin hinangne, ningkoloꞌ iye si kanawan Tuhanin, lugal tamanan mabangsahanin.
[13] Duk kuweꞌitu laꞌi iye ngagad-ngagad samantaꞌan gaꞌ pe tadaꞌag weꞌ Tuhanin kēmon bantanen duk dalil papīne siye diyawaꞌ pat bettis Almasi.
[14] Almasi, mintedde du hadja paglillaꞌne barannen si Tuhan duk sabab inin sutsi ne meꞌ aꞌanen duk bentel ne teꞌed siye salama-lama.
[15] Kataꞌuhante bi weꞌ toꞌo inin peggeꞌ Niyawa Sutsihin, niyaꞌ bakas pinasulat weꞌ ne dem kitab, pinaꞌin,
[16] “Iye inin janjiꞌku si meꞌ aꞌakun si pasōngan, paꞌin Tuhanin: Papīku meꞌ saraꞌkun dem ateyde duk dalil sulatku dem pikilande.”
[17] Manjari paꞌinne pe, “Gaꞌi ne teꞌed esseb-essebku meꞌ duseden duk meꞌ hinangande malaꞌatin.”
[18] Hangkan gaꞌi ne subey magkuluban pangānan duse peggeꞌ taꞌampun ne du kēmon dusehin.
[19] Hangkan hep meꞌ kapungtinaꞌihanku, luhaya ne kite bi pī dem Lugal Tamanan Masutsihin sabab kamatey Almasihin. Hātinen, makajari ne kite bi pī si panaꞌanan Tuhanin peggeꞌ bakas matey Almasi muwasan duseten bi.
[20] Sakaliꞌ paglillaꞌne barannen pinapatey, ngaluka iye lān baꞌahu supaya kite bi taga umul gaꞌ tamanan. Barannen dalil semmek dem langgal mangelligan bilik palaꞌihan Tuhanin saguwaꞌ kuweꞌitu dalil garet ne ellig bilik miyaꞌan sabab bakas pinaglillaꞌ weꞌ ne baranne miyaꞌan.
[21] Duk kuweꞌitu niyaꞌ ne Imam Nakuraꞌte bi bangsahan magbayaꞌ si kite bi, meꞌ aꞌa Tuhanin.
[22] Hangkan hep subey kite bi patapit si Tuhan, ateyten bi dambūs-būs duk sandelte bi si iyehin basag, duk subey ne gaꞌi suse pikilanten sabab bakas tasutsi ne ateyten duk bakas ne kite tapandi, tandaꞌ weꞌ sutsi ne kite bi.
[23] Subey teꞌed pahagette bi pangase-ngasete bi si Tuhanin peggeꞌ kataꞌuhante bi weꞌ Tuhanin kapangandelan duk asal tumananne janjiꞌnen.
[24] Subey pikilte bi saweꞌten bi. Subey siye tabangante bi duk pakitehante bi si siye lasaten bi supaya isab siye taꞌu makitehan lasaden si saweꞌden duk maghinang hāp du siye.
[25] Daꞌa isab kite bi padeheng magtipun-tipun ngisbat si Tuhan. Daꞌa kite bi kuweꞌ meꞌ sinduwe katindegan si Isahin, gaꞌi ne bisan magtipun-tipun. Saguwaꞌ subey kite bi magtipun-tipun supaya magasig-inasig ateyten bi, lagiꞌ ne peggeꞌ sōng taꞌabut ne ellew pabalik Panuhutanten bi Isa Almasi.
[26] Peggeꞌ bang kataꞌuhante ne toloꞌ mabennalin bu pagtuꞌurante pe magduse, na, gaꞌ ne teꞌed niyaꞌ kuluban tayimaꞌ Tuhanin makaꞌānan duseten bi pe.
[27] Meꞌ aꞌa sa iyan gaꞌ niyaꞌ ase-asede si pasōngan luwal magtalew ngagadan hukuman pinatekka Tuhan si siyehin duk ebbut mapanas pamakaꞌat Tuhan si meꞌ manguntarahan iyehin.
[28] Masa awwalley sine-sine gaꞌi ngaddatan saraꞌ pangurung Tuhan pu si Musahin, bang niyaꞌ duwangan atawa tellungan naksiꞌ weꞌ asal gaꞌi addatanne saraꞌ miyaꞌan, gaꞌi iye kaꞌaseꞌan saguwaꞌ pinapatey iye.
[29] Na, pasōng pe teꞌed pangalegga aꞌahin bang diyawaꞌanne Isa Almasi, Anak Tuhanin, duk gaꞌi kimmatanne mahalgaꞌ lahaꞌ Almasihin bu sabab janjiꞌ Tuhan baꞌahuhin lahaꞌ Almasihin hep manutsi iyehin amban dusenen. Duk si hinanganne inin, kuweꞌ paꞌiyaꞌne Niyawa Sutsihin, iye mamalasa duk maꞌaseꞌ si kitehin bi. Hangkan asal pasōng teꞌed pangalegga iyehin.
[30] Peggeꞌ kataꞌuhante bi du Tuhan mamissā inin, paꞌinne, “Males du ku, tumbasanku du siye.” Duk paꞌinne pe, “Tuhanin hep mangahukum meꞌ aꞌanen.”
[31] Asal makatalew-talew teꞌed bang kite legga Tuhan maꞌellumin.
[32] Essebun bi bang saꞌingge kaꞌam matuꞌuhin. Masa miyaꞌan baꞌahu pe kaꞌam ngataꞌuhan toloꞌ mabennal kinahagadbin, magsandal teꞌed kaꞌam bayuꞌ-bayuꞌan kasigpitan. Saguwaꞌ gaꞌ du usaꞌ sandelbin.
[33] Bang patekka pinaꞌiyaꞌ kaꞌam si kaꞌekkahan aꞌa duk pinapeddiꞌan kaꞌam sabab panuhutbi pu Almasihin. Bang patekka isab bēbbeganbi meꞌ saweꞌbi bininasahin.
[34] Pakitehanbi teꞌed aseꞌbin si meꞌ pagkasibi tindeg si Isa kinalabusuhin. Duk bisan pe ineddoꞌ meꞌ panyapbin weꞌ aꞌa, sinna pe kaꞌam peggeꞌ kataꞌuhanbi weꞌ niyaꞌ alataꞌbi pasōng pe hāpnen laꞌi si surgaꞌ duk alataꞌ inin gaꞌi lepas si kaꞌam salama-lama.
[35] Hangkan hep daꞌa lebbahanun bi sandelbin peggeꞌ bang kaꞌam sandel, hadje tumbas tasangkabi amban Tuhanin.
[36] Subey kaꞌam matuyuꞌ teꞌed supaya tahinangbi kinabayaꞌan Tuhanin duk ujud tasangkabi du pananggup Tuhan si kaꞌamin.
[37] Peggeꞌ paꞌin kitabin hep, “Gaꞌi ne tiggel tekka du aꞌa inagad-agadbin. Gaꞌi iye magdayan-dayan.
[38] Meꞌ aꞌakun meꞌ aꞌa bentel, duk sandelde si akuhin makaꞌellum siye salama-lamahin. Saguwaꞌ bang niyaꞌ siye nayikutan aku, asal gaꞌi ku teꞌed kasulutan si siye.”
[39] Saguwaꞌ kite bi, dumaꞌin kite bi meꞌ aꞌa manayikutan Tuhanin duk ujud ilegga. Saguwaꞌ kite bi basag sandelte bi si Tuhanin hangkan timbul kite bi.