[1] Masa awwalley Tuhanin daran magpasampay bissānen pitu si meꞌ kapapuꞌanten bi meꞌ Yahudihin duk magseddili-seddili pamasampayne bissāne si siyehin. Meꞌ kanabihanin magpalataꞌ bissānen.
[2] Saguwaꞌ si meꞌ ellew kuweꞌitu inin, magpalataꞌ bissānen si kite bi Anaknen. Iye mamapanjari alamin amban pangandaꞌakan Tuhanin duk iye hep tapeneꞌ weꞌ Tuhanin pangurunganne kēmon-kēmonin.
[3] Laꞌi si iye takite sahaya Tuhanin duk lekkup teꞌed iye neppu Tuhanin. Iye mangantanan alam inin weꞌ bissāne mabalakatanin. Duk pagubus hinangnen supaya taꞌampun duse manusiyaꞌin, manjari hap pī iye si surgaꞌ duk ningkoloꞌ iye si kanawanan Tuhan Tamanan Mabalakatanin.
[4] Pinalangkew weꞌ Tuhanin Anaknen amban meꞌ malaꞌikatin, duk langkew gellal pangurung Tuhan si iyehin amban si meꞌ malaꞌikatin.
[5] Peggeꞌ Tuhanin gaꞌ bakas tabissāne si meꞌ malaꞌikatnen kuweꞌ binissāne si Anaknen, paꞌinne, “Anakte kew. Kuweꞌitu aku ne Samanun.” Duk gaꞌ isab Tuhanin missā sabab malaꞌikat sine-sine kuweꞌ inin, “Aku samanen duk anakku iye.”
[6] Ubus pagsakaliꞌ sōng pinapitu ne weꞌ Tuhanin si dunya Anakne mabalakatanin, missā isab Tuhanin, paꞌinne, “Kēmon meꞌ malaꞌikatkun subey pasujud si iye.”
[7] Bang pasal meꞌ malaꞌikatnen iye du inin pinaꞌin Tuhanin, “Meꞌ malaꞌikatin meꞌ daraꞌakanku hadja, duk makajari siye pamanjariku baliyu atawa kayat ebbut bang ku mabayaꞌ.”
[8] Saguwaꞌ pasal Anaknen iye inin pinaꞌin Tuhanin. Paꞌinne, “Kaꞌu Tuhanin, duk pagbayaꞌnun gaꞌ niyaꞌ tamananne. Bentel pagbayaꞌnu si meꞌ aꞌanun.
[9] Sinna kew si meꞌ hinangan bentel duk bunsi kew si meꞌ hinangan laꞌat. Hangkan hep aku, iye Tuhannun, tapeneꞌ kew weꞌ ku. Duk pinakēg kew weꞌ ku duk pinahadje kew pasōng pe teꞌed amban meꞌ saweꞌnun.”
[10] Paꞌin Tuhanin pe si Anaknen, “Kaꞌu, Tuwan, magpapanjari dunyahin tagnaꞌ awwalley. Duk asal tangannun mangahinang meꞌ langitin.
[11] Dunyahin duk langitin ujud lanyap du, saguwaꞌ kaꞌu gaꞌi kew usaꞌ. Kēmon inin ngaꞌandang du kuweꞌ semmek gaꞌi ne taguna.
[12] Ilūnan siye kuweꞌ tapo duk ginantiꞌan siye kuweꞌ semmek. Saguwaꞌ kaꞌu, gaꞌi kew teꞌed pinda, gaꞌ niyaꞌ tamanan umulnun.”
[13] Tuhanin gaꞌ bakas tabissāne si dangan meꞌ malaꞌikatnen kuweꞌ binissāne si Anaknen, paꞌinne, “Dayiꞌ kew, ningkoloꞌ kew tuꞌu si kanawananku, tuꞌu si paningkoloꞌan mabangsahanin, duk bettadku du meꞌ bantanun diyawaꞌ pat bettisnu.”
[14] Na ine teꞌ meꞌ malaꞌikatin? Siye meꞌ daraꞌakan Tuhanin du. Gaꞌi siye takitete bi, saguwaꞌ dinaꞌak siye weꞌ Tuhanin nabangan sasuku manayimaꞌ katimbulan amban Tuhanin.