[1] Bang kite asal sandel si Tuhan, kabugtuꞌante weꞌ tasangkate du meꞌ inase-aseten. Sabab sandelten kabugtuꞌante weꞌ toꞌo meꞌ manggaꞌi takiteten.
[2] Meꞌ aꞌa dehelluhin, kasulutan Tuhanin si siye peggeꞌ sandel siye si iye.
[3] Sabab sandelten tasabutte bi weꞌ pinapanjari weꞌ Tuhanin alam inin duk bissāne hadja. Hangkan hep kēmon takitete tuꞌu si dunyahin paguwaꞌ amban gaꞌi takiteten.
[4] Si Habil masaley, sabab sandelne si Tuhanin, kulubanne si Tuhanin pasōng hāpnen amban kuluban sakanen, si Kabil. Sabab sandel si Habil inin, kinimmatan iye bentel weꞌ Tuhanin peggeꞌ tinayimaꞌ weꞌ Tuhanin kulubannen. Bisan si Habil tiggel ne matey, niyaꞌ pamintangante bi si iye sabab sandelnen.
[5] Si Idris isab awwalley, sabab sandelne si Tuhanin gaꞌi iye kalabey matey. Pinagpiha iye saguwaꞌ gaꞌ niyaꞌ ngasuwaꞌ iye peggeꞌ pinaꞌangkat iye weꞌ Tuhanin. Paꞌin kitabin weꞌ masa tuꞌu pe si Idris si dunya, kasulutan teꞌed Tuhanin si iye.
[6] Tuhanin gaꞌi teꞌed kasulutan pu sine-sine bang gaꞌi sandel si iye. Saguwaꞌ aꞌa mangampun-ngampun si Tuhanin, subey kahagad weꞌ bennal niyaꞌ Tuhan duk subey isab iye kahagad weꞌ tumbasan Tuhanin du hāp sasuku magtuyuꞌ teꞌed ngapas iyehin.
[7] Si Nu isab asal sandel si Tuhan peggeꞌ sakaliꞌ iye inakahan weꞌ Tuhanin weꞌ niyaꞌ balaꞌ sōng tekka si dunya, kinahagad weꞌ ne bisan pe gaꞌ takitene. Tinuhut weꞌ ne pangandaꞌakan Tuhanin duk ngahinang iye kappal hadje pasakeyanne duk meꞌ anak-andanen. Manjari pagtekka dunuk mahadjehin duk ilatapan dunyahin, gaꞌ du siye magmula. Kēmon aꞌa sinduwe dem dunyahin ilegga weꞌ Tuhanin, saguwaꞌ si Nu kinimmatan bentel weꞌ Tuhanin peggeꞌ sandel iye si Tuhanin.
[8] Si Ibrahim isab, sabab sandelne si Tuhanin kinahagad weꞌ ne pinaꞌin Tuhan si iyehin weꞌ subey iye tahalaꞌ amban di lahatnen bu pī si lahat seddili, lahat pananggup Tuhanin weꞌ pangurungne pu Ibrahim. Hangkan tahalaꞌ Ibrahim amban lahatne bisan gaꞌi kataꞌuhanne bang tungan papīhannen.
[9] Sabab sandelnen maglahat iye kuweꞌ aꞌa paliyu-liyu si lahat pananggup Tuhan si iyehin. Maglinda-linda iye, duk lumaꞌnen lumaꞌ kuwit hayep duk kuweꞌ miyaꞌan du isab anaknen Isahak duk ampunen si Yakub. Sinakup du isab siye sinanggupan weꞌ Tuhanin weꞌ tepe si siye lahat miyaꞌan.
[10] Sandalan Ibrahim inin peggeꞌ iye inase-asenen maglahat du iye si puweblo laꞌi si surgaꞌ. Tuhanin dapuꞌ pikilanin duk iye mangahinang puweblo inin duk layun inin salama-lama.
[11] Damikkiyan si Sara, anda Ibrahimin, sandel du isab iye si Tuhan. Bisan iye gaꞌi nganak duk bahiꞌ ne iye, ujud betteng iye peggeꞌ kinahagad weꞌ ne pananggup Tuhanin weꞌ ujud nganak du iye.
[12] Duk Ibrahim bahiꞌ ne teꞌed, gaꞌi ne makajari andanen anakan weꞌ ne. Saguwaꞌ peggeꞌ kinahagad weꞌ ne pananggup Tuhanin, ngaꞌekka teꞌed tubuꞌnen kuweꞌ meꞌ poteꞌan si langitin duk meꞌ umus si higad tahikin gaꞌi taꞌitung hawal ekkanen.
[13] Meꞌ aꞌa tasabbutku miyaꞌan, gaꞌ usaꞌ sandelde si Tuhanin sampay matey siye. Bisan gaꞌ pe tasangkade pananggup Tuhanin, saguwaꞌ kataꞌuhande weꞌ si pasōngan tasangkade du inin. Duk tiggelande maꞌellumin, pinakitehan weꞌ de weꞌ siye meꞌ aꞌa paliyu-liyu hadja tuꞌu si dunya.
[14] Meꞌ aꞌa magpaꞌinin weꞌ dunya inin dumaꞌin lahatde, magpahāti weꞌ niyaꞌ seddili lahat ase-asede asal di lahatde.
[15] Disi Ibrahim gaꞌ luwal pikilde lahat inambananden. Peggeꞌ bang miyaꞌan luwal pikilde, tabalik pe siꞌ siye miyaꞌan laꞌi.
[16] Saguwaꞌ iye inangutden lahat hāp pe teꞌed amban lahat inambananden. Iye inangutde paglahatanden lahat surgaꞌ. Hangkan gaꞌ Tuhanin iyaꞌ ēnande Tuhande peggeꞌ bakas pinanyapan ne siye weꞌ ne puweblo patennaꞌande.
[17] Si Ibrahim hawal sandelne si Tuhanin, tuhutne pangandaꞌakannen duk sinōngan weꞌ ne anaknen, Isahak, hinang kuluban si Tuhan. Pangandaꞌakan Tuhan miyaꞌan panuleyanne Ibrahim bang bennal iye sandel si iye. Ngajanjiꞌ hep Tuhanin pu Ibrahim weꞌ ngaꞌekka teꞌed tubuꞌnen weꞌ Isahak, saguwaꞌ Ibrahim sōng pinapatey weꞌ ne anakne dambuwaꞌ-buwaꞌin pagkuluban si Tuhan.
[19] Peggeꞌ tapikil Ibrahimin weꞌ bang upama matey Isahak, makajari du iye pakellum Tuhanin balik. Duk dalil tapakellum Isahak balik amban kamateynen peggeꞌ bang gaꞌ inalal Ibrahim weꞌ Tuhanin, bugtuꞌ Isahak matey.
[20] Si Isahak isab hawal sandelne si Tuhanin, inakahan weꞌ ne meꞌ anaknen si Yakub duk si Esaw weꞌ patekkahan Tuhanin du siye meꞌ ledjikiꞌ si pasōngan.
[21] Si Yakub isab hawal sandelne si Tuhanin, sakaliꞌ iye sōng matey, pināku-pākuhan weꞌ ne ledjikiꞌ si Tuhan meꞌ ampunen, meꞌ anak si Yusupin. Ubus bu patukkuꞌ iye si tungkudne duk nambahayang iye si Tuhan.
[22] Si Yusup isab hawal sandelne si Tuhanin, sakaliꞌ iye sōng matey, pinaꞌal weꞌ ne weꞌ siye meꞌ tubuꞌ Israꞌilin ujud tumahalaꞌ du amban lahat Misil. Duk sinessaꞌan siye weꞌ ne weꞌ subey boꞌode bangkeynen bang siye tahalaꞌ.
[23] Saꞌi-sama si Musahin sandel du isab si Tuhan. Bisan maguldin sultanin weꞌ subey pinapatey kēmon meꞌ anak Yahudi lella baꞌahu inanakanin, gaꞌ siye tinalew. Sakaliꞌ inanakan si Musa tinapukan iye weꞌ de tellum bulan peggeꞌ takitede weꞌ mannisan teꞌed iye.
[24] Si Musa basag du isab sandelne si Tuhanin. Peggeꞌ pagsakaliꞌ ne iye bahiꞌ-bahiꞌ, gaꞌi iye ngatu inēnan pe anak dayang-dayangin, dende mamaketoꞌ iyehin.
[25] Peggeꞌ eddoꞌne pe magsandal katiksaꞌan nuhut meꞌ pagkasine bangsa Israꞌilin, meꞌ aꞌa Tuhanin, amban patennaꞌ si lumaꞌ sultanin nulut dine bu magduse, peggeꞌ meꞌ mahāp di dunyahin gaꞌi layun.
[26] Tapikilne weꞌ hāp pe iye magsandal diniyawaꞌan sabab pangase-ngasene pu Almasihin amban magdaya iye si lahat Misil. Peggeꞌ iye inangutnen tumbas Tuhan si iyehin si pasōngan.
[27] Hawal basag sandel si Musa si Tuhanin tahalaꞌ iye amban lahat Misil duk gaꞌ du iye tinalew si sultan Misilin. Bisan iye kahunitan si lān, gaꞌ iye balik pī si Misil peggeꞌ kuweꞌ takitene Tuhan manggaꞌi takitehin laꞌi nuhut-nuhut iye.
[28] Sabab sandelne si Tuhanin hangkan hep tinuhut weꞌ si Musa pangandaꞌakan Tuhanin. Dinaꞌak weꞌ ne pinisikan lahaꞌ bili-bili meꞌ gawang lumaꞌden supaya meꞌ anakde panganayenin gaꞌi pinapatey weꞌ malaꞌikat mamoꞌo kamateyin. Iyan tagnaꞌ hininang weꞌ ne addat pasal kādjaꞌan inēnan Pangesseban Palabey Tuhanin.
[29] Meꞌ tubuꞌ Israꞌilin sandel du isab si Tuhan hangkan lumipag siye amban tengngaꞌ Tahik Peyat kuweꞌ du diyataꞌ bulak tohoꞌ hap pī si dambiyaꞌ. Saguwaꞌ meꞌ aꞌa Misil mangalupug siyehin, nuley isab siye palipag ubus lambo siye kēmon peggeꞌ patabuꞌ balik tahikin.
[30] Meꞌ tubuꞌ Israꞌilin, hawal sandelden du isab, hebbaꞌ dinding batu mapaliput si lahat Arihahin, pagpalibut siye kapituꞌ ellewnen.
[31] Laꞌi dem puweblo Ariha niyaꞌ dende magjina inēnan si Rahab. Bisan iye dende dupang kinahagad weꞌ ne Tuhanin duk tinabangan weꞌ ne meꞌ ispay aꞌa Israꞌilin. Hangkan hep sakaliꞌ pinapatey weꞌ meꞌ aꞌa Israꞌilin meꞌ aꞌa si lahat miyaꞌan, gaꞌ sinakup si Rahab pinapatey peggeꞌ sandel iye si Tuhan.
[32] Taman inin ne hadja. Gaꞌi ne patalusku magaka-aka sabab si Gideyon, si Barak, si Samson, si Jepta, si Daꞌud, si Samuel, duk meꞌ kanabihanin peggeꞌ gaꞌi ne tatukidku.
[33] Meꞌ aꞌa inin, hawal sandelde si Tuhanin, inatuhan weꞌ de magbonoꞌ meꞌ lahat mahadjehin duk tadaꞌag weꞌ de. Niyaꞌ isab siye bentel pangantande dem paglahatin duk niyaꞌ siye tasangkade meꞌ pananggup Tuhanin. Niyaꞌ isab siye tadaꞌag weꞌ de meꞌ limaꞌungin duk gaꞌ du siye takekkeb.
[34] Niyaꞌ siye sinduwe, tapalem weꞌ de ebbut mahadjehin duk niyaꞌ siye gaꞌ tapapatey weꞌ meꞌ bantaden. Niyaꞌ siye lamma saguwaꞌ ngabasag siye. Bahani teꞌed siye si pagbonoꞌan duk tadaꞌag weꞌ de meꞌ sundalu mabanes amban bangsa seddilihin.
[35] Niyaꞌ meꞌ dende, hawal sandelde si Tuhanin, ellum balik meꞌ usbaden amban kamateyden. Niyaꞌ isab masaley meꞌ aꞌa, eddoꞌde pe matey bininasa sabab panuhutde Tuhanin amban pinaluhaya siye. Peggeꞌ sandel siye weꞌ pinakellum du siye balik si pasōngan duk pasōng hāp parasahanden laꞌi.
[36] Niyaꞌ sinduwehin hininang dagey duk ilubakan duk sinduwehin isab kinarena duk binoꞌo kinalabusu.
[37] Niyaꞌ isab matey pinagtumbukan duk batu, sinduwehin kinakehet baranden paduwe, niyaꞌ siye pinapatey pineddang. Sinduwehin isab luwal panemmekden kuwit bili-bili duk kuwit kambing. Miskin teꞌed siye duk bininasa duk pinapeddiꞌan siye weꞌ meꞌ aꞌahin.
[38] Meꞌ aꞌa inin, maglunsul laꞌi si meꞌ lahat makagindew-gindew duk si meꞌ kapunuhan kuweꞌ meꞌ aꞌa gaꞌ niyaꞌ lahatde. Patennaꞌ siye si meꞌ lingab duk si meꞌ lowang dem bulak. Matalep si siyehin lahat pasōng hāp amban dunya inin.
[39] Kasulutan Tuhanin si meꞌ aꞌa inin peggeꞌ sandel siye si iye. Saguwaꞌ sampay matey siye gaꞌ tasangkade pananggup Tuhan si siyehin,
[40] peggeꞌ niyaꞌ tapikil Tuhanin mas hāp para si kite bi. Tapikilnen weꞌ sumakup kite bi si meꞌ aꞌa masaley nangka meꞌ pananggup Tuhanin duk bang ne kite sumakup si siye, meke ne magjatu kēmon pananggup Tuhanin.