[1] Hangkan hep subey pasōngte bi pangadjiꞌte bi sabab Isa Almasihin. Subey iye adjiꞌante bi ne meꞌ toloꞌ malalemin. Na, daꞌa ne iye luwal inadjiꞌanten bi hadja meꞌ tagnaꞌ panoloꞌ si kite bi sabab Almasihin. Daꞌa balik-balikte bi inadjiꞌan meꞌ toloꞌ tagnaꞌ panoloꞌ si kitehin bi, kuweꞌ upama meꞌ toloꞌ sabab subey tinayikutan meꞌ hinangan gaꞌ niyaꞌ kagunahannen duk sabab sandel si Tuhan.
[2] Daꞌa isab balik-balikte bi inadjiꞌan meꞌ toloꞌ sabab pamandi pagsutsi baranin duk sabab pagbettad tanganin pī si kōk aꞌahin māku-mākuhan iye ledjikiꞌ amban Tuhan duk toloꞌ sabab pagpakellum meꞌ pateyin balik si pasōngan duk sabab hukuman makakkal pinatekka Tuhanin.
[3] Hangkan pasōngte bi ne pangadjiꞌte bi sabab Almasihin bang duhulan Tuhanin du kite bi.
[4] Peggeꞌ meꞌ aꞌa mangalebbahan sandelde pu si Isa Almasihin, gaꞌi ne siye taboꞌo balik magsusunan duseden. Bakas ne pinadantaꞌ pikilanden weꞌ Tuhanin. Takinamde ne meꞌ kahāpan amban surgaꞌ pangurung siyehin, duk talabeyde ne paꞌasekan weꞌ Niyawa Sutsihin.
[5] Kataꞌuhande weꞌ hāp binissā Tuhanin peggeꞌ bakas talabeyde ne duk takinamde ne balakat Tuhan pinapastiꞌne si pasōnganin si dunya baꞌahuhin.
[6] Ubus bu bisan inin kēmon kataꞌuhande, lebbahande pe sandelde pu si Isa Almasihin! Gaꞌi ne teꞌed siye taboꞌo balik magsusunan duseden peggeꞌ sabab hininangde miyaꞌan, kuweꞌ du lansangde balik Anak Tuhanin diyataꞌ olom duk diyawaꞌande iye si kaꞌekkahan aꞌa.
[7] Kite bi meꞌ manusiyaꞌin kuweꞌ dalil tanaꞌ. Tanaꞌin bang luwal kaꞌulanan, nulig tinanemnen duk mahalgaꞌ inin si dapuꞌ tanaꞌin. Tanaꞌ inin iledjikiꞌan teꞌed weꞌ Tuhanin.
[8] Saguwaꞌ bang tanaꞌin iye hadja matomoꞌ malaꞌihin parang duk sampinit, gaꞌ niyaꞌ halgaꞌne. Tanaꞌ inin sōng ne pinagmulkaꞌan weꞌ Tuhanin duk ujud ineggas.
[9] Meꞌ bagayku kinalasahankun, bisan kuweꞌ inin bissākun saguwaꞌ kabugtuꞌanku weꞌ kaꞌam seddili. Kataꞌuhanku weꞌ sandel ne kaꞌam duk hāp meꞌ hinanganbin duk iyan tandaꞌ weꞌ timbul ne kaꞌam.
[10] Tuhanin asal bentel. Gaꞌi kayipatanne meꞌ hāp tahinangbin duk lasabi si iyehin. Takite lasabi si Tuhanin sabab tinabang weꞌ bi meꞌ pagkasibi tindeg Almasihin sampay kuweꞌitu.
[11] Iye kinabayaꞌan kamihin weꞌ kēmon kaꞌam dangan-dangan magtuyuꞌ-tuyuꞌ hadja maghinang sa miyaꞌan tiggelanbi maꞌellumin supaya meꞌ inase-asebi amban Tuhanin tuman du.
[12] Kabayaꞌan kamihin weꞌ gaꞌi kaꞌam maglisuꞌ-lisuꞌ saguwaꞌ subey kaꞌam kuweꞌ meꞌ aꞌa mabasag sandelden duk matuyuꞌ teꞌed hangkan tasangkade pananggup Tuhanin.
[13] Si Ibrahim masaley, niyaꞌ pananggup Tuhanin si iye duk napa Tuhanin weꞌ tumananne sanggupne miyaꞌan. Iye panapahannen di ēnnen peggeꞌ gaꞌ niyaꞌ ēn seddili bangsahan pe amban ēnnen.
[14] Iye inin pinaꞌin Tuhanin, paꞌinne, “Asal ledjikiꞌante kew teꞌed duk paꞌekkaku teꞌed meꞌ tubuꞌnun.”
[15] Si Ibrahim gaꞌ jumuꞌ ngagad si janjiꞌ Tuhanin hangkan tasangkane du pananggup Tuhan si iyehin.
[16] Addat manusiyaꞌin bang siye napa, sabbutde ēn Tuhanin peggeꞌ Tuhanin pasōng langkew amban kēmon-kēmonin. Manjari hatul kēmon pagsaggaꞌanden.
[17] Tuhanin isab sakaliꞌ iye nanggup, batang teꞌed pabugtuꞌne si meꞌ pananggupannen weꞌ asal gaꞌi pinda ginaraꞌnen. Hangkan sapahanne sanggupnen.
[18] Sanggup Tuhanin duk sinapahannen bugtuꞌ. Duwe inin gaꞌi teꞌed pinda peggeꞌ Tuhanin gaꞌi teꞌed makajari magdustaꞌ. Hangkan kite bi meꞌ matimbulin, asig teꞌed ateyten bi duk basag teꞌed pangase-ngasete bi si iyehin.
[19] Pangase-ngasete bi meꞌ pananggup Tuhanin, iye inin kuweꞌ dalil gonteng makahaget kitehin si Tuhan. Bugtuꞌ teꞌed weꞌ tumanan Tuhanin pananggupnen peggeꞌ si Isa īꞌ ne padehellu amban kite pī si surgaꞌ, si panaꞌanan Tuhanin, pasellet si kite bi. Kuweꞌ meꞌ imam Yahudi paꞌasek dem langgal hadje pī si bilik diyalem teꞌedin inelligan duk semmek subukin, sa miyaꞌan paꞌasek si Isa si panaꞌanan Tuhanin peggeꞌ kuweꞌitu imam nakuraꞌ ne iye salama-lama kuweꞌ Imam Malkisadik awwalley.