[1] pēyak nāpēw Ananias itāw ēkwa owīkimākana Sapphira kī‑atāwākēwak otaskīwāw.
[2] māka pahki anihi sōniyāwa kī‑kanawēyimēwak, ēkwa kī‑miyēw Ananias itisahwākana anihi kā‑iskonāt sōniyāwa.
[3] Peter ōmisi itēw, “Ananias, tānēhki maci-manitow kā‑pakitinat kita-tipēyimisk? ē‑kiyāskīhat kā‑kanātisit ahcāhk ayisk kikī-kanawēyimāw pahki ana sōniyāw kā‑kī-ohcisiyan kitaskiy ē‑atāwākēyan.
[4] mwayēs ē‑atāwākēyan kikī-tipēyihtēn anima kitaskiy, ēkwa ē‑kī-atāwākēyan, ana sōniyāw kā‑tipēyimat. tānēhki māka ōma kā‑tōtaman? namōya kikiyāskīmāw awiyak, māka kikiyāskīmāw kisē-manitow.”
[5] mayaw ē‑pēhtahk ōma, Ananias kī‑kawipayiw ēkwa kī‑nipiw. tāhto kā‑pēhtahkik ōma, mistahi kī‑sēkisiwak.
[6] kī‑pē-nātēwak oskinīkiwak ēkwa ē‑kī-wēwēkinācik kī‑sipwēhtatāwak ē‑nitawi-nahinācik.
[7] nānitaw nisto tipahipīsimwān ē‑kī-ispayik, owīkimākana ana nāpēw pē‑pīhtikwēyiwa. ana iskwēw namōya kiskēyihtam ōma ē‑ispayihikoyit onāpēma.
[8] Peter kakwēcimēw, “wīhtamawin, ēkwayikohk cī ōma ē‑kī-ohcisiyēk kināpēm anima askiy kā‑kī-atāwākēyēk?” itēw, ē‑wāpahtihāt anihi sōniyāwa. “ēha, ēkwayikohk anima,” itik.
[9] Peter itēw, “tānēhki ōma kā‑kakwē-kocihāyēk kā‑tipēyihcikēt otahcāhkwa kita-wayēsihāyēk? matwē-pē-tāstamohtēwak aniki nāpēwak kā‑kī-nahinācik kināpēma, iskwāhtēmihk matwē-takohtēwak. kīsta kika-wayawīhtahikawin.”
[10] sēmāk ana iskwēw pahkisin ē‑nipit ita kā‑nīpawiyit Petera. ōki oskinīkiwak ē‑pīhtikwēcik wāpamēwak ē‑nipiyit ēkosi sipwēhtahēwak ē‑nitawi-nahinācik ita onāpēmiyiwa kā‑pimisiniyit.
[11] ēkwa otayamihāwak ēkwa kahkiyaw ayisiyiniwak ē‑pēhtahkik ōma mistahi kī‑sēkisiwak.
[12] itisahwākanak mihcēt mamāhtāwi-kīkwaya ēkwa māmaskātamowina kī‑tōtamawēwak ayisiyiniwa, ita ē‑ayāyit māna. kahkiyaw otāpwēhtamowak kī‑ayāwak Solomon opiskihcikamikos kā‑itamihk.
[13] kotakak ayisiyiniwak kī‑kostamwak kita-wīcēwācik, māka kī‑mamihcimēwak.
[14] ayiwāk kī‑ati-ihtasiwak nāpēwak ēkwa iskwēwak ē‑tāpowakēyimācik kā‑tipēyihcikēyit.
[15] kī‑pēsiwēwak otāhkosiwa tawastēhk, ē‑pimisimācik nipēwinihk mīna anāskānihk, ē‑akāwātahkik kanakē Petera pimohtēyici kita-cikāstēpayihikocik.
[16] mihcēt ayisiyiniwak wāsakām ihtāwina ohci Jerusalemihk kī‑pē-takohtēwak. kī‑pēsiwēwak otāhkosiwa ēkwa anihi kā‑wa-wānihikoyit maci-ahcāhkwa. kahkiyaw kī‑miywāyāhēwak ōhi kā‑āhkosiyit.
[17] ēkwa māwaci-kihci-ayamihēwiyiniw ēkwa anihi kā‑wīcēkot Sadduceewa kī-akisowak, mitoni kī‑māci-ohtēyimēwak ōhi itisahwākana, ēkosi nānitaw kī‑nōhtē-tōtawēwak.
[18] kī‑otinēwak ēkwa kī‑kipahwēwak kipahotowikamikohk.
[19] māka pōsko-tipisk okīsikōma kā‑tipēyihcikēt kī‑yōhtēnamiyiwa ōma kipahotowikamik, ēkwa wayawītahikwak. ēkwa ōmisi itikwak,
[20] “itohtēk kihci-ayamihēwikamikohk ēkwa wīhtamāhkok ayisiyiniwak ōma oski-pimātisiwin.”
[21] ēkosi itisahwākanak kī‑tāpwēhtawēwak okīsikowa ēkwa kiyipa ē‑kīkisēpāyāyik kī‑pīhtikwēwak kihci-ayamihēwikamikohk, ē‑māci-kiskinohamākēcik. māwaci-kihci-ayamihēwiyiniw ēkwa owīcēwākana natomēwak kahkiyaw Jewa onīkānīwa kita-māmawopicik. ēkwa kī‑itasiwēwak kipahotowikamikohk kita-pēsiwāyit itisahwākana.
[22] kā‑takohtēcik nētē, namōya ēkota ayāyiwa itisahwākana, ēkosi nitawi-wīhtamawēwak omāmawopiwa,
[23] ōmisi itēwak, “ēkotē ē‑takohtēyāhk kwayask kikiskāpiskahikātēw kipahotowikamik ēkwa simākanisak ēkota kī‑kanawēyihcikēwak, māka ispīhk ē‑yōhtēnamāhk iskwāhtēma namōya awiyak ēkota ayāw.”
[24] ēkwa ana simākanisiwikimāw kā‑tipēyimāt okanawēyihcikēwa kihci-ayamihēwikamikohk ēkwa kihci-ayamihēwiyiniw kī‑wa-wānēyihtamwak tānitē kita-kī-ayāyit.
[25] ēkota pēyak nāpēw kā‑takohtēt ē‑itwēt, “aniki nāpēwak kā‑kī-kipahwāyēkok kiskinohamawēwak ayisiyiniwa kihci-ayamihēwikamikohk.”
[26] ana simākanisiwikimāw ē‑wīcēwāt osimākanisīma nitawāpēnikēwak ēkwa pēsiwēwak. namōya ohci-pakamahwēwak ayisk kī‑kostēwak ayisiyiniwa nānitaw isi kita-pimwasinātikocik.
[27] kī‑pīhtikwahēwak ita onīkānīwak ē‑māmawopicik ēkota ē‑nīpawihācik ēkwa māwaci-kihci-ayamihēwiyiniw kakwēcimēw,
[28] “kikī-kitahamātinān kwayask ēkāya kita-kiskinohamākēyēk owīhowinihk ana nāpēw! māka ēkwa kikiskinohamawāwāwak ayisiyiniwak misiwē Jerusalemihk, ēkwa kikakwē-atāmēyiminān awa nāpēw kā‑ohci-nipit.”
[29] ēkwa Peter mīna kotaka itisahwākanak ōmisi itēwak, “piko kita-tōtamāhk kisē-manitow ē‑itikoyāhk, ispīhci ayisiyiniwak kita-natohtawāyāhkok.
[30] kisē-manitow kimosōminānak kā‑kī-mawimostawācik kī‑āpisisimēw Jesusa ēwako kā‑kī-nipahāyēk ē‑akotāyēk pimitāskwahikanihk.
[31] māka kisē-manitow okihciniskiyihk kī‑apīhēw kī‑okimāwihēw kita-nīkānīyit ēkwa kita-pimācihiwēyit. ōma kā‑tōtahk ayisiyiniwa Israel ohci kita-kwēskātisiyit ēkwa kita-pōnēyihtamācik omāyi-tōtamowiniwāwa.
[32] niwāpahtēnān ē‑kī-ispayihikot Jesus ēkosi niwīhtamawānānak ayisiyiniwak, ēkwa kā‑kanātisit ahcāhk mīna kiskēyihtamōhēw ayisiyiniwa ēwako ōma tāpwēwin. kā‑kanātisit ahcāhk kisē-manitow miyēw anihi ayisiyiniwa kā-natohtākot.”
[33] ispīhk ōki wiyasiwēwi-okimāwak ē‑pēhtahkik ōma, namōya kakētihk iyikohk kī‑kisiwāsiwak ēkwa kī‑nōhtē-nipahēwak.
[34] ēkwa pēyak ana wiyasiwēwi-okimāw Gamaliel kā‑itiht, kī‑pasikōw, ēwako pēyak Pharisee kā‑kiskinohamākēt Jewak owiyasiwēwin ēkwa kahkiyaw ayisiyiniwa kī‑kistēyimik, ēkwa kī‑itasowēw kita-wayawīhtahimiht ōhi itisahwākana pitamā.
[35] ēkwa ōmisi itēw, “nāpētik Israel ohci, nawac kita-kitēyihtamēk tānisi ē‑wī-tōtawāyēkok ōki nāpēwak.
[36] kikiskisināwāw namōya kayās Theudas kī‑itāw, ēwako nāpēw mistakimisow. nānitaw nēwāw mitātahtomitanaw ayisiyiniwa kī‑pimitisahok. kī‑nipahāw ēkwa otiyinīma nanānis kī‑itāmoyiwa ēkota kī‑pōnipayin otisīhcikēwin.
[37] ēkota ohci ē‑otihcipayik kā‑akimihcik ayisiyiniwak, Judas Galileehk ohci kī‑māyahkamikisiw. mihcēt ayisiyiniwa kī‑pimitisahok. kī‑nipahāw mīna ēwako, ēkwa kahkiyaw otiyinīma nanānis kī‑itāmoyiwa.
[38] ēkosi kiwīhtamātināwāw ēkāya nānitaw tōtāhkok ōki nāpēwak. pōnihihkok! kīspin ayisiyiniw ohci kā‑isi-kīsēyihtahkik ēkwa tōtamwak ka-pōni-ihtakwan.
[39] kīspin ohtihcipayiki kisē-manitow ohci, namōya kika-kī-nakināwāwak. nānitaw isi kika-nōtināwāw kisē-manitow!” kī‑tāpwēhtawēwak tānisi kā‑itwēyit Gamalielwa.
[40] kī‑tēpwātēwak ōhi itisahwākana ēkwa okanawēyihcikēwa itasowēwak kita-pasastēhwāyit. kī‑kitahamawēwak ēkāya kīhtwām kita-pīkiskwātācik ayisiyiniwa owīhowiniyik Jesusa ēkosi kī-pakitinēwak.
[41] ēkwa ōki itisahwākanak ē‑wayawīcik māmawapiwikamikohk ohci kī‑miywēyihtamwak. ayisk ē‑itēyihtahkik kisē-manitowa ē‑tēpakēyimikowisicik kita-nēpēwi-kakwātakihtācik Jesusa owīhowiniyihk ohci.
[42] tāhto kīsikāw kī‑kiskinohamākēwak mīna kī‑kakēskihkēmowak omiywācimowiniyiw Jesusa onawasōnākan, kihci-ayamihēwikamikohk ēkwa ayisiyiniwa wīkiyihk.