[1] nikī-atamiskawānānak ēkwa nikī-sipwēyācihonān. ē‑kī-pimāsiyāhk nāpihkwānihk taskam, nikī-otihtēnān Cos kihci-ōtēnāhk; ē‑wāpahk Rhodes nikī-otihtēnān, ēkota ohci Patara kihci-ōtēnaw.
[2] ēkota nikī-pōsinān kotak nāpihkwān ē‑kī-miskamahk Phoenicia ē‑ispayik, ēkosi nikī-sipwēyāsinān.
[3] nikī-wāpahtēnān ministik Cyprus ēkwa nimitāw itēhkē nikī-ati-miyāskēnān piyisk nikī-takwāsinān Syria askīhk, ēkwa nikī-kapānān Tyre kihci-ōtēnāhk. ēkota ē‑nihtinamihk pōsihtāsowina.
[4] ēkota ninakiskawānānak otayamihāwak ēkwa nikī-kiyokawānānak tēpakohp kīsikāw. kī‑kitahamawēwak Paula ēkāya kita-itohtēyit Jerusalemihk, wiya ēkosi ē‑itikowisicik kā‑kanātisiyit ahcāhkwa ē‑wīhtamākocik.
[5] ēkosi ē‑kīsi-ispayik nisipwēhtānān. kahkiyaw ōki otayamihāwak, owīkimākaniwāwa ēkwa ocawāsimisiwāwa nikī-pimitisahokonānak kihci-ōtēnāhk ohci, ēkotē sisonē kihcikamīhk nikī-ocihcihkwanapinān ē‑ayamihāyāhk.
[6] ēkwa ē‑kī-atamiskawāyāhkok, nikī-pōsinān nāpihkwānihk, ēkwa wiyawāw ōki kī‑ati-kīwēwak.
[7] Tyre ē‑nakatamāhk nikīhtāsinān Ptolemais, ēkotē nikī-atamiskawānānak kā‑ociwāmihtocik otayamihāwak. pēyak kīsikāw nikiyokānān ēkota.
[8] ē‑wāpahk nikī-itohtānān Caesarea. ēkota nikī-kapēsinān Philip wīkihk, ēwako okakēskihkēmow, pēyak kā‑kī-nawasōniht ispī tēpakohp nāpēwak kā‑nawasōnihcik Jerusalemihk.
[9] kī‑otānisiw nēwo oskinīkiskwēwa, ē‑wīhtamākēyit kisē-manitowa opīkiskwēwiniyiw.
[10] tānitahto kīsikāw ēkotē ē‑mēkwā-ayāyāhk kā‑takohtēt pēyak okiskiwēhikēw Agabus itāw, Judea askīhk ē‑ohtohtēt.
[11] nikī-pē-nātikonān ēkwa ē‑otinahk Paula opakwahtēhoniyiw kī‑napwahpitam oskāta ēkwa ocihciya ē‑itwēt, “ōmisi itwēw kā‑kanātisit ahcāhk, ‘ana kā‑tipēyihtahk ōma pakwahtēhon ōmisi ka-tōtawāw: kita-tahkopitikot Jewa Jerusalemihk, ēkwa pītosiyiniwak kita-miyāwak kita-otinācik.’”
[12] ispī ē‑pēhtawāyāhk ōma ē‑itwēt, niyanān mīna kotakak ēkota kā‑ayācik nikī-kitahamawānān Paul ēkāya kita-itohtēt Jerusalemihk.
[13] māka ōmisi nitikonān, “tānēhki kā‑mātoyēk mīna kā‑pīkonamēk nitēh? nitēpēyimon kita-tahkopitikawiyān ēkotē Jerusalemihk, ahpō piko kita-nipahikawiyān wiya ohci kā‑tipēyihcikēt Jesus.”
[14] namōya nikī-sākōcimānān ēkosi nitawāc, “kā‑tipēyihcikēt otitēyihtamowin kita-wī-tōcikātēw,” nititānān.
[15] pitamā ēkota ē‑kī-kisātamāhk, ēkwa ē‑wawēyīyāhk nikī-sipwēhtēhonān Jerusalemihk isi.
[16] ātiht otayamihāwak Caesarea ohci nikī-wīcēkonānak ē‑itohtahikoyāhkok wīkihk ana nāpēw kā‑wī-kapēsimostawāyāhk, Mnason itāw, Cyprus ohci, ēwako ē‑kī-tāpwēwakēyihtahk kayās ohci.
[17] ē‑takohtēyāhk Jerusalemihk ociwāmimāwak kā‑ayamihācik ninakiskākonānak ē‑miywēyihtahkik.
[18] ē‑wāpahk nikī-wīcēkonān Paul ē‑nitawi-kiyokawāyāhk James ēkwa kahkiyaw onīkānīwak ayamihāwinihk ēkota kī‑ayāwak.
[19] Paul kī‑atamiskawēw ēkwa kī‑ācimostawēw kahkiyaw kīkway kisē-manitowa kā‑kī-tōtamawāyit pītosiyiniwa otatoskēwinihk ohci.
[20] ē‑pēhtahkik ōma, kahkiyaw kī‑mamihcimēwak kisē-manitowa. ōmisi itēwak Paula, “niciwā! mitoni kakwāyakēyatiwak Jewak ē‑tāpwēhtahkik. kahkiyaw itwēwak piko kita-pimitisahamāhk Moses owiyasiwēwin.
[21] kī‑pēhtamwak ē‑kiskinohamawacik kahkiyaw Jewak ita askiya kā‑ayācik pītosiyiniwak ē‑itacik ēsa kita-pakitinahkik Mosesa owiyasiwēwina. ēkwa ē‑itācik ēkāya kita-wāsakāmēsāwātācik awāsisa mīna ēkāya kita-pimitisahahkik Jewa otisīhcikēwiniyiwa.
[22] kēhcinā kita-pēhtamwak ē‑takohtēyan, tānisi ēkwa ka‑tōtamihk?
[23] ōmisi kika-tōtēn ōma kā‑wīhtamātahk. nēwowak ōta nāpwēwak ē‑kī-kihci-itwēcik.
[24] pimitisahok pēkihisotwāwi kīsta kika-pēkihison, ēkwa kika-tipahikēstamawāwak. ēkosi kita-kī-kāskipātamwak ostikwāniwāwa. ēkwa ayisiyiniwak ēkota ohci kita-kiskēyihtamwak anima kā‑itikawiyan pikonita ēsa pīkiskwēwin kita-itēyihtamwak. kita-kiskēyihtamwak ē‑pimitisahaman Moses owiyāsiwēwin.
[25] māka ōki pītosiyiniwak kā‑māci-ayamihācik, nikī-itisahamawānānak masinahikanis. nikitahamawānānak ēkāya kita-mīcicik kīkway ē‑nīminamācik manitōhkāna, ēkāya kita-sāmahtahkik mihko, ēkāya wiyās kita-mīcicik pisiskiwa ohci ē‑kī-nipahopitimiht, ēkwa ēkāya kita-pisikwātisicik.”
[26] ēkosi Paul kī‑wīcēwēw nāpēwa, ēkwa ē‑wāpaniyik kī‑pēkihisowak. kī‑pīhtikwēw kihci-ayamihēwikamikohk. kī‑wīhtamawēw ayamihēwiyiniwa tānitahto kīsikāwa isko kita-kīsi-pēkihisocik ēkospīhk ka‑pakitināsohk pā‑piskihc wiyawāw ohci.
[27] ispī tēpakohp kīsikāw ē‑kī-ispayik, ātiht Jewak Asia askīhk ohci ē‑wāpamācik Paula ēkota kihci-ayamihēwikamikohk, kī‑maci-sīhkiskawēwak ayisiyiniwa ēkwa kī‑otihtinēwak Paula.
[28] “pēhtamok, nāpētik Israel ohci! wīcihinān!” ē‑isi-tēpwēcik. “awa nāpēw misiwē itē kiskinohamawēw ayisiyiniwa kita-pakwātāyit Jewa, kita-pakwātamiyit owiyāsiwēwiniyiwa Mosesa ēkwa kihci-ayamihēwikamik. wīsāmēw ēkwa pīhtikwahēw pītosiyiniwa kihci-ayamihēwikamikohk ē‑wīpātiskamiyit ōhi kā‑kanātēyihtākwahki kihci-kīkwaya!”
[29] (ōma kā‑itwēcik ē‑kī-wāpamācik Trophimusa Ephesus ohci, ē‑wīcēwāyit Paula kihci-ōtēnāhk, ēkosi ē‑itēyihtahkik ē‑kī-pīhtikwahāyit kihci-ayamihēwikamikohk.)
[30] ēkwa ōki kahkiyaw ayisiyiniwak kihci-ōtēnāhk kī‑māyahkamikisiwak ē‑ispahtācik kihci-ayamihēwikamikohk ēkwa ē‑otihtinācik Paula ēkota ohci ē-wayawītāpēcik. sēmāk iskwāhtēma kī‑kipahikātēwa.
[31] kī‑kakwē-nipahēwak Paula, pīkiskwēwin itisahamawāw kihci-simākanisiwikimāw kā‑tipēyihtahk ē‑itiht, kahkiyaw ayisiyiniwak ē‑māyahkamikisicik Jerusalemihk misiwē.
[32] sēmāk kihci-simākanisiwikimāw sipwēhtahēw simākanisiwikimāwa ēkwa simākanisa ispahtāwak ita kahkiyaw ayisiyiniwak kā-ayācik. mayaw ōki ayisiyiniwak ē‑wāpamācik simākanisa, kī‑pōni-pakamahwēwak Paula.
[33] ana kihci-simākanisiwikimāw kī‑otinēw Paula, ēkwa itasowēw simākanisa kita-tahkopitāyit nīso pīwāpiskwēyāpiya ohci. ēkwa kakwēcihkēmow, “awīna awa nāpēw? kīkway awa kā‑māyi-tōtahk?” itēw.
[34] ātiht ōki ayisiyiniwak pēyak kīkway ohci ē‑kā‑kisīwēcik, kotakak pītosi-kīkway. mitoni namōya kī‑kēhcināhow kihci-simākanisiwikimāw tānisi kēhcināc ē-ispayiyik, ēkosi itasowātēw otoskinīkīma kita-itohtahāyit Paula simākanisiwikamikohk.
[35] ē‑takohtahācik tahkoskēwinihk kī‑āmaciwē-ohpinēwak, osām ayisiyiniwak ē‑kisiwāhikocik.
[36] kahkiyaw ōki ayisiyiniwak ē‑kakwē-otihtinācik Paula ē‑tēpwēcik, “nipahātān!”
[37] ē‑wī-pīhtikwahācik Paula simākanisiwikamikohk, ōmisi itēw Paul kihci-simākanisiwikimāwa, “mahti, nika-kī-pīkiskwān cī?” kihci-simākanisiwikimāw itēw, “Greek itowēwin cī kinisitohtēn?
[38] ēkosi cī namōya ēsa kiya ana Egyptīwiyiniw, namōya kayās kā‑kī-nōtināt okimānāhk kā‑pimipayihtāyit ē‑itohtahāt nēwāw kihci-mitātahtomitanaw nōtinitowiyiniwa pakwataskīhk?”
[39] Paul itēw, “niya ōma Jew ē‑kī-nihtāwikiyān Tarsus kihci-ōtēnāhk, Cilicia askīhk, ē‑tipēyihtākosiyān ē‑kihcakihtēk kihci-ōtēnaw. mahti nika-pīkiskwātāwak ōki ayisiyiniwak.”
[40] kihci-simākanisiwikimāw kī‑pakitinēw kita-pīkiskwēyit. ēkosi Paul kī‑nīpawiw tahkohc tahkoskēwinihk ē‑ohpiniskēstawāt ayisiyiniwa. ē‑pōnwēwitamiyit, Jewak itowēwin kī‑ohci-pīkiskwātēw.