[1] mēkwāc Apollos ē‑ayāt Corinthihk, Paul ēkota ohci kī‑pimohtēhow taskam kā‑piskihtakihtēk Asia askiy, ē‑ati-takohtēt Ephesus kihci-ōtēnāhk. ēkota kī‑nakiskawēw ātiht otāpwēhtamowa.
[2] ōmisi itēw ēsa, “kikī-miyikowisināwāw cī kā‑kanātisit ahcāhk ispī kā‑māci-tāpowakēyihtamēk?” “namwāc ahpō nitohci-pēhtēnān ē‑ihtāt kā‑kanātisit ahcāhk,” itēwak.
[3] “ēkosi māka, tānisi kā‑isi-sīkahāhtākawiyēk?” Paul kakwēcimēw. “osīkahāhtākēwin John,” itēwak ōki.
[4] ōmisi itēw Paul, “John kī‑sīkahāhtawēw anihi kā‑pōnihtāyit macātisiwin; ēkwa kī‑wīhtamawēw Israelīwiyiniwa kita-tāpwēhtahkik anihi kā‑wī-takohtēyit mwēstas, ēwakoni Jesusa.”
[5] ispī ē‑pēhtahkik ōma, kī‑sīkahāhtawāwak owīhowinihk kā‑tipēyihcikēyit Jesusa.
[6] Paul kī‑sāminēw pā‑piskihc, ēkwa kā‑kanātisiyit ahcāhkwa kī‑pā-pīhtikwēskākwak. pītos ē‑isi-pīkiskwēcik ēkwa mīna kī‑wīhtamwak otitwēwiniyiw kisē-manitowa.
[7] māmawo nīsosāp nāpēwak ōki kā‑kī-sīkahāhtācik.
[8] Paul kī‑itohtēw ayamihēwikamikohk, ēkwa nisto pīsim ēkota sōhki kī‑kiskinohamawēw ayisiyiniwa. kī‑kakwē-sākōcimēw kita-nisitohtamiyit otipēyihcikēwiniyiw kisē-manitowa.
[9] māka ātiht kī‑sasīpihtamwak ēkwa namōya tāpwēhtamwak, ēkosi kī‑māyi-pīkiskwātamwak otisīhtwāwiniyihk kā‑tipēyihcikēyit ita ayisiyiniwa kita-pēhtākocik. ēkosi Paul kī‑nakatēw ē‑wīcēwāt anihi kā‑tāpwēhtamiyit; ēkwa tahto kīsikāw kī‑pīkiskwēw. kī‑āyimōhtamawēw ayisiyiniwa okiskinohamātowikamikohk Tyrannus.
[10] ēkota Paul kī‑kiskinohamākēw nīso askiy, ēkosi kahkiyaw Jewak mīna pītosiyiniwak ēkota kā‑ayācik kā‑piskihtakihtēk askiy Asia kā‑itahkik, kī‑pēhtamwak otitwēwiniyiw kā‑tipēyihcikēyit.
[11] kisē-manitow māmaskāci mamāhtāwi-kīkwaya kī‑tōtam Paula ē‑tōtēstamākot.
[12] ahpō piko capiskākanēpisonisa mīna aspastākana ē‑kī-āpacihtāt Paul, ēwakoni ē‑itohtatācik otāhkosiwa ē‑ohci-miywāyāyit mīna maci-ahcāhkwa ē‑nakatikoyit.
[13] ātiht Jewak kī‑papāmohtēhowak ē‑kaskihtācik kita-wayawītisahwācik maci-ahcāhkwa. kī‑kocihtāwak kita-āpacihtācik Jesusa owīhowiniyiw ēkosi kita-tōtahkik. ē‑itācik ōhi ahcāhkwa, “kititasowātitin kita-wayawīyan owīhowinihk Jesus, Paul kā‑ācimāt ē‑kakēskihkēmot.”
[14] kihci-ayamihēwiyiniw, Sceva ē-isiyihkāsot, tēpakohp okosisa ōma kā‑tōtamiyit.
[15] māka awa maci-ahcāhk itēw, “nikiskēyimāw Jesus, ēkwa nikiskēyimāw Paul, māka awīna ōma kiyawāw?”
[16] ana pēyak nāpēw ē‑pīhciyawēskākot maci-ahcāhkwa kī‑kwāskohtotawēw kahkiyaw. kī‑misi-pakamahwēw ē‑mihkowatahwāt ēkwa ē‑kētasākēpitāt, kahkiyaw wayawīyāmohkēw wāskāhikanihk ohci.
[17] kahkiyaw Jewak ēkwa pītosiyiniwak kā‑ayācik Ephesus kī‑pēhtamwak ōma, ēkosi kī‑kostamwak ēkwa ayiwāk kī‑kistēyihtamwak owīhowiniyiw kā‑tipēyihcikēyit Jesusa.
[18] mihcēt otayamihāwak kī‑takohtēwak, ayisiyinīnāhk kwayask ē‑ātotahkik kahkiyaw kakēpātisiwina kā‑kī-pē-tōtahkik.
[19] mihcēt aniki kā‑kī-āpacihtācik maci-maskihkiy kī‑pētāwak omasinahikaniwāwa ēkwa kī‑macostēhamwak ē‑kitāpamikocik ayisiyiniwa. māmawo ē‑akihtahkik ē‑itakihtēyiki niyānanomitanaw tahtwāw kihci-mitātahtomitanaw wāpiski-sōniyāwa ispayiyiwa.
[20] ēkosi mihcēt ayisiyiniwak kī‑pēhtamwak kā‑tipēyihcikēt otitwēwin mīna kī‑sōhkaniyiw ayiwāk ati.
[21] ēkwa kahkiyaw ōhi ē‑kī-ispayiki, Paul kī‑kīsēyihtam kita-sāpohtēhot Macedonia askīhk ēkwa Achaia askīhk ēkota ohci Jerusalemihk. ōmisi itwēw, “ēkotē kī‑takohtēyāni piko kita-itohtēyān Rome kihci-ōtēnāhk.”
[22] kī‑itisahwēw Timothywa ēkwa Erastusa, ēwakoni māna kā‑wīcihikot, Macedonia kita-itohtēyit. māka wiya kī‑kisātam pitamā Asia, kā‑piskihtakihtēk askiy.
[23] mēkwāc ēkospī mitoni kī‑māyahkamikan Ephesus kihci-ōtēnāhk, kā‑tipēyihcikēt okiskinohamākēwin ohci.
[24] pēyak nāpēw Demetrius itāw, wāpiski-sōniyāwa ohci ē‑osīhcāsit owāskāhikanisa manitōhkāniskwēw Artemis. ōma kā‑osīhcikēt nāpēwak kī‑misi-sōniyāhkēwak ēkota ohci.
[25] Demetrius kī‑natomēw kahkiyaw ōhi otatoskēwa ēkwa mihcēt kotaka pēyakwan otatoskēwiniwāw, ēkwa itēw, “hāw nāpētik! kikiskēyihtēnāwāw wēyotisiwin ōma kitatoskēwinināhk ohci.
[26] māka kiwāpahtēnāwāw mīna kipēhtēnāwāw awa nāpēw Paul kā‑itiht ē‑tōtahk. mihcēt kwēskinēw ayisiyiniwa ōta Ephesus ēkwa kēkāc misiwē Asia askīhk ē‑itāt, ‘manitōhkānak kā‑osīhihcik namōya aniki ē‑manitowicik.’
[27] aswēyihtamok ēkāya kita-wānāhtāwak kitatoskēwininaw, ēkwa māyi-wīhowin kika‑ayānānaw. māka namōya ēwako piko, māka owāskāhikan kimanitowiskwēminaw Artemis namōya ēkwa kita-kihcēyihtamwak. kita-pīkonamwān okistēyihtākosiwin ēwako awa misiwē Asia kā‑mawimostāht ēkwa kotakihk askīhk.”
[28] ē‑pēhtahkik ōma ōki ayisiyiniwak kī‑kisiwāsiwak ēkwa kī‑tēpwēwak, “kihcēyihtākosiw Artemis Ephesus ohci!” ē‑itwēcik.
[29] piyisk kahkiyaw ayisiyiniwak kī‑tēpwēwak kihci-ōtēnāhk. ayisiyiniwak kī‑otihtinēwak Paul owīcēwākana, Gaius ēkwa Aristarchus Macedonia askīhk ohci, ēkwa kiyipa itohtahēwak ita māna kā‑māmawopayicik ayisiyiniwak.
[30] Paul kī‑nōhtē-pīkiskwātēw ayisiyiniwa, māka otayamihāwa namwāc wī‑pakitinik.
[31] ātiht mīna owīcēwākana Paul, okimāwa kā‑tipēyihtamiyit kā‑piskihtakihtēki askiya kī‑kitahamāk ēkāya ēkotē kita-itohtēt.
[32] ē‑mēkwā-māmawopicik kā-māyahkamikāhk, ātiht ayisiyiniwak pēyakwan isi kī‑tēpwēwak, ēkwa kotakak kī‑tēpwēwak pītos ē‑itēyihtahkik. ayisk osām piko mihcēt namōya ohci-kiskēyihtamwak tānēhki kā‑māmawopayicik.
[33] ātiht ayisiyiniwak ki‑itēyihtamwak Alexandera otōcikaniyiw, ayisk Jewak kī‑tōtamohēwak kita-itohtēyit nīkān pīhtēyask. Alexander ē‑ohpiniskēyit ē‑wī-kakwē-pīkiskwēt kita-nātamāsot.
[34] māka ē‑nisitawēyimācik Jewiyiniwa, kahkiyaw kī‑tēpwēwak kinwēs nīso tipahipīsimwān iyikohk, ē‑itwēcik, “kihcēyihtākosiw Artemis Ephesus ohci!”
[35] wiya āta wiya pēyak onīkānīw kihci-ōtēnāhk ohci kī-kāmwācihēw. “nāpētik Ephesus ohci!” itēw. “kahkiyaw awiyak kiskēyihtam ayisiyiniwak Ephesus ohci ē‑kanawēyimācik kā‑kihcēyihtākosiyit Artemisa okihci-wāskāhikanihk ēkwa ana manitow asiniy ispimihk kā‑kī-ohci-pahkisihk.
[36] namōya awiyak ēwako kita-kī-ānwēhtam. ēkosi kāmwātisik ēkwa ēkāya mōhcohkāsok.
[37] ōki nāpēwak ōta kikī-pēsiwāwāwak, āta ēkāya kīkway ē‑kimoticik manitohkānikamikohk ohci, ahpō ēkāya nānitaw ē‑isi-maci-pīkiskwātācik ōhi manitōhkāniskwēwa.
[38] kīspin Demetrius ēkwa anihi nāpēwa kā‑wītatoskēmikot tahkiskikēwak, wiyasiwēwinihk kita-pīhtikwatāwak ēkota wiyasiwēwikimāwa ihtakoyiwa.
[39] māka kīspin kinitawēyihtēnāwāw ayiwāk kīkway, piko kita-pīhtikwatahk māmawopiwinihk ayisiyiniwak kita-kwayaskwastāwak.
[40] ka‑astāsiyahk ōma kā‑wanahkamikisiyahk, ahpō ētikwē kika-atāmēyimikonawak kiyānaw kitōcikaninaw ayisk namōya ka‑kī-kaskihtānaw ka‑naskwēwasimāyahkok. pikonita ōma kā-māyahkamikahk.”
[41] ēkwa ē‑kīsi-pīkiskwēt kī‑nakinam māmawopiwin.