[1] Paul ē‑kī-pīkiskwātāt okimāwa Athens kihci-ōtēnāhk, kī‑ati-sipwēhtēw Corinth kihci-ōtēnāhk ē‑itohtēt.
[2] ē‑takohtēt ēkotē kī‑nakiskawēw Aquilawa, Jewa ē‑kī-nihtāwikiyit Pontus askīhk. kī‑wīcēwēyiwa owīkimakaniyiwa Priscilla itimāwa, Italy askīhk mastaw ēkotē ē‑ohtohtēcik ayisk māmawēyas kihci-okimāw Claudius ē‑kī-itasowēt kahkiyaw Jewa kita-nakatamiyit Rome kihci-ōtēnaw. Paul kī‑nitawāpamēw,
[3] ēkwa kī‑wīci-ayāmēw ē‑wītatoskēmāt, wiya Paul piko kita-pamihisot, ē‑wiyikwātahk pakwānikamikwa. wīstawāw ēkosi ē‑isi-atoskēcik ōki.
[4] tahtwāw ē‑ayamihēwi-kīsikāk Paul kī‑itohtēw Jewa otayamihēwikamikowāhk ē‑pīkiskwātāt Jewa mīna Greek ayisiyiniwa ē‑āyimōhtamawāt kita-tāpwēhtamiyit.
[5] ispī Silas ēkwa Timothy ē‑takohtēcik Macedonia ohci, Paul kī‑pōni-atoskēw nayēstaw kī‑kakēskimēw ē‑wīhtamawāt Jewa, Jesusa ēwakoni onawasōnākana.
[6] ispī ē‑ānwēhtākot ēkwa ē‑mā-maci-āyimōmikot, kī‑pāpawitihtāw oskotākay, ē‑itāt, “kīspin kiwanihonāwāw, kiyawāw kitōtāsonāwāw, namōya niya ēwako nitōtamowin. ōta ohci nitawāc pītosiyiniwak piko nika-kiskinohamawāwak.”
[7] ēkosi kī‑sipwēhtēw ē‑itohtēt Titius Justusa wīkiyihk, ēwako pītosiyiniw ē‑ayamihēstawāt kisē-manitowa. ē‑wītapimākanit Jewak otayamihēwikamikoyihk.
[8] Crispus onīkānīw ayamihewikamikohk kī‑tāpwēhtawēw kā-tipēyihcikēyit, ēkosi wīstawāw ē‑ihtasicik wīkiwāhk asici mihcēt kotakak ayisiyiniwak Corinthihk ē‑pēhtawācik Paula kī‑tāpwēhtamwak, ēkosi kī‑sīkahāhtawāwak.
[9] pēyakwāw ē‑nipāt Paul kī‑pawātam ōmisi ē‑itikot kā‑tipēyihcikēyit, “ēkāya kosta kita-pīkiskwēyan ēkwa ēkāya kika-pōmēhikwak,
[10] ayisk kiwīcētin. namōya awiyak nānitaw kika-tōtāk, mihcēt aniki ēkota kihci-ōtēnāhk kā‑ayācik nitiyinīmak.”
[11] ēkota Paul kī‑kisātam pēyak askiy mīna nikotwāsik pīsim, ē‑kiskinohamawāt ayisiyiniwa otitwēwiniyiw kisē-manitowa.
[12] ispīhk Gallio ē‑pimipayihtāt Achaia askiy, ātiht Jewak māmawo kī‑otinēwak Paula ē‑itohtahācik wiyasiwēwikamikohk.
[13] “awa nāpēw kiskinohamawēw ayisiyiniwa tānisi kita-isi-mawimostāmiht kisē-manitowa, namōya ēkosi kiyānaw itastēw wiyasiwēwinihk,” itēwak ēsa.
[14] mwēhci Paul ē‑wī-pīkiskwēt, ōmisi Galliowa kā‑itāyit Jewa, “kīspin awa nāpēw namōya kwayask tōtam, ahpō misi-māyi-tōtam, ētikwē piko kita-natohtātakok ēkwa kita-sāsīpēyihtamātakok.
[15] māka kīspin nayēstaw kikīhkātonāwāw ātiht pīkiskwēwina ohci mīna wīhowina mīna kiwiyasiwēwiniwāw, kiyawāw piko kita-kīsastāyēk. namōya niya nika-wiyasiwātēn!”
[16] ēkwa kī‑wayawītisahwēw.
[17] kahkiyaw ayisiyiniwak kī‑otihtinēwak Sosthenesa, kā‑nīkānīyit ayamihēwikamikohk, ēkwa ē‑pakamahwācik ēkota ohtiskaw wiyasiwēwikamikohk. Gallio wiya namōya ē‑nākatohkēt ōma ē‑tōtamiyit.
[18] Paul kī‑kisātam ēkota Corinth kihci-ōtēnāhk mihcēt kīsikāwa, ēkwa kī‑nakatēw otāpwēhtamowa ispī ē‑pōsit nāpihkwānihk kī‑sipwēyāsiwak Syria ē‑itohtēcik. kī‑wīcēwikiw Priscillawa ēkwa Aquilawa. mwayēs ē‑pōsit Paul kī‑kihcihtwēw Cenchreae kihci-ōtēnāhk ēwako ohci kā‑kī-paskwātihpēsot.
[19] kī‑takwāsiwak Ephesusihk, ita Paul kā‑nakatāt Priscillawa ēkwa Aquilawa. ēkosi kī‑nitawi-pīhtikwēw ayamihēwikamikohk ē‑kakēskimāt Jewa.
[20] ēkosi kī‑kisācimik ēkota kinwēs kita-ayāt, māka namōya ohci-tāpwēhtawēw.
[21] ōmisi itēw ē‑ati‑sipwēhtēt, “kīspin itēyimici kisē-manitow, nika-pē-itohtān.” kī‑pōsiw nāpihkwānihk Ephesus ohci.
[22] ē‑takohtēt Caesarea kihci-ōtēnāhk, kī‑itohtēw Jerusalemihk ē‑nitawi-atamiskawāt otayamihāwa. ēkota ohci kī‑itohtēw Antiochihk.
[23] ēkota ē‑kī-ayāt pitamā, kī‑sipwēhtēw ē‑papāmi-kiyokēt Galatia askīhk ēkwa Phrygia askīhk, ē‑sīhkiskawāt otāyamihāwa.
[24] pēyak Jew Apollos itāw, ē‑kī-nīhtāwikit Alexandria kihci-ōtēnāhk, kī‑pē-takwācihow Ephesusihk. mitoni kī‑nihtā-pīkiskwēw ēkwa kwayask kī‑kiskēyihtam kihci-masinahikan.
[25] kwayask kī‑kiskinohamawāw otisīhtwāwiniyihk kā‑tipēyihcikēyit, ēkwa mistahi kī‑cīhkēyihtam kita-pīkiskwēt ēkwa kwayask kita-kiskinohamākēt Jesusa ohci. māka wiya ē‑kiskēyihtahk ēwako piko osīkahāhtākēwin John.
[26] namōya ohci-kostam kita-pīkiskwēt ayamihēwikamikohk. Priscilla ēkwa Aquila ē‑pēhtawācik, kī‑kīwētahēwak ēkwa kwayask nisitohtamōhēwak anihi ēkāya cēskwa ē‑nisitohtamiyit kisē-manitowa otisīhtwāwiniyiw.
[27] Apollos ēkwa kī-wī‑itohtēw Achaia askīhk, ēkosi otāpwēhtamowak Ephesus ohci kī‑wīcihēwak ē‑itisahamawācik masinahikan ociwāmimāwa ēkotē Achaia kā‑ayāyit kita-atamiskawācik. ēkotē ē‑takohtēt mitoni kī‑wīcihēw anihi kā‑tāpowakēyimāyit Jesusa ayisk kisē-manitow kisēwātotawēw.
[28] Apollos ē‑sōhki-pīkiskwēt kī‑sākōcimēw Jewa ayisiyinīnāhk ē‑nisitohtamōhāt kihci-masinahikanihk ohci awa Jesus ēwako onawasōnākan.