[1] niyānan kīsikāw ē‑kī-ispayik māwaci-kihci-ayamihēwiyiniw Ananias ēkwa onīkānīwak ēkwa pēyak opīkiskwēstamākēw Tertullus ē‑isiyihkāsot kī‑nitawi-wāpamēwak okihci-pimipayihcikēw Felixa mīna kī‑misimēwak Paula.
[2] ēkosi Paul kī‑natomāw ēkwa Tertullus māci-pīkiskwēw ēkwa āyimōmēw Paula ē‑kī-tōtamiyit. ōmisi ē‑itwēt: “hāw okihci-pimipayihcikēw! kinwēs pēyāhtakan kwayask ē‑nīkānīyan ōta, ēkwa ōki ayisiyiniwak miywāyāwak kiya ohci ē‑miyopayihtāyan ōma askiy.
[3] tāpitawi nimiywēyihtēnān piko itē itohtēyāhko, mistahi kinanāskomitinān ēwako ohci.
[4] namōya kinwēs kinōhtē-otamihitin, māka kipakosēyimitin kita-kitimākihtawiyāhk ōma kā‑wī-itwēyāhk.
[5] nikiskēyihtēnān ēkwa awa nāpēw ē-mikoskātahkamikisiskit; ē‑sīhkiskahk māyahkamikisiwin Jewiyinīnāhk piko itē ōta askīhk; ēkwa ē‑nīkānīt Nazarena kā‑itimiht māmawo.
[6] kī‑kakwē-māyakihtam kihci-ayamihēwikamik, māka nikī-otinānān.
[8] kīspin kikakwēcimāw awa nāpēw, ēkota ohci kika-kiskēyihtēn kahkiyaw kīkway kā‑atāmēyimāyahk ohci.”
[9] Jewak kī‑tāpwēhtamwak ōma kā‑itwēyit owiyasiwēhkāna, ē‑itwēcik, “kahkiyaw ē‑tāpwēt ōma kā‑itwēt.”
[10] okihci-pimipayihcikēw kī‑itwahamawēw Paula kita-pīkiskwēyit. ēkosi Paul kī‑pīkiskwēw, “hāw, nikiskēyihtēn mihcēt askiy ēkwa ē‑kī-wiyasiwātaman ōki ayisiyiniwak otaskīwāw, ēkwa nimiywēyihtēn kita-nātamāsoyān ē‑pēhtawiyan.
[11] kika-kiskēyihtēn kiya kēhciwāk, nānitaw nīsosāp kīsikāw aspin kā‑kī-itohtēyān Jerusalemihk kita-ayamihāyān.
[12] Jewak namōya nitohci-wāpamikwak kita-kīhkāmak awiyak kihci-ayamihēwikamikohk, namōya mīna nitohci-māyipayihāwak ayisiyiniwak ayamihēwikamikohk ahpō kotakihk ēkotē kihci-ōtēnāhk.
[13] namōya mīna kita-kī-wāpahtihiwēwak kīkway kā‑ohci-misimicik.
[14] niya ohci tāpwē kiwīhtamātin ōma. nikākīsimostawāw nimosōmipaninānak omanitōmiwāwa, okiskinohamākēwin Jesus ē‑pimitisahamān ēwako, ēwako anima namōya kwayask kā-itwēcik. māka mīna nitāpwēhtēn kahkiyaw Moses owiyasiwēwin ēkwa okiskiwēhikēwak omasinahikaniwāwa.
[15] pēyakwan nitisi-pakosēyimāw kisē-manitow tāpiskōc ōki kā-ayācik, tipiyawē kahkiyaw kisē-manitow kita-waniskānāt nipiwinihk ohci anihi kā‑miywātisiyit ēkwa kā‑macātisiyit ayisiyiniwa.
[16] ēkosi ē‑isi-kaskihtāyān niwī-kakwē-kwayask-tōtawāwak tāpitawi kisē-manitow mīna ayisiyiniwak.
[17] “tānitahto askiy ohpimē ē‑kī-ayāyān Jerusalemihk ohci nikī-itohtān ēkotē kita-miyakik nitiyinīmak sōniyāwa ēkwa kita-pakitināsoyān.
[18] ēkota anima ē‑mēkwā-ayāyān kā‑wāpamicik kihci-ayamihēwikamikohk. nikī-pēhkihison ē‑pimitisahamān wiyasiwēwin. namōya ohci-mihcētiwak ēkota mīna namwāc ohci-māyahkamikan.
[19] māka ātiht Jewak Asia askīhk ohci ēkota kī‑ayāwak. ēwakonik kita-kī-pē-ācimostāskik, kīspin kīkway ayāwak kita-ohci-misihoyān.
[20] ahpō mahti ōki nāpēwak kita-wīhtamwak tānisi isi ē‑kī-māyi-ahkamikisiyān ispī ohtiskaw ē‑nīpawiyān onīkānīwak.
[21] pēyak kīkway piko, ēkota ē‑nīpawiyān nikī-tēpwān ē‑itwēyān: ‘ē‑wiyasiwātikawiyān ōma anohc nayēstaw piko ē‑kī-itwēyān, ē‑tāpwēhtamān onipiwak kita-āpisisihkik.’”
[22] ēkwa okihci-pimipayihcikēw Felix kwayask ē‑kiskēyihtahk kā‑tipēyihcikēyit otayamihāwiniyiw, kī‑kipaham māmawopiwin. ōmisi kā‑itwēt, “Lysias kihci-simākanisiwikimāw takohtēci, nika-kīsēyihtēn kahkiyaw kīkway ēwako ōma ohci.”
[23] kī‑itasowātēw simākanisiwikimāwa kita-kanawēyimāyit Paula māka kiyām kita-pakitiniht owīcēwākana Paul kita-kiyokākot ēkwa kita-pamihikot ē‑isi-nitawēyihtamiyit.
[24] tānitahto kīsikāw ē‑kī-ispayik Felix kī‑pē-wīcēwiskwēwēw Drusillawa, Jew iskwēwa, kī‑nātitisahwēw Paula, kī‑natohtawēwak ē‑ātotamiyit ē‑tāpowakēyimāyit Jesus Christa.
[25] māka Paul ē‑āyimōhtahk kwayask ka-pimātisihk, kwayask kita-itātisihk ēkwa ispīhk kā‑wī-wiyasiwātihcik ayisiyiniwak, Felix kī‑sēkihik mīna itēw, “sipwēhtē ēkwa, tawipayiki kika-tēpwātitin mīna.”
[26] māka ēsa ē‑pakosēyimāt Paula kita-miyikot sōniyāwa ēkosi kita-pakitināt; ēwako ohci māna wā‑wīpac kā‑natomāt kita-pīkiskwēcik.
[27] nīso askiy ē‑kī-miyāskamopayik, Porcius Festus kī‑mēskocīstamawēw Felixa. Felix ē‑nōhtē-nahēyihtamihāt Jewa kī‑nakatēw Paula kipahotowikamikohk.