[1] hāw Theophilus: nistam masinahikan kā‑kī-masinahamān ēkota nikī-ātotēn kahkiyaw kīkway kā‑kī-tōtahk Jesus ēkwa anima kā‑kī-kiskinohamākēt, nistam ohci kā‑māci-atoskēt
[2] piyisk anima kīsikāw kā‑kī-sipwētahiht kihci-kīsikohk isi. pāmwayēs kā‑sipwētahiht kī‑kiskinohamawēw otisahwākana, ē‑wīcihikot kā‑kanātisiyit ahcāhkwa.
[3] nēwomitanaw kīsikāwa aspin okwātakihtāwin kī‑nōkohisōstawēw mihcētwāw, ēkota ohci tā‑tāpwē kita-kiskēyimiht ē‑pimātisit. kī‑wāpamēwak ēkwa kī‑pīkiskwātikwak ohci otipēyihcikēwiniyiw kisē-manitowa.
[4] ēkwa ispī ē‑māmawopayicik, ōmisi itikwak, “ēkāya nakatamok Jerusalem, māka pēhihk nohtāwiy kita-miyikoyēk anima kā‑kī-asotahk, kā‑kī-māmiskōtamātakok.
[5] ayisk John kī‑sīkahāhtawēw ayisiyiniwa nipiy ohci, māka namōya mihcēt kīsikāwa ōta ohci kika-sīkahāhtākawināwāw kā‑kanātisit ahcāhk ohci.”
[6] ispī ē‑māmawopicik mīna, ōmisi itēwak Jesusa, “kā‑tipēyihcikēyan, kika-miyāwak cī ōma anohc Israelīwiyiniwak kita-pimipayihisocik ēkwa?”
[7] Jesus itēw, “wiya piko nohtāwiy kitāpamikow kita-wiyastāt ispī ēkosi kita-ispayik. ēkosi namōya kiyawāw katāc kita-kiskēyihtamēk tānispīhk ēkosi kita-ispayik.
[8] māka ispī kā‑kanātisit ahcāhk otihtikoyēko, kika-miyikawināwāw sōhkātisiwin, ēkwa kika-ācimināwāw Jerusalemihk, misiwē Judea askīhk, ēkwa Samaria askīhk, isko ē‑iskwastēk ōma askiy.”
[9] ēkwa ē‑kīsi-pīkiskwēt Jesus kī‑ohpiskāwīhāw kihci-kīsikohk isi, kī‑tastasāpiwak ōki piyisk waskōhk ē‑ākawāstēskākoyit namōya ayiwāk kī‑wāpamēwak.
[10] ē‑mēkwā-tastasāpicik kīsikohk isi aspin ē‑nakatikocik, kētahtawē nīso nāpēwa ē‑wāpiskisīhoyit kī‑wīcikāpawīstākwak.
[11] ēkwa ōmisi itikwak, “Galilīwiyinītik, tānēhki ōma ōta kā‑nīpawiyēk ē‑itāpiyēk kīsikohk? ēwako awa Jesus ē‑otiniht kihci-kīsikohk, ēkwa kita-takohtēw kīhtwām pēyakwan tāpiskōc kā‑isi-wāpamāyēk ē‑ohpiskāt kihci-kīsikohk isi.”
[12] ēkwa ōki nawasōnākanak kīwēwak Jerusalemihk isi, Olives waciy ohci nānitaw āpihtaw tipahaskān kihci-ōtēnāhk ohci.
[13] ē‑takohtēcik Jerusalemihk kī‑ati-pīhtikwēwak wāskāhikanihk ispimihk ita ē‑kī-kapēsicik: Peter, John, ēkwa James ēkwa Andrew, ēkwa Philip ēkwa Thomas, ēkwa Bartholomew ēkwa Matthew, James okosisa Alphaeus, Simon ēwako kā‑wīcēhtahk tipēyimisowin otaskīwāhk, ēkwa Judas okosisa James.
[14] ēwakoni ōki kī‑māna-māmawo-ayamihāwak asici iskwēwa ēkwa Marywa okāwiyiwa Jesusa, ēkwa wīcisāniyiwa nāpēwa.
[15] namōya mihcēt kīsikāwa ē‑ispayik, ita kiskinohamawākana ē‑ayāyit, nānitaw mitātahtomitanaw nīsitanaw ē‑ihtasicik, Peter ē‑nīpawit ōmisi itēw,
[16] “niciwāmitik, ohcitaw kihci-masinahikanihk kā‑kī-itastēk kita-ispayik kita-tāpwēmakahk, kā‑kanātisit ahcāhk kā‑kī-itwēhāt Davida tānisi Judasa ē‑wī-tōtamiyit, ēwako ē‑kī-kiskinohtahāt anihi nāpēwa kita-otināyit Jesusa,
[17] Judas kikī-wīcēwikonaw ayisk ēwako ē‑kī-nawasōniht kita-wītatoskēmikoyahk.”
[18] anihi ohci sōniyāwa kā‑kī-miyiht omaci-tōtamowin ohci, kī‑atāwēw askiy, ēkota kā‑kī-nipahisihk. kī‑pāskatayēsin otakisiya ē-kwayakopayiyiki.
[19] kahkiyaw ayisiyiniwak Jerusalemihk ohci kī‑pēhtamwak, ēwako ohci otitowēwiniwāhk Akeldama, askiy kā‑mihkowik kī‑isiyihkātamwak.
[20] Peter ati-itwēw, “ayisk masinahikātēw kihci-masinahikan nikamowina, ‘kiyām owāskāhikan kita-pisikwastēyiw ēkwa namōya awiyak ēkota kita-wīkiw.’ asici itastēw, ‘mahti kotak awiyak kita-mēskocīstamāk.’
[21] “ēkosi māka kiyām kotak awiyak kika-wīcihikonaw kita-wīhtahk Jesusa kā‑tipēyihcikēyit ē‑kī-āpisisiniyit. wiya pēyak nāpēw ē‑kī-pē-wīcēkoyahk mēkwāc Jesus ē‑papā-wīcēwikoyahk, aspin ohci John kā‑kī-kakēskihkēmot osīkahāhtākēwin isko anima kīsikāw Jesus kā‑kī-ohpiskāwihiht, kihci-kīsikohk isi.”
[23] ēkosi nīso nāpēwa kī‑otinēwak, Joseph āskaw ayisiyiniwak Barsabbas kī‑isiyihkātēwak ēkwa mīna āskaw Justus, ēkwa kotak Matthias.
[24] ēkwa kī‑ayamihāwak ē‑itwēcik, “kā‑tipēyihcikēyan, kikiskēyihtēn tānisi nāpēwak ē‑isi-māmitonēyihtahkik, wīhtamawinān tānāna nāpēw kā‑nawasōnat
[25] kita-mēskocīstamawāt Judasa kā‑kī-sipwēhtēt ita kā-kaskihtamāsot.”
[26] ēkwa kī‑sīkiwēpinikēwak, ēkosi Matthias ēwako kī‑otināw kita-wīcēwāt pēyakosāp itisahwākana.