[1] Ako agrongkot wano panawen sa kangay mga kabelagan in mga bodang Israil. In kangay piyagsabi atawanan Kiristo totoo ngani. In kangay piyagsabi yewed baribid. In Betek pag Abyan katawan din idapo magolo sa kangay galem sa kangay piyagsabi sa kanyo.
[2] In kangay piyagsabi ako maloba wano agrongkot, idbatay maoraw in maskit sa kangay remrem panawen sa mga bodang Israil.
[3] Siro kangay mga kamangyanan, kangay mga kabelagan. In maal kay nges ako agbangen in misoway kay Kiristo, in parosaanen in Diyos, matang siro piyasabangen.
[4] Siro mga bodang Israil, yaawit Diyos kansiyo mga bodang piyapangkit sa kansiro in kansiyo kalakoyen. In kasondowan tiyaboy din sa kansiro, osai in mga Batas, in betek pag agsamba, osai in mga pangako.
[5] Siro in kasokponan in mga kakoyayan lakoy. Ina din pag kasokponan in rakayan in bilog Kiristo in Diyos mabwat wano sa boo. Siyo palagi paglakonawen anggan idapo kalobosan. Ina wa ngani.
[6] Yewed kangay piyagsabi keyen yewed mibaloy in pangako Diyos. Angkataw yewed in boo batang kay Israil in iidang Diyos kansiyo mga mangyan.
[7] Osai in kay Abraam mga kasokponan siro yewed boo bodang Diyos. In Diyos keyen kay Abraam, In batang waget kay Isaak in batay piyagawit kaimo mga kasokponan.
[8] Na in beet siyabi ina yewed in boo kay Abraam bodang piyagawit bodang Diyos, no yewed in mga waget biyodang panawen sa pangako Diyos, siro waget in piyagawit kasokponan Abraam.
[9] Baina keyen in pangako, Sa kataw ngona betek ako atai wakay, kalbas ina pag betek Sara batay wa mamodang, kaliyakiyante.
[10] Yewed waget ina. In kay Ribika bodang malsiing, bodang sa kantam kakoyayan Isaak,
[11] -
[12] in siro ikkay biyodang idapo kay kapangwat kamayba maal kamayba daet, siyabi wa Diyos kay Ribika keyen, In kakaan agbangen in batay sogowan in ariyan. Na asin piyagngitan in Diyos agidang panawen sa kansiyo wa daan beet, yewed panawen sa mga piyagpangwat mangyan.
[13] Kataw in mga Agisolat keyen, Akob in kangay iidang, Isaw kangay piyangidangan.
[14] Na nakay, kantam lames asabi keyen in Diyos baribid? Yewed ngani mayadi.
[15] Angkataw keyen in siyabi Diyos kay Mowisis, Ako batay agpakayawte sa kangay beet pakayawteen. Wara ako in agidang no nakay in kangay batay piyagpakayawte.
[16] Na in piyagpangwat Diyos yewed sa beet mangyan, yewed sa eyat mangyan, dayem batang waget sa kansiyo pakayawte.
[17] Angkataw sa mga Agisolat kansiyo siyabi kay Paraon keyen, Kaya kao kangay piyangwat poon lakoy, matang waget panawen sa kaimo kangay batay piyapangkit in kangay kabaloyan, matang in kangay ngaran atawanan sa boo mga kobat.
[18] Na ngani in Diyos agpakayawte no nakay in kansiyo beet piyakayawte. Osai kansiyo piyakarigen in remrem no nakay in kansiyo beet piyakarigen.
[19] Karam apo batay agsabi sa kangay keyen, No idapo batay kabaloy aglaban sa kansiyo beet, na nakay batang in Diyos agparosa kay sa kantam?
[20] Kamay kitam mangyan waget. Idapo batay kalaban kataw ina sa Diyos. In piyangwat lames batay kasabi sa agpangwat keyen, Nakay batang ako piyangwat kataw tai?
[21] Yewed mana maal in agpamangwat keden, batang sa osai waget ka tikmel diya, agpangwat osai ka keden maalno, osai wakay ka keden daeten?
[22] Kamayba beet piyalowas in Diyos in kansiyo galit, osai beet piyapangkit in kansiyo kabaloyan, siyo maloba agbanta sa mga mangyan kailangan parosaen, bonowen.
[23] Ina kansiyo piyangwat matang piyalowas in kansiyo idapo kaloba ina pag kalakoyen in tiyaboy sa kantam kitam in kansiyo mga piyagpakayawte, in tangona kansiyo siyandata batay piyagpakan in kansiyo kalakoyen.
[24] Kitam ina pag mga mangyan in kansiyo iidang yewed waget batang sa mga Odyo, no yewed batang din sa mga yewed Odyo.
[25] Kataw ina in kansiyo siyabi sa aklat Osiyas keyen, In datiyan yewed kangay mga mangyan, na kangay batay piyagawit kangay mga mangyan. Osai in datiyan yewed kangay piyagpakayawte kangay batay piyagpakayawte.
[26] Osai sa kobat in mga mangyan piyagsabiyan keyen, Kamo yewed kangay mga mangyan, siro batay piyagawit mga bodang Diyos agkaboway.
[27] Anda wakay in biyarita Isaiyas panawen sa mga bodang Israil keyen, Kamayba in mga bodang Israil in karowen karo in bowangin sa dagat korang waget in batay piyaboway.
[28] Angkataw maloba osai malakas batay piyagpangwat in Kapwan in kansiyo parosa sa boo kobat.
[29] Isaiyas din in agsabi keyen, No in Kapwan in Apo Kabaloyan idapo piyatera agkaboway sa kantam mga kasokponan, na kitam nges mibaloy kataw in Sodoma, osai kataw in Gomora.
[30] Na in kantam atawanan batang asin piyagkaanggayan Diyos in mga yewed Odyo in mga yewed agpilit makaanggay sa kansiyo pangkit. Panawen siro agpasandig sa kansiyo siro kansiyo piyangwat idapo daet.
[31] Dayem in mga bodang Israil, in mga agpilit agpaniwala sa mga Batas matang nges makaanggay sa pangkit Diyos, kamay siro galot.
[32] Kaya siro galot angkataw siro wakayte agpamangkit padalan agpakaanggay sa Diyos, yewed panawen sa agpasandig sa kansiyo, no yewed panawen sa kansiro waget piyangwat. Siro asolpo sa bato makasolpo,
[33] in siyabi sa mga Agisolat keyen, Baanda, kangay piyabolalang sa Siyon osai ka bato makasolpo, lakonaw pag bato makairos. Kamay kamayba nakay in agpasandig sa kansiyo idbatay wa mangalwasi.