[1] Na ngani, mga belag, ako agpilit sa kanyo panawen in Diyos maloba wa agpakayawte sa kantam, kanyo wa ngani taboyen sa Diyos in kanyo bilog agkaboway, makaanggay sa kansiyo. Kanyo wa ngani talagaen sa kansiyo. Kataw ina in betek pag agsamba sa Diyos.
[2] Ayaw kanyo agtoladen in mga ogali in mga yewed agpaniwala, no yewed paalisen Diyos in kanyo datiyan remrem matang miyalis wa in boo kanyo ogali. Kataw ina kamo batay katawan no nakay in beet Diyos, no nakay in maal, in makaanggay, in betek wa gayed pag kansiyo beet.
[3] Panawen sa kabaloyan tiyaboy Diyos sa kangay, kangay piyagsabi sa baatte osai sa kanyo keyen, in kanyo kalakoyen ayaw agpakabwaten lampas sa agibetek. No yewed remremen gayed maal in kanyo kalakoyen, no nangkalakoy in paniwala tiyaboy Diyos sa kanyo.
[4] In osai ka bilog mangyan karowan in sangkap. Baatte sangkap osai wakay in panawen.
[5] Na kataw din ina kitam, kamaybawa karowan kitam piyalageman sa osai waget ka bilog Kiristo. In baatte osai agiskapet sa mga roma.
[6] Baatte osai wakay in kantam mga kabaloyan no nangkalakoy in tiyaboy Diyos sa kantam. No kitam in piyakan in agpalowas in batang sa Diyos, na ina wa in kantam pangwaten no nangkalakoy in kantam paniwala.
[7] No in tiyaboy sa kantam in agtolong, na agtolong wa ngani. No in agpatoldo in tiyaboy, na kitam wa agpatoldo.
[8] No in tiyaboy sa kantam in agpaeyat remrem, na kitam wa agpaeyat remrem. No kitam piyakan in agtaboy sa mga maidap, na ayaw mabyat in remrem agtaboy. No in agpoon, na ayaw aglimbang agpapoon. No in agpakayawte sa amat, na in agkaanggay pag agpakayawte.
[9] In agpakayawte ayaw agpakagwali waget. Kadaetanen in daet pag ogali, dayem in maal pag ogali, ina in alapeten.
[10] Kitam maybelagan, kataw kitam tayariyan wa gayed. Pakalakoyen in agmaal sa kantam belag labi kay sa kantam sadiri.
[11] Ayaw aglimbang, in boo remrem pasakopen sa Kapwan agpanawen.
[12] Kitam wa agkaanggay sa piyagpanaya. No kitam piyagpaidapan na agbanta wate. Osai palagi agpandalangin.
[13] Kantam tolongen in mga belag agpaniwala sa kansiro mga kailangan. Pabelagen in mga mangyan agrateng.
[14] In mga agpamangwat daet sa kantam dalanginen keyen pakayawteen. Ayaw kantam agpamanesen. Dalanginen ngani.
[15] No apo agkaanggay na kitam wa din agkaanggay. Kitam din manangis sa mga agpanangis.
[16] Malsiyayonan in remrem. Kitam ayaw agpakabwat, dayem pabelagen in mga maidap. Kitam ayaw keyen lakonaw in kantam atawanan.
[17] Ayaw kitam mangganti sa daet. Kitam agpilit agpapangkit in maal pag ogali sa boo mangyan.
[18] No nges ngani maal na kitam agpangwat in boo kantam abaloyan, matang agkaboway maal kadayo in boo mangyan.
[19] Laki mga belag, ayaw kitam agpalgantiyan. Bayansiyo in Diyos in agparosa. Angkataw in siyabi sa mga Agisolat keyen, Keyen in Kapwan, Ako in agpamarosa, bayansiyo ako in agparosa.
[20] Ayaw kitam agganti, dayem no agkayawes in kantam kaaway, na kantam pakanen pamangnen, no siyo agkainem, na pakanen sapa. Na no kataw ina siyo batay arikoyan wa gayed.
[21] Kitam ayaw agpadaeg sa daeten pag remrem. No yewed pangwaten in maal matang diyaeg in daet.