[1] Kitam in mga maeyat in agpaniwala kailangan kantam tolongen in mga mainaen sa agpaniwala. Ayaw in kantam waget sadiri piyagkaanggayan in remremen.
[2] Kantam tolongen in roma mangyan matang siyo agkaanggay kadogay maeyat wakay in kansiyo paniwala.
[3] Angkataw kamayba Kiristo yewed agkabeet sa kansiyo sadiri piyagkaanggayan, no yewed siyo kataw in sa mga Agisolat keyen, In siro agpanlibak sa kaimo, ako in liibak.
[4] In boo mga siyabi tangona sa mga Agisolat, kaya ina siyolat matang kitam katawan, angkataw no kitam agbasa sa mga Agisolat na piyagpakaeyat in kantam remrem matang agkaanggay agpanaya.
[5] In Diyos in agpakarigen osai in agpaeyat sa kantam remrem. Na kangay piyagpandalangin sa kansiyo keyen, Kamo boo palagemanen kanyo remrem sa agpangwat in beet Kiristo Isos,
[6] matang kamo agpaysarigan agmaal sa Diyos sa Amang kantam Kapwan IsoKiristo.
[7] No nangkataw kitam piyagalapet Kiristo, na kataw din ina in kantam pangwaten sa kantam mga belag, matang in Diyos piyagpakalakoy.
[8] Kangay piyagsabi sa kanyo kaya Kiristo mibaloy sogowan mga Odyo matang piyapangkit in Diyos yewed bosliyen, kansiyo ngani piyagpangwat in kansiyo mga pangako sa mga kakoyayan.
[9] Osai matang din in mga yewed Odyo agmaal din sa Diyos panawen siyo agpakayawte. Kataw in siyabi sa mga Agisolat keyen, Na kao kangay batay piyagmaal sa adap in mga yewed Odyo. Ako batay agbaren agmaal sa kaimo ngaran.
[10] Siyabi wakay keyen, Mga yewed Odyo, agkaanggay wa kamo sarig in mga mangyan iidang Diyos.
[11] Apo kay din siyabi keyen, Kamo in mga yewed Odyo, kanyo pagmaalen in Kapwan. In boo mga mangyan agmaal sa kansiyo.
[12] Siyabi wakay Isaiyas keyen, Batay rateng in kasokponan Isi. Siyo batay lomwas matang agpapoon sa mga yewed Odyo. Siro batay agpasandig sa kansiyo.
[13] In Diyos in agtaboy in piyagpanaya, na kansiyo wa taboyen sa kanyo in makaanggay osai in apyaan pag remrem, matang kamo agkaanggay agpanaya panawen sa kabaloyan in Betek pag Abyan.
[14] Mga belag, kangay ngani atawanan kamo agpangwat maal wano, kamo aronaw in atawanan, osai kamo kabaloy agpalsipatoldowan.
[15] Kamay anda kangay siyolat sa kanyo apo betek kagwali matapang matang kamo kangay wakay piyagpatoldo. Kaya ako agpangaas agsolat kataw ina panawen in tiyaboy Diyos sa kangay,
[16] in ako sogowan Kiristo Isos sa mga yewed Odyo. Matang ako sasirdoti agpatoldo sa kansiro in Maal pag Barita Diyos, matang siro piyagtaboy sa Diyos, makaanggay sa kansiyo, piyangwat maal wano in Betek pag Abyan.
[17] Na panawen ako sogowan Kiristo Isos kangay piyagpalakoy in kangay panawen sa Diyos.
[18] Ako idapo batay siyabi, no yewed in piyangwat Kiristo in ako kansiyo siyogo matang in mga yewed Odyo yaakay Kiristo sa agpaniwala sa Diyos. Ina panawen sa kangay mga agiplaong osai piyangwat,
[19] panawen din sa mga tanda mga makasoyo pag panawen, sa kabaloyan in Betek pag Abyan. Matang sa boo kobat, sogod sa Irosalim anggan sa Iliriko kangay wa piyamatoldo gayed in Maal pag Barita panawen kay Kiristo.
[20] Palagi in kangay beet agpatoldo in Maal pag Barita sa boo kobat yewed kay aratengan in ngaran Kiristo, matang ako yewed kagwali agdagdag towar sa mga arigi tiyadyok in mga roma.
[21] No yewed kataw in siyabi sa mga Agisolat keyen, In mga ikkay abaritaan panawen sa kansiyo batay kangitan sa kansiyo. In mga ikkay karengey panawen sa kansiyo batay katawan.
[22] Ina in dailan kaya ako yewed kay katokor pataboy sa kanyo.
[23] Kamay ngona lobos wa in kangay panawen atai pag kobat, osai panawen dogay wa ako beet wano pataboy asin sa kanyo,
[24] kangay remrem ako batay domalan sa kanyo in ako agpataboy sa Ispanya matang kitam nges maltagbowan. Ako beet mataw kayte agpainga asin. Kangay din remrem kamo batay tomolong sa kangay in ako panaw batay sa Ispanya.
[25] Kamay ngona ako batay kay pataboy sa Irosalim, agbaba tolong sa mga belag ista.
[26] Angkataw in remrem in mga barkadaan mga bodang Diyos sa Masidonya osai sa Akaya keyen maal siro agpababa tolong sa mga maidap sa mga bodang Diyos sa Irosalim.
[27] Siro agkaanggay agtolong. Kamay ina kailangan kansiro piyagpangwat angkataw siro in mga yewed Odyo piyakan mga Odyo in mga piyagkailangan in abyan, na maal ngani siro wakay agtolong sa mga Odyo sa mga piyagkailangan in bilog.
[28] Na paka tiyaboy wa in tolong sa mga belag sa Irosalim ako batay domalan asin lampas sa Ispanya.
[29] Kangay atawanan in ako asin agpataboy sa kanyo ako apo piyagbaba bonton wano in tolong batang kay Kiristo.
[30] Laki mga belag, panawen sa Kapwan IsoKiristo osai panawen in agpalsipakayawtean tiyaboy in Abyan Diyos sa kantam, ako agayay tolong sa kanyo sa pandalangin. Ako dalanginen gayed,
[31] matang ako agipalpas sa mga yewed agpasandig sa Diyos sa Odiya, osai matang in mga belag ista agkaanggay sa kangay piyagbaba tolong.
[32] No kataw ina, na ako batay agkaanggay agrateng sa kanyo agpainga sa kanyo, no ina in beet Diyos.
[33] Kamo boo alapeten in Diyos in agtaboy in apyaan pag remrem. Ina wa ngani.