[1] Na nakay, biyenglay wa lames Diyos in kansiyo mga mangyan? Yewed. Baina ako osai daan ka bodang Israil, kasokponan Abraam, sa tiribo Binamin.
[2] Yewed biyenglay in Diyos in kansiyo mga mangyan in tangona kansiyo iidang. Kanyo atawanan in siyabi sa mga Agisolat panawen kay Iliyas in siyo agdaing sa Diyos panawen sa piyangwat in mga bodang Israil.
[3] Siyo keyen, Kapwan, kansiro biyono in kaimo mga poropita, kansiro riyegnas in mga paltawan pansonogan andog sa kaimo. Ako waget in agitera, kadogay ako beet kay biyono.
[4] Kamay in siyabi Diyos sa kansiyo keyen, Ako apo kay piyatera pito ka libo ka kaliyakiyan yewed agsamba sa yewed Diyos piyagawit Baal.
[5] Na ngona din kataw ina, apo kay agitera mga iidang Diyos panawen sa kansiyo lakonaw pag agpakayawte.
[6] Siro kansiyo ngani iidang panawen sa kansiyo lakonaw pag agpakayawte, yewed panawen sa kansiro mga panawen. Angkataw no ina panawen sa kansiro mga piyagpangwat, na yewed wa masabi ina panawen sa lakonaw pag agpakayawte.
[7] Na in atawanan asin in kansiro piyagkaamag yewed abel in boo mga bodang Israil angkataw in amat marigen in remrem. In mga waget iidang Diyos in kaabel ina.
[8] Kataw in siyabi sa mga Agisolat keyen, Anggan ngona pag betek, piyaidapo katawanan in Diyos in kansiro mga remrem. Kansiro mga mata biyeleg wa, kansiro talinga biingi wa din.
[9] Siyabi din Dabid keyen, Dayem nges kansiro mga katiponan mibaloy wa kagwali salaod, kagwali balatik. Siro nges maligan, piyarosa.
[10] Dayem nges malened kansiro mga mata matang siro idwa kangitan. Siro nges mabokkong agkaidapan anggan agkaboway.
[11] Na nakay, in beet siyabi in asolpo in mga bodang Israil, siro lames maligan wa gayed? Yewed ngani. Kamay panawen siro mairos agpangwat daet, rateng wa sa mga yewed Odyo in boway idapo kalobosan. Matang in mga Odyo aamagan sa abel in mga yewed Odyo.
[12] Na ngona, no panawen sa daet in mga Odyo batay makamaal sa boo mangyan, osai no panawen siro galot in mga yewed Odyo apo pakinabang, na no siro boo maniwala labi kay lakonaw in batay pakinabang.
[13] Laki mga yewed Odyo, anda wakay in kangay piyagsabi sa kanyo. Panawen ako katiwala siyogo Kiristo sa mga yewed Odyo, na kangay piyaglakonaw in agbarita sa kanyo,
[14] matang in kangay mga kabelagan in mga Odyo aamagan, matang no kataw ina, batay din piyaboway in amat sa kansiro.
[15] No panawen in mga Odyo biyenglay Diyos, in mga mangyan sa boo kobat maybelagan wa osai in Diyos, na no in Diyos tagoli wakay agtanggap sa mga Odyo, na ina kagwali in matay wa piyaboway wakay.
[16] In arina piyagpangwat tinapay, no in tokaw pag tinapay tiyaboy sa Diyos, na ina pag boo, Diyos wa daan in kapwan. No sa yangaw piyagtalaga sa Diyos in mga dalig, na kadayo in mga sanga Diyos wa daan in kapwan.
[17] Alimbawa osai ka togda yangaw piyagawit olibo, diyodo in kalaati sanga, kalbas apo wakay mga sanga batang sa olibo kobat piyasokpon sa dodowan matang kansiro makowa in reta batang sa mga dalig. Na kamo in mga yewed Odyo kataw ina pag olibo kobat piyasokpon wa matang ngona kamo piyagpakan bagiyan in sa mga Odyo.
[18] Na yewed mayadi kamo agidapo kabolowan sa mga sanga in togda. Ayaw agyabang. Kanyo remremen yewed kamo in agpaboway sa mga dalig. Siro agbangen in agpaboway sa kanyo.
[19] Na karam kanyo batay siyabi keyen, Diyodo in mga sanga matang kami misokpon.
[20] Betek ina, kamay kaya siro diyodo panawen siro yewed agpasandig sa Diyos. Kalbas kaya kamo siyokpon panawen kamo agpasandig sa kansiyo. Na ayaw agyabang, dayem alimowan wa agbangen.
[21] Angkataw no in mga sanga in togda in mga Odyo yewed piyagalwasi in Diyos, na kamo din idbatay kansiyo piyagalwasi.
[22] Asin kantam piyagngitan in Diyos mabait osai matapang. Siyo matapang sa mga yewed agpasandig sa kansiyo, kamay mabait sa kanyo no kamo agaway kay agpasandig sa kansiyo kabaiten. No yewed, na kamo piyagdodo din.
[23] In mga Odyo, no siro agpasandig wakay sa Diyos, na siro piyagsokpon wakay. Angkataw in Diyos apo kabaloyan agsokpon wakay tagoli sa kansiro.
[24] No kamo in sanga in olibo kobat piyasokpon sa togda olibo, kamayba yewed kataw ina in ogali olibo, na labi kay in mga Odyo batay wakay misokpon sa olibo kansiro daan dodowan.
[25] Mga Belag, apo osai ka piyagbetang kangay nges beet kanyo atawanan, matang yewed batay agpakabwat in kanyo remrem. In mga bodang Israil in siro ngona yewed agpasandig ina kadogayte waget, yewed anggan dogayan, anggan waget kapasabangen wa sa Diyos in boo karowen in mga yewed Odyo.
[26] No kataw ina batay wa piyaboway in boo mga bodang Israil, kataw in mga Agisolat keyen, Batay rateng in Agpamaboway batang sa Siyon. Kansiyo batay kiyowa sa mga kasokponan Akob in boo kansiro daet.
[27] Paka kangay wa kiyowa in kansiro mga daet, na ina wa in kangay batay kasondowan sa kansiro.
[28] Panawen siro dayo in Maal pag Barita siro mibaloy wa kalaban Diyos, matang kamo in mga yewed Odyo apo wa pakinabang. Kamay panawen siro kansiyo iidang, siro kansiyo daan piyagmaal panawen sa kansiro mga kakoyayan.
[29] Angkataw in Diyos yewed agiyalis in remrem panawen sa kansiyo mga iidang osai sa kansiyo mga tiyaboy.
[30] Tangona kamo mga aglaban sa Diyos. Kamay ngona kamo kansiyo piyagpakayawte panawen in mga Odyo aglaban wa sa kansiyo.
[31] Kataw din ina ngona, in kamo piyagpakayawte in Diyos in mga Odyo aglaban sa kansiyo, na in mga Odyo batay din kansiyo piyagpakayawte kataw kamo piyagpakayawte.
[32] Angkataw in Diyos pomayag in boo mangyan pasakop sa kansiro mga daet, matang kansiyo batay apalowas sa kansiro in kansiyo pakayawte.
[33] Idbatay wano lobos in yaman Diyos, osai in kansiyo katawanan, kadayo in kansiyo atawanan. Idapo batay katawan in kansiyo mga remrem. Idapo batay katawan in kansiyo mga padalan.
[34] Kataw in siyabi sa mga Agisolat keyen, Nakay in katawan in remrem in Kapwan? Idapo. Nakay in kabaloy agpatoldo sa kansiyo? Idapo din.
[35] Nakay in kataboy sa Diyos matang in Diyos agbayad wakay sa kansiyo? Idapo ngani.
[36] Angkataw siyo in agpangwat in boote, siyo in agalapet sa boote, osai kansiyo wa daan in boote. Na siyo pakalakonawen anggan idapo kalobosan. Ina wa ngani.