[1] Ako Pablo in agsolat sa mga taga Roma. Ako sogowan Kiristo Isos, iidang Diyos matang sogowan lakoy, kansiyo tiyalaga agpatoldo in kansiyo Maal pag Barita.
[2] Ina pag Barita in piyangako Diyos tangona naw, piyababa sa kansiyo mga poropita, in kansiro siyolat sa mga Agisolat.
[3] Ina pag Maal pag Barita panawen sa kansiyo Bodang IsoKiristo kantam Kapwan. In kansiyo bilog mangyan kasokponan Dabid,
[4] kamay sa kaalenen kansiyo abyan, ngiitan siyo Bodang ngani Diyos, panawen sa kabaloyan lakoy in siyo batang matay tagoli wakay boway.
[5] Panawen sa kansiyo kami piyakan Diyos in maalen pag tiyaboy, in kami piyagsogo agbarita sa kabaloyan Kiristo agakay sa mga mangyan sa boo kobat matang siro pasakop agpaniwala sa kansiyo.
[6] Kamo din agiyagem asin, angkataw kamo mga iidang IsoKiristo.
[7] Kamo in boo mga piyagpakayawte Diyos sa bayan Roma in kangay piyagsolatan. Kamo kansiyo iidang matang kansiyo mga bodang. Kamo pakayawteen Diyos osai pakanen in apyaan pag remrem, in Diyos kantam Amang osai IsoKiristo kantam Kapwan.
[8] In tokaw kangay piyagsabi keyen, Panawen kay IsoKiristo kamo boo kangay piyagkaanggay sa Diyos angkataw in kanyo paniwala piyagbarita sa boo kobat.
[9] Kangay boo remrem Diyos in kangay piyagtiwalaan, matang kangay piyagpatoldo in Maal pag Barita panawen sa Bodang Diyos. Atawanan in Diyos kamo baatte kangay piyagpandalangin.
[10] Baatte kangay piyagayay sa kansiyo in ako pataboyen asin sa kanyo no nges ina in kansiyo beet.
[11] Dogay wa ako beet wano katagbo sa kanyo matang agbagi in piyagtaboy Diyos sa kantam abyan matang kamo piyakaeyat.
[12] In kangay beet siyabi kitam boo agpaysitolongan agpalsipaeyatan sa kantam paniwala.
[13] Laki mga belag, kangay beet kanyo atawanan makakarowan wa ako batay wa nges pataboy asin sa kanyo, kamay baatte ako agkaeleg. Ako beet din asin agakay mga mangyan kay Kiristo kataw daan in kangay piyangwat sa roma mga yewed Odyo.
[14] Kailangan ngani ako agbarita sa mga taga bayan kadayo sa mga taga agbaw, sa mga katawan kadayo sa mga yewed katawan.
[15] Ina in dailan kaya ako beet din agpatoldo in Maal pag Barita asin sa bayan Roma.
[16] Yewed kangay piyagkarikoyan in agpatoldo in Maal pag Barita, angkataw ina in kabaloyan Diyos in agpaboway sa baatte agpasandig sa kansiyo, tokaw sa mga Odyo, kalbas kadayo din sa mga yewed Odyo.
[17] Angkataw in Maal pag Barita in agsabi in padalan Diyos agpangwat idapo daet sa mga mangyan. Ina panawen siro agpasandig sa kansiyo ibat sa parakayan, na anggan din sa kalobosan ina panawen daan din siro agpasandig sa kansiyo. Kataw in mga Agisolat keyen, In agibetek sa pangkit Diyos, siyo batay agkaboway panawen siyo agpasandig sa kansiyo.
[18] Piyagpapangkit Diyos batang sa langit in kansiyo galit sa boo daet piyagpamangwat mga mangyan aglaban sa kansiyo. Angkataw sa kansiro mga daet pag ogali in betek piyagtakleb wa.
[19] Angkataw in maal atawanan panawen sa Diyos mapawa nges sa kansiro angkataw kansiyo wa piyapangkit.
[20] Ibat kay naw in piyangwat in kobat in kansiyo idapo kalobosan pag kabaloyan osai in kansiyo kadiyosen, kamayba ina yewed piyagngitan, na ina mapawa gayed piyagngitan sa kansiyo mga piyangwat, maal nges atawanan. Matang in mangyan idapo wa batay dailan.
[21] Kamaybawa kansiro wa atawanan apo Diyos, siyo yewed kansiro piyagpakabwat kataw in kailangan sa Diyos. Idapo, kamayba piyagkaanggayan. Dayem in kansiro mga piyagremrem in mga idapo kabolowan, siro biyeleg wa in kansiro idapo bait pag remrem.
[22] Kansiro remrem siro apo katawanan, kamay siro idapo bait.
[23] Angkataw kansiro piyagpaidapo kabolowan in kalakoyen in Diyos in idbatay matay. Kansiro wakay piyagmaal in mga rarawan piyangwat waget kataw mangyan agkatay, kataw mga bantog, mga ayop, mga aginanap.
[24] Ina in dailan kaya siro piyabayaan Diyos sa kansiro mga marames pag piyagkabeet anggan siro agpalpamangwatan makarikoy sa kansiro mga bilog.
[25] Kansiro piyagpaidapo kabolowan in totoo panawen sa Diyos, miskapet wakay sa baribid. Kansiro piyagmaal piyaglakonaw in mga piyangwat waget, yewed in Agpangwat, bago nges siyo in kailangan pagmaalen anggan idapo kalobosan. Aon ngani.
[26] Ina in dailan kaya siro piyabayaan Diyos sa kansiro mga makarikoy pag piyagkabeet. Kamayba in mga kagbaiyan dayo wa palalay sa mga kaliyakiyan. In kansiro piyangwat lalaki kagbaiyan daan.
[27] Kataw din ina in mga kaliyakiyan, dayo wa din palalay sa mga kagbaiyan, dayem kansiro piyangwat babai kaliyakiyan daan. Siro agpalpamangwat in makarikoy sa osai osai. Matang panawen sa kansiro daet, piyagpaidapan in kansiro bilog, piyarosa agibetek sa kansiro daet.
[28] Kansiro piyagpaawakan in Diyos, matang siro kansiyo wa piyabayaan. In kansiro mga remrem mibaloy wa idapo bait, siro agloblob wa sa daet.
[29] Kansiro wa gayed piyagogali in boo wano daet, mga baribid wa gayed, mga solangan, mga agremrem daet. Siro mga agpanagiri, mga agbono mangyan, mga agpamalaway, mga agpamadaya, mga aleleng. Siro mga agkasadapan agbarita daet,
[30] mga agpamasaen, mga agkairis sa Diyos, mga agpanlibak, mga agyabang, mga agpakabwat. Siro mga sanay wa agpamangwat baatte osai wakay ka daet, mga agpandaeg sa mga koyay.
[31] Siro mga idapo bait, mga bosliyen. Siro yewed katawan agpakayawte, mga yewed katawan agpangkit sa idap in roma mangyan.
[32] Siro nges katawan in Batas Diyos keyen, Piyagbono in agpangwat mga kataw ina. Kamayba siro katawan ina siro agaway kay agpamangwat, agkaanggay kay gayed sa amat mga agpamangwat kataw ina.