[1] Mga belag, maloba kangay piyagkabeet, kangay piyagpandalangin sa Diyos keyen, Pabowayen in mga bodang Israil.
[2] In kangay ngiitan sa kansiro siro agpilit wano makaanggay sa pangkit Diyos kamay baribid in kansiro atawanan.
[3] Angkataw yewed kansiro atawanan in padalan Diyos agpangwat sa mangyan idapo daet. Kalbas siro agpilit nges agpangwat in kansiro sadiri padalan, idwa aggisod sa padalan Diyos.
[4] Kay Kiristo wa mibaloy in dailan kaya apo in mga Batas, matang kamayba nakay in agpasandig sa kansiyo kansiyo piyagpangwat idapo daet.
[5] In siyolat Mowisis panawen sa mga Batas agpangwat sa mangyan idapo daet, keyen, No in mangyan kabaloy agpangwat in boo mga Batas, na siyo batay piyaboway.
[6] Kamay anda wakay in piyagsabi panawen sa piyagpangwat idapo daet panawen sa agpasandig keyen, Ayaw agremremen keyen, Nakay in batay monaik sa langit? In beet siyabi matang Kiristo piyalompot.
[7] Ayaw din agremremen keyen, Nakay in batay lompot sa toyongan? In beet siyabi matang Kiristo kiyowa batang sa mga matay.
[8] Kamay in piyagsabi keyen, In agiplaong Diyos bangen sa kaimo, in kaimo wa daan piyagsabi, in kaimo piyagremrem. Na ina in agiplaong kanyam piyagbarita, in keyen agpasandig sa Diyos,
[9] in keyen, No kaimo piyagsabi keyen Isos in Kapwan, osai no in kaimo remrem agpasandig keyen siyo piyaboway wakay Diyos, na kao batay piyaboway.
[10] Angkataw no kantam remrem agpasandig sa Diyos na kitam kansiyo piyagpangwat idapo daet. Osai no kitam agpalowas ina sa kantam piyagsabi na kitam piyagpaboway.
[11] Keyen in mga Agisolat, Kamayba nakay in agpasandig sa kansiyo idbatay mangalwasi.
[12] Pikkataw daan in Odyo osai in yewed Odyo. Osai waget in Kapwan sa boo mangyan. In boo mga agayay sa kansiyo piyagpakan in kansiyo mga piyagtaboy.
[13] Baina in mga Agisolat keyen, In boo mga mangayay sa Kapwan batay piyaboway.
[14] Kamay in mga mangyan idbatay omayay sa yewed kansiro piyagpasandigan. Osai siro idbatay agpasandig sa kansiyo no siro yewed karengey in barita panawen sa kansiyo. Osai siro idbatay karengey in barita no idapo agpatoldo in barita.
[15] Osai idapo batay agbarita no yewed siyogo. Kataw in mga Agisolat keyen, In agrateng in agbaba maalno pag barita makaanggay wano sa kangitan.
[16] Kamay in maniwala sa maalno pag barita yewed boo. In siyabi Isaiyas keyen, Laki Kapwan, nakay in maniwala sa kanyam barita?
[17] Na in paniwala batang sa agparengey. In piyagparengey in barita panawen kay Kiristo.
[18] Kamay karam apo agtanong keyen, Siro lames ikkay karengey in barita? Karengey wa ngani, angkataw in mga Agisolat keyen, In mga agpatoldo in barita pataboy wa sa boo kobat. In kansiro agiplaong rateng wa sa boo kobat.
[19] Apo kay keyen, In mga bodang Israil lames yewed katawan? Mowisis in tokaw agsagot keyen, Batay piyagidang Diyos in mga mangyan yewed gayed bansa matang kamo batay agpanagiri. Batay piyagidang Diyos mga mangyan idapo katawanan matang kamo batay agkagalit.
[20] Isaiyas labi kay maeyat agsabi in siyabi Diyos keyen, Ako atagbo in mga yewed agpamangkit sa kangay. Ako papangkit sa mga mangyan yewed agtanong panawen sa kangay.
[21] Kamay panawen sa mga bodang Israil kansiyo siyabi keyen, Boo ibeng ako agberya agpakayawte sa mga mangyan songgaran, dayo maniwala.