[1] Na nangkataw wa? Kitam lames agaway kay agpamangwat daet matang mistobo kay in lakonaw pag agpakayawte Diyos?
[2] Ayaw wa. Kitam dayem matay wa sa mga daet, na kitam idwa kailangan agogali daet.
[3] Yewed lames kanyo atawanan kitam boo biyaotismowan agiyagem kay Kiristo Isos na kitam agiyagem din sa kansiyo katayan?
[4] In kitam biyaotismowan, kitam matay sarig siyo kalbas liyebeng, na no kataw Kiristo boway wakay panawen sa kabaloyan lakoy in Amang, na kitam din kabaloy wa agogali in bayo wakay pag boway.
[5] Angkataw no kitam agiyagem kay Kiristo in siyo matay, na tiyak kitam batay din agiyagem sa kansiyo in siyo boway wakay.
[6] Kantam atawanan in kantam datiyan boway agiyagem sa kansiyo in siyo piyako sa kodos, matang biyono wa in daeten pag piyagkabeet kantam bilog. Na no kataw ina kitam idwa sakop sa daet.
[7] Angkataw in mga matay wa siro piyalpas wa, idwa sakop sa mga daet.
[8] Kamay kantam piyagpaniwala no kitam matay agiyagem kay Kiristo, na kitam batay din boway agiyagem sa kansiyo.
[9] Kantam atawanan Kiristo tagoli boway, na idbatay wa tagoli wakay matay, na siyo idwa sakop sa katayan.
[10] Siyo makaosai waget matay panawen sa daet. Ngona in kansiyo boway sakop wa sa Diyos.
[11] Na kataw din ina kantam remremen kitam matay wa sa daet, kamay agkaboway sakop wa sa Diyos, panawen kitam agpalageman kay Kiristo Isos.
[12] Na in kantam agkatay pag bilog ayaw agpasakopen sa daet matang ayaw kitam sakop sa daeten pag mga piyagkabeet kantam bilog.
[13] Kamaybawa nakay sa kantam bilog ayaw agpasakopen sa daet matang sogowan sa daet. Dayem kitam pasakop wa sa Diyos, angkataw kitam piyaboway wa sa katayan. In boo sa kantam pasakopen sa kansiyo matang sogowan wa sa maal.
[14] Angkataw idwa kailangan kitam sakop sa daet, angkataw kitam idwa sakop sa mga Batas, no yewed sakop wa sa lakonaw pag agpakayawte Diyos.
[15] Na nakay, kitam lames agpangwat daet panawen kitam idwa sakop sa mga Batas, no yewed sakop sa lakonaw pag agpakayawte Diyos? Ayaw ngani.
[16] Kantam atawanan no kitam pasakop wa sa mangyan matang kansiyo sogowan, na kitam sogowan wa ngani siyo. No in mangyan pasakop sa daet, na siyo batay matay. Dayem no siyo pasakop sa Diyos na siyo batay piyangwat idapo daet.
[17] Kamay kitam agkaanggay sa Diyos angkataw kitam in tangona sakop sa daet, ngona maniwala wa gayed sa piyatoldo sa kantam.
[18] Kitam piyalpas wa sa daet, ngona sakop wakay sa maal.
[19] Kangay piyagalapet in mga agiplaong baatte piyagalapet mga mangyan matang toloy kanyo atawanan. No nangkataw tangona kitam pasakop sa agpanggaraw, sa kaalelengan agistobo, na ngona wakay kitam pasakop wa sa maal pag mga ogali matang kitam mibaloy maal wano gayed.
[20] In kitam tangona sakop kay sa daet kitam yewed agkalawagen sa maal.
[21] Na nakay ngani in kantam abel asin pag mga panawen in kantam ngona piyagkarikoyan? In batay kalobosan ina pag mga kataw ina katayan.
[22] Kamay ngona kitam piyalpas wa sa daet, kalbas sakop wa sa Diyos. Na in kantam abel asin kitam agogali labi kay maalno, kalbas in batay kalobosan ina boway idapo kalobosan.
[23] Angkataw in bayad daet katayan, kamay in piyagtaboy in Diyos in boway Kiristo Isos kantam Kapwan. Ina pag boway idapo kalobosan idapo ngani bayad.