[1] Laki mga belag, kanyo wa atawanan in batas, na kamo katawan in osai ka mangyan sakop sa batas anggan waget siyo agkaboway kay.
[2] Alimbawa, in batas in osai ka kagbaiyan agiyagem sa kansiyo lalaki anggan waget siyo agkaboway, kamay no in lalaki matay, na siyo mipalpas wa sa mga batas panawen sa taybalang.
[3] Na no boway kay in kansiyo lalaki no siyo mamangkit wakay sa roma, na ina agpanggaraw. Kamay no matay wa in kansiyo lalaki na siyo idwa sakop asin pag batas. No siyo mamangkit wakay lalaki, na ina yewed agpanggaraw.
[4] Na mga belag, kataw din ina sa kantam. In kitam miyagem wa sa bilog Kiristo, kitam matay wa sa mga Batas, matang kitam maal wa apo wakay kapwan, ina Kiristo in boway wakay, matang in Diyos apo abel sa kantam in mga maalen pag panawen.
[5] Tangona in kitam agogali kay in kantam tangona piyagkabeet, na in mga daeten pag piyagkabeet kantam mga bilog piyolaw in mga Batas agpilit sa kantam agpamangwat in mga daet matang kitam matay.
[6] Kamay ngona in kitam matay wa sa mga daet agpansakop sa kantam, na kitam idwa sakop sa mga Batas. Ngona kitam sakop sogowan wa sa Diyos, idwa sa datiyan pag mga Batas in mga agisolat, dayem sa bayo wakay pag boway batang sa Abyan Diyos.
[7] Na nakay, in mga Batas lames daet? Yewed ngani. Kamay no idapo in mga Batas na ako nges idbatay katawan keyen ina daet. No in mga Batas idapo siyabi keyen, Ayaw agpansolang, na ako nges yewed katawan daet in agpansolang.
[8] Kamay panawen asin daan pag otos kangay galem piyolaw daet yaakay sa agpansolang sa boote. Angkataw no idapo in otos na matay in daet.
[9] Tangona in ako yewed kay katawan keyen apo otos, ako boway daan. Kamay paka kangay wa atawanan ina, abowayan wakay in daet, ako wakay matay.
[10] Ina daan nges pag otos in kailangan agpaboway sa kangay, bago mana ina daan in piyangwat padalan matang ako biyono.
[11] Angkataw in otos piyangwat in daet padalan matang ako piyadaya. Kataw ina ako biyono ngani in daet.
[12] In mga Batas Diyos maal wano, in baatte ngani otos idapo daet, boo betek, maal wano.
[13] Na nakay, in maalen pag otos lames in agbono sa kangay? Yewed ngani. In maal, in otos, piyangwat padalan in daet, kamay in daet wa daan in agbono sa kangay. Panawen ina ngiitan wa gayed in kadaetan lakoy in daet.
[14] Kantam atawanan in mga Batas tolong sa abyan. Kamay ako bilog, sogowan daet.
[15] Yewed kangay atawanan no nakay batang ako kataw tai. Baanda, in kangay beet piyangwat idwa kangay piyagpangwat. No nakay in kangay dayo piyangwat na ina in kangay piyagpangwat.
[16] No ako dayo in kangay piyagpangwat daet, na in beet siyabi ako keyen maalno in mga Batas.
[17] Na idwa ako gayed in agpangwat ina, no yewed in daet in agbalay sa kangay.
[18] Kangay atawanan idapo maalno agbalay sa kangay, na in beet siyabi sa kangay bilog in agkapangwat daet. Angkataw kamayba ako beet agpangwat maal, kamay ako yewed kabaloy.
[19] Angkataw yewed kangay piyagpangwat in maalno kangay beet. Dayem in kangay mana piyagpangwat in daet in dayo kangay piyangwat.
[20] No ako agpangwat in kangay dayo piyangwat, na idwa ako gayed in agpangwat, no yewed in daet wa daan in agbalay sa kangay.
[21] Na anda in kangay atawanan sa kangay. Kamayba ako beet agpangwat in maalno, in daet idbatay panaw sa kangay.
[22] Sa galem gayed kangay remrem ako agkaanggay sa mga Batas Diyos.
[23] Kamay apo kay osai ka batas agbalay sa kangay bilog. Ina aglaban sa batas sa kangay remrem. Panawen ina ako sakop sa daet agbalay sa kangay bilog.
[24] Na ako ayawte ngani. Nakay ngani in batay agpaboway sa kangay sa kangay bilog in agbaba sa katayan?
[25] Kitam wa agkaanggay sa Diyos angkataw in agpaboway IsoKiristo wa in kantam Kapwan. Na kataw ina ako no ako waget, in kangay remrem sogowan in mga Batas Diyos, kamay in kangay bilog sogowan daet.