[1] No apo mangyan kalakoyte in paniwala na kantam alapeten. Ayaw kay aggisoden in kansiyo piyagremrem.
[2] Apo agpaniwala keyen maal mamangan kamayba nakay. Apo wakay kalakoyte in paniwala, golay waget in kansiyo piyagkoman.
[3] In agkoman kamayba nakay ayaw aglibak sa agkoman waget golay. Osai in agkoman kamayba nakay ayaw agsabiyanen in agkoman waget golay, angkataw siyo piyagalapet Diyos.
[4] Ayaw kitam agsabiyanen in osai ka sogowan in roma mangyan. In kansiyo waget Kapwan in batay agsabi no siyo maalno no yewed. Kalbas siyo batay ngani maal, angkataw in Kapwan kabaloy agpangwat siyo maal.
[5] Apo mangyan agremrem keyen in osai ka ibeng lakonaw labi kay sa roma ibeng. Apo wakay agremrem keyen in boo ibeng tikkalakoyan. Kailangan in baatte mangyan ayaw piyagbaslag in remrem panawen sa mga ibeng.
[6] Kaya in osai ka mangyan agogali sa osai ka ibeng, panawen sa Kapwan. In agkoman kamayba nakay, na kaya siyo agkoman panawen sa Kapwan, angkataw siyo agkaanggay sa Diyos. In yewed agkoman kataw ina, na kaya yewed agkoman panawen din sa Kapwan, angkataw siyo din agkaanggay sa Diyos.
[7] Kamayba nakay sa kantam idapo agkaboway panawen waget sa kantam sadiri. Idapo din agkatay panawen waget sa kantam sadiri.
[8] No kitam agkaboway na ina panawen sa Kapwan. No kitam agkatay na ina din panawen sa Kapwan. Na ngani kamaybawa boway, kamaybawa matay, kitam sa Kapwan wa gayed.
[9] Angkataw kaya Kiristo matay kadogay tagoli wakay boway matang siyo in Kapwan kadayo sa mga matay, kadayo sa mga agkaboway.
[10] Na ayaw kantam agsabiyanen in kantam mga belag sa agpaniwala. Ayaw kantam aglibaken in kantam belag. Angkataw kitam boo batay piyagsokat Diyos no kitam maalno no yewed.
[11] Angkataw siyabi sa mga Agisolat keyen, Keyen in Kapwan, Kataw ako agkaboway, baatte mangyan batay agpaselang sa kangay, osai baatte mangyan batay agsabi in Diyos in lakonaw.
[12] Na ngani in baatte osai sa kantam batay piyagbotog Diyos.
[13] Na ayaw wa kitam agidapo kabolowan sa baatte osai. Dayem piliten ayaw agpangwat eleg sa paniwala kantam belag, ayaw agpaakay sa kansiyo sa daet.
[14] Panawen ako agiyagem sa Kapwan Isos kangay ngani atawanan idapo pamangnen piyagayaw. Kamay no piyagremrem in mangyan ina piyagayaw kiyoman, na piyagayaw ngani sa kansiyo ina.
[15] No panawen sa pamangnen kantam piyagkoman magolo in remrem kantam belag, na asin kitam idwa agpakayawte sa kantam belag. Panawen sa kansiyo Kiristo matay. Na siyo ayaw kantam agpasakopen sa parosa Diyos panawen waget sa kantam pamangnen.
[16] No nakay in sa kantam atawanan maal, na ayaw agpabayaan sabiyanen in roma.
[17] Angkataw in mangyan piyagsakop Diyos yewed panawen sa piyagkoman, osai sa piyaginem, dayem panawen siyo agibetek, apyaan in remrem, agkaanggay. Ina boo batang sa Betek pag Abyan.
[18] In kataw ina pag agpaniwala kay Kiristo, siyo piyagkaanggayan Diyos, osai piyagmaal in mga mangyan.
[19] Na kitam agpilit agogali in mga makamaal sa agpalageman, osai in makapaeyat remrem sa baatte osai.
[20] Ayaw agsidaen in piyangwat Diyos panawen waget sa kantam pamangnen. In boo pamangnen maal, kamay ayaw agkomanen in batay makadaet sa roma.
[21] In maal kay ayaw wa mamangan in ablasen, ayaw minem alak, ayaw agpangwat kamayba nakay in makadaet sa kantam belag sa agpaniwala.
[22] In kantam remrem asin pag mga kataw ina kitam waget osai in Diyos in kailangan katawan, yewed kailangan piyagsabi sa roma. Agkaanggay in mangyan yewed magolo in remrem sa kansiyo piyagpangwat kansiyo atawanan maal.
[23] Kamay in mangyan no piyagbaslag in remrem sa kansiyo piyagkoman, na siyo batay piyarosa Diyos, angkataw in siyo agkoman yewed panawen sa kansiyo paniwala. In kamayba nakay in yewed batang sa paniwala na ina daet.