[1] Kantam remremen in kantam tangona kakoyayan Abraam, no nakay in mibaloy sa kansiyo.
[2] No kaya siyo piyangwat idapo daet panawen sa kansiyo piyagpangwat, na maal wa siyo agpakabwat. Kamay siyo yewed maal agpakabwat sa pangkit Diyos,
[3] angkataw piyagsabi in mga Agisolat keyen, In dailan kaya Abraam piyangwat Diyos idapo daet, panawen siyo agpasandig sa Diyos.
[4] No in mangyan agpanawen, na in piyagtaboy sa kansiyo yewed piyagawit taboy waget, no yewed bayad sa panawen.
[5] Kamay in agkabeet idapo daet, yewed panawen sa siyo agpangwat maal, dayem panawen sa siyo agpasandig sa Diyos in agpangwat idapo daet sa mga mangyan daeten, na ina pag mangyan in piyagpangwat idapo daet panawen siyo agpasandig sa Diyos.
[6] Ina din in beet siyabi Dabid in siyo keyen, Agkaanggay in mangyan piyangwat Diyos idapo daet yewed dailan sa kansiyo mga panawen.
[7] Keyen Dabid, Boway wa in mangyan aleleng no liibangaw wa Diyos in daet, idapo wa ngani daet.
[8] Boway wa in mangyan in daet idbatay wa piyagremrem in Kapwan.
[9] Ina pag kaanggayan in siyabi Dabid, ina yewed waget sa mga Odyo. Yewed. Ina sa mga yewed din Odyo. Kantam piyagsabi batang sa mga Agisolat keyen, Kaya Abraam piyangwat Diyos idapo daet panawen siyo agpasandig sa kansiyo.
[10] Nangkadogay lames mibaloy ina, no siyo ikkay tiyoli, no siyo tiyoli wa? Ina mibaloy wa in yewed kay siyo tiyoli.
[11] In siyo ikkay tiyoli siyo piyangwat Diyos idapo daet panawen siyo agpasandig sa kansiyo. Kalbas siyo tiyoli wa matang tanda siyo piyangwat wa idapo daet. Kataw ina siyo mibaloy wa amang in boo agpasandig sa Diyos, in boo piyangwat idapo daet kamayba yewed tiyoli.
[12] Kataw din ina siyo amang in mga tiyoli, yewed waget panawen sa siro tiyoli no yewed panawen sa siro agtolad sa kantam tangona kakoyayan agpasandig sa Diyos, kataw in piyangwat Abraam in siyo ikkay tiyoli.
[13] In Diyos mangako kay Abraam, kadayo sa kansiyo mga kasokponan keyen in boo kobat batay kansiro, yewed panawen Abraam agpaniwala sa mga Batas no yewed panawen siyo agpasandig sa Diyos, kataw ina siyo piyangwat idapo daet.
[14] Kamay apo mga agremrem keyen idapo batay piyakan in pangako no yewed in mga agpaniwala sa mga Batas. Kamay no kataw ina na idapo batay piyakan, angkataw idapo kabaloy agpaniwala sa mga Batas. Osai sa mga agremrem kataw ina kansiro din remrem idapo kabolowan in agpasandig sa Diyos.
[15] In piyagkabel sa mga Batas in galit Diyos, angkataw no idapo Batas na idapo din daet.
[16] Na in pangako agiyagem waget sa agpasandig matang yewed piyagbayadan, dayem piyagtaboy waget Diyos panawen sa kansiyo lakonaw pag agpakayawte sa mga kasokponan Abraam, yewed waget sa mga agpaniwala sa mga Batas no yewed kadayo din sa boo mga kataw siyo agpasandig sa Diyos. Siyo in amang sa kantam boo.
[17] Keyen in mga Agisolat, Kao kangay piyangwat amang sa karowan mga mangyan. Ina pag pangako piyagpangwat Diyos in kay Abraam piyagpasandigan, in Diyos in agpaboway sa mga matay, osai in agberya sa mga idapo kay, matang siro mibaloy wa.
[18] Kamayba tiyak idbatay wa mamodang Abraam, siyo agpanaya kay din, agpasandig kay sa Diyos, matang siyo mibaloy wa ngani amang sa karowan mga mangyan. Kataw in siyabi Diyos kay Abraam keyen, In kaimo mga kasokponan batay karo in mga magirem.
[19] Marigen daan in kansiyo agpasandig sa Diyos kamayba siyo mga osai wa ka daan ka dagon, koyayte wa gayed, osai Sara baog din, osai koyayte wa din.
[20] Yewed piyagbaslag in kansiyo remrem sa pangako Diyos, dayem labi kay siyo agpakaeyat in agpasandig, agmaal sa Diyos.
[21] Siyo agpaniwala ngani in Diyos kabaloy agpangwat in kansiyo pangako.
[22] Matang siyo piyangwat Diyos idapo daet panawen siyo agpasandig sa kansiyo.
[23] Kamay in siyabi keyen in piyangwat Diyos idapo daet, ina siyolat yewed waget kay Abraam,
[24] dayem kadayo din sa kantam. Kitam din piyangwat idapo daet panawen kitam agpasandig sa Diyos in agpaboway wakay tagoli kay Isos in kantam Kapwan.
[25] Siyo piyabono panawen sa kantam mga daet, kalbas piyaboway wakay matang kitam apangwat idapo daet.