[1] Na nakay batang in mga Odyo aglabis kay sa mga yewed Odyo? Nakay in pakinabang sa toli?
[2] Karowan ngani. In tokaw sa boo, sa mga Odyo piyaalapet in mga agiplaong Diyos.
[3] No in kalaati Odyo bosliyen, na sa kanyo remrem nakay, in Diyos lames agpamosliyen din?
[4] Yewed ngani mayadi. In Diyos yewed ngani bosliyen kamayba in boo mangyan bosliyen. Kataw in mga Agisolat keyen, Diyos, atawanan in kaimo mga agiplaong yewed bosliyen. Osai no kao piyagosap na kao batay daan mandaeg.
[5] Kataw anda in matiwid mga mangyan. No labi kay piyagngitan in kaalenen in Diyos panawen sa daeten in kantam mga piyagpangwat, na nakay, kantam lames asabi keyen in Diyos daeten in siyo agparosa sa kantam?
[6] Yewed ngani mayadi. No in Diyos daeten, na nangkataw siyo batay kaosap sa boo mga mangyan?
[7] Aronaw kay in agmatiwid keyen, No labi kay lomwas in kalakoyen in Diyos panawen ako bosliyen, angkataw labi kay piyagngitan in siyo agpangwat in kansiyo mga siyabi, na no kataw ina nakay batang ako kansiyo piyagparosa kataw in osai ka agpamangwat daet?
[8] Nakay batang yewed maal kitam mamangwat daet no batay maal in kalobosan? In mga agpamasaen sa kangay keyen kataw ina kono in kangay piyagpatoldo. Na maal ngani siro parosaen Diyos.
[9] Na nakay, kitam in mga Odyo mabwat kay lames sa mga yewed Odyo? Kapya. Kataw karai in kangay siyabi, kamayba nakay pag mga mangyan, kamayba in mga Odyo, kamayba in mga yewed, kitam boo yewed kabaloy yewed agpangwat daet.
[10] Kataw in siyabi sa mga Agisolat keyen, Idapo mangyan agpangwat maal. Idapo, kamayba osai waget.
[11] Idapo katawan. Idapo agpamangkit sa Diyos.
[12] In boo mangyan pabaribid wa. Siro boo wa mga aleleng. Idapo mabait. Idapo, kamayba osai waget.
[13] In kansiro mga bibi marames wa gayed, kagwali lebengan idwa tiyabon, angkataw in kansiro mga agiplaong agpamadaya, in kansiro mga agiplaong makakatay kataw in kayat dopong.
[14] Siro maloba wa agpamanes agpansabi mga makakaskit pag agiplaong.
[15] Siro agkalaliyan agbono mangyan.
[16] Kamayba saano siro domalan, apo liyangat mga maskit, mga kaidapan.
[17] Siro yewed katawan in apyaan pag dalan.
[18] Siro idapo katawan agkalimo sa Diyos.
[19] Kantam atawanan in boo piyagsabi sa mga Batas Diyos ina piyagsabi sa kantam boo angkataw in boo mangyan sakop sa mga Batas. Na in boo mangyan yewed kadailan angkataw in boo batay piyagosap Diyos.
[20] In mangyan idbatay piyagpangwat Diyos idapo daet panawen sa agpangwat in piyagsabi sa mga Batas, angkataw idapo mangyan kabaloy agpangwat in mga Batas. Kamay panawen sa mga Batas kaya in mangyan katawan siyo apo daet.
[21] Kamay ngona piyagpapangkit wa gayed in padalan Diyos agpangwat idapo daet sa mga mangyan. Ina yewed panawen sa mga Batas kamayba piyatonayan in mga Batas osai in mga poropita.
[22] In mga agpasandig kay IsoKiristo piyagpangwat Diyos idapo daet. Ina sa boo agpasandig kay Isos, kamayba kataw nakay pag mangyan.
[23] Angkataw in boo pabaribid wa, yewed sibay sa kalakoyen siyandata nges Diyos sa kantam.
[24] Kamay kamayba kataw ina kitam piyagpangwat Diyos idapo daet panawen sa kansiyo lakonaw pag agpakayawte, osai panawen kay Kiristo Isos in agpalpas sa kantam.
[25] Kiristo in iidang Diyos matang in siyo biyono siyo wa in padalan aglibangaw sa daet in mga agpasandig sa kansiyo. Ina piyangwat Diyos matang piyagngitan siyo betek ngani. Tangona kansiyo piyagbanta in daet piyagpangwat mga mangyan, siro idwa kansiyo piyarosa.
[26] Kalbas ngona pag betek panawen sa kansiyo piyangwat, piyagngitan din in siyo idapo daet, osai in kansiyo din piyagpangwat idapo daet in mga agpasandig kay Isos.
[27] Na ngona kitam idapo wa dailan agpakabwat, angkataw in kitam idapo daet yewed sa kitam agpangwat in mga Batas, dayem sa kitam agpasandig kay Kiristo.
[28] Angkataw atawanan wa in mangyan piyagpangwat Diyos idapo daet yewed panawen sa agpaniwala sa mga Batas no yewed panawen sa agpasandig sa kansiyo.
[29] In Diyos yewed waget sa mga Odyo. Siyo Diyos din sa mga yewed Odyo. Siyo Diyos sa boo
[30] angkataw siyo osai waget. Kamayba in mga Odyo, siro kansiyo piyagpangwat idapo daet panawen siro agpasandig kay Kiristo. Kadayo din in mga yewed Odyo, siro kansiyo din piyagpangwat idapo daet panawen siro agpasandig kay Kiristo.
[31] Na nakay, panawen sa agpasandig kay Kiristo kanyam wa lames piyagidapo kabolowan in mga Batas? Kapya. Kanyam kay ngani piyagpalakonaw in mga Batas.